Abase-Efesu 2 - iBhayibhili Elingcwele 1978

Ukusiliswa kuyisiphiwo somusa kaNkulunkulu

¹ Lina lalifile ngeziphambeko langezono zenu,

² elalikade lihamba kuzo ngendlela yalumhlaba, lilandela umbusi wamandla asemkhathini, ongumoya osasebenzayo lakhathesi phakathi kwabangalaleliyo.

³ Thina sonke sake sahlala phakathi kwabo enkanukweni yomzimba, silandela izifiso zomzimba lenhliziyo; ngakhoke ngokwemvelo sasingabantwana bolaka njengabanye bonke.

⁴ Kodwa uNkulunkulu onothileyo ngesihawu, ngenxa yothando lwakhe olukhulu asithanda ngalo,

⁵ lanxa sasifile ngeziphambeko zethu, wasivusa kanye loKristu; ngomusa lisilisiwe.

⁶ Wasivusa kanye loKristu Jesu, wasihlalisa kanye laye ezulwini,

⁷ ukuze kuthi ezikhathini ezizayo abonakalise inotho enkulu yomusa wakhe lobubele bakhe kithi kuKristu Jesu.

⁸ Ngoba lisilisiwe ngomusa ngokukholwa; lalokhu kakuveli kini, kuyisiphiwo sikaNkulunkulu.

⁹ Kakuveli ngemisebenzi, funa kube khona ozincomayo.

¹⁰ Ngoba singumsebenzi wakhe, kuKristu Jesu sadalelwa imisebenzi emihle uNkulunkulu ayilungiselela ngaphambili ukuba sihambe ngayo.

UKristu wenza abaJuda labezizwe babe munye

¹¹ Ngakhoke khumbulani ukuthi kwake kwaba khona isikhathi lapho elalingabezizwe, elalibizwa yilabo abasokileyo ngokuthi lingabangasokanga, ukusoka okwenziwa ngezandla emzimbeni.

¹² Khumbulani ukuthi ngalesosikhathi lalingelaye uKristu, lalingaphandle kombuso wakoIsrayeli, lalingabezizwe ezivumelwaneni zesithembiso, lalingelalo ithemba, lalingelaye uNkulunkulu emhlabeni.

¹³ Kodwa khathesi kuKristu Jesu lina elalikhatshana selilethwe eduze ngegazi likaKristu.

¹⁴ Ngoba yena uyikuthula kwethu, owenza abaJuda labezizwe babe munye, lowabhidliza ubutha obabumi phakathi kwabo njengomduli owahlukanisayo;

¹⁵ ngoba wachitha umlayo olemithetho lezimiso, ukuba abenze kuye labo ababili babe ngumuntu munye omutsha, ngalokhu enze ukuthula.

¹⁶ Wenza futhi ukuba bobabili babuyisane loNkulunkulu emzimbeni munye ngesiphambano; ngalokho wachitha ubutha.

¹⁷ Weza watshumayela ivangeli lokuthula kini elalikhatshana, yebo, lokuthula kulabo ababeseduze.

¹⁸ Ngoba ngaye silokungena sonke ngoMoya munye kuYise.

¹⁹ Ngakhoke kaliseyibo abemzini lezihambi, kodwa selingabombuso munye labangcwele, lingabendlu kaNkulunkulu.

²⁰ Lakhiwe phezu kwesisekelo sabaphostoli labaprofethi, uKristu uqobo lwakhe uyilitshe lengonsi,

²¹ okuhlanganiselwe kuye isakhiwo sonke, sikhule sibe lithempeli elingcwele eNkosini.

²² Lina kanye labanye liyakhiwa kuye, ukuba libe yindlu kaNkulunkulu azakuhlala kuyo uMoya.