Abase-Efesu 1 - iBhayibhili Elingcwele 1978

Isibingelelo

¹ Mina Pawuli, umphostoli kaKristu Jesu ngentando kaNkulunkulu, ngithi kubo abangcwele abaseEfesu, abathembekileyo kuKristu Jesu:

² Kakube kini umusa lokuthula okuvela kuNkulunkulu uBaba laseNkosini uJesu Kristu.

UPawuli udumisa uNkulunkulu ngenxa yokusiliswa okungoKristu

³ Kabongwe uNkulunkulu, uYise weNkosi yethu uJesu Kristu osibusisileyo kuKristu ngesibusiso sonke sokomoya ezulwini.

⁴ Wasikhetha ngoKristu ngaphambi kokudatshulwa komhlaba ukuba sibe ngcwele, singasoleki phambi kwakhe.

⁵ Wasimisela ngothando ukuba sibe ngabantwana bakhe ngoJesu Kristu, ngokwecebo lentando yakhe,

⁶ ukuze adunyiswe ngomusa wakhe omangalisayo asiphe wona ngesihle ngaye oThandiweyo.

⁷ Ngaye silokuhlengwa ngegazi lakhe, lokuthethelelwa kweziphambeko zethu ngokwenotho yomusa wakhe

⁸ awandise kithi kukho konke ukuhlakanipha lokuqonda.

⁹ Usazisile imfihlakalo yentando yakhe ngokwecebo lakhe alimisa ngaphambili kuKristu,

¹⁰ ukuze aphumelelise nxa isikhathi sesiphelele ukuhlanganisela ndawonye izinto zonke ezisezulwini lezisemhlabeni kuKristu.

¹¹ KuKristu thina sabelwa ilifa, esamiselwa lona ngaphambili ngokwecebo lakhe osebenzayo ezintweni zonke ngokwentando yakhe,

¹² ukuba thina, esakholwa kuKristu kuqala, siphilele udumo lobukhosi bakhe.

¹³ Lani, eselizwile ilizwi leqiniso elilivangeli lokusiliswa kwenu lakholwa kuye, libekwe uphawu loMoya oNgcwele othenjisiweyo

¹⁴ oyisibambiso selifa lethu, size samukeliswe lona, lapho uNkulunkulu esehlengile abantu bakhe, kube ludumo lwakhe lobukhosi bakhe.

UPawuli ucelela ibandla ukuba lazi izibusiso ezivela ngoKristu

¹⁵ Ngenxa yalokho lami, esengizwile ngokukholwa kwenu eNkosini uJesu lothando lwenu kubo bonke abangcwele,

¹⁶ kangiyekeli ukulibongela, ngilikhumbula emikhulekweni yami,

¹⁷ ukuze uNkulunkulu weNkosi yethu uJesu Kristu, uYise olobukhosi, alinike umoya wokuhlakanipha lokwambulwa ekumazini yena.

¹⁸ Kungathi kungavulwa amehlo enhliziyo zenu, ukuze lazi ithemba elibizelwa kulo, lenotho enkulu yelifa alinika lona kubo abangcwele,

¹⁹ lobukhulu obumangalisayo bamandla akhe kithi esikholwayo. Lokhu kuyikusebenza kwamandla akhe amakhulu

²⁰ awasebenzisa kuKristu ngokumvusa kwabafileyo, lapho emhlalisa ngakwesokunene sakhe ezulwini,

²¹ ngaphezu kwakho konke ukubusa, lobukhulu, lamandla, lobukhosi, laphezu kwamabizo wonke aphathwayo, kungesikho kulesisikhathi kuphela kodwa lesikhathini esizayo.

²² Wabeka konke ngaphansi kwenyawo zakhe, wamenza waba yinhloko yakho konke kulo ibandla,

²³ elingumzimba wakhe, eligcwaliswa nguye ogcwalisa konke jikelele.