AbaseRoma 9 - iBhayibhili Elingcwele 1978

Ukungakholwa kwabakoIsrayeli kuyadabukisa

¹ Ngikhuluma iqiniso ngikuKristu, kangiqambi manga; isazela sami sifakazelana lami ngoMoya oNgcwele

² ukuthi ngilokudabuka okukhulu lobuhlungu obungapheliyo enhliziyweni yami.

³ Ngoba ngingafisa ukuba mina uqobo ngahlukaniswe loKristu ngenxa yabazalwane bami, abangabakithi ngokwenyama.

⁴ Bona bangabakoIsrayeli, benziwa abantwana bakaNkulunkulu, ngeyabo inkazimulo, lezivumelwano, lokumiswa komlayo, lenkonzo, lezithembiso;

⁵ bangababo okhokho avela kubo uKristu ngokwenyama. UNkulunkulu ophezu kwakho konke kabongwe kuze kube nininini. Ameni.

Ukukhethwa kwabakoIsrayeli nguNkulunkulu

⁶ Kodwa kangitsho ukuthi ilizwi likaNkulunkulu lahlulekile. Ngoba kakusibo bonke abazalwa nguIsrayeli abangabakoIsrayeli,

⁷ loba beyinzalo kaAbrahama kakusibo bonke abangabantwana bakhe; kodwa kuthiwa: NgoIsaka izakubizwa inzalo yakho.

⁸ Lokhu kutsho ukuthi kakusibo abantwana benyama abangabantwana bakaNkulunkulu; kodwa abantwana besithembiso yibo abathiwa yinzalo kaAbrahama.

⁹ Ngoba ilizwi lesithembiso yileli lokuthi: Ngalesisikhathi ngizakufika, loSara uzakubeletha indodana.

¹⁰ Kakusikho lokhu kuphela, kodwa kwaba njalo lakuRebeka esekhulelwe abantwana ngandodanye, ukhokho uIsaka;

¹¹ lanxa bengakazalwa, bengakenzi okuhle loba okubi, ukuze icebo likaNkulunkulu elokukhetha kwakhe lime, kungabi ngemisebenzi kodwa kube ngokubiza kwakhe,

¹² kwatshiwo kuye ukuthi: Omkhulu uzakukhonza omncinyane.

¹³ Kunjengalokho okulotshiweyo ukuthi: UJakobe ngamthanda, kodwa uEsawu ngamzonda.

UNkulunkulu ulesihawu; ulokubusa konke

¹⁴ Phoke, sizakuthini? Kukhona ukungalungi kuNkulunkulu na? Phinde!

¹⁵ Ngoba uthi kuMose: Ngizakumhawukela engifisa ukumhawukela; ngizakuba lomusa kwengifisa ukuba lomusa kuye.

¹⁶ Ngakho kakuyi ngentando ingabe ngomzamo womuntu, kodwa kuya ngokuhawukela kukaNkulunkulu.

¹⁷ Ngoba umbhalo uthi kuFaro: Ngakuphakamisela khona lokho ukuba ngibonakalise amandla ami ngawe, lokuba ibizo lami litshunyayelwe emhlabeni wonke.

¹⁸ Ngakho uNkulunkulu uhawukela lowo athanda ukumhawukela, amenze lukhuni lowo athanda ukumenza lukhuni.

¹⁹ Wena uzakuthi kimi: Pho, uNkulunkulu usasolelani na? Ngoba ngubani ongamelana lentando yakhe na?

²⁰ Kodwa, wena muntu, ungubani wena ophikisana loNkulunkulu na? Okubunjiweyo kungatsho yini kowakubumbayo ukuthi: Wangenzelani ngaba njalo na?

²¹ Kalamandla yini umbumbi phezu kwebumba ukuba ngesigaqa sisinye enze izitsha ezimbili, esinye sibe lomsebenzi omkhulu lesinye sibe lomsebenzi omncinyane na?

²² Singathini, uba uNkulunkulu, ethanda ukubonakalisa ulaka lwakhe lokwazisa amandla akhe, wathwala ngokubekezela okukhulu izitsha zolaka ezilungiselwe ukubhujiswa,

²³ ukuze abonakalise inotho yenkazimulo ezitsheni zomusa ayezilungisele inkazimulo yakhe ngaphambili na?

²⁴ Siyizo thina asibizileyo, kungesikho kubaJuda kuphela kodwa lakumaGriki futhi,

²⁵ njengalokhu akutsho kuHoseya: Abangesibo abantu bami ngizakubabiza ngokuthi ngabantu bami, longesuye othandiweyo ngizakumbiza ngokuthi ngothandekayo.

²⁶ Lesahlukweni lapho kwathiwa kibo: Kalisibo abantu bami; lapha bazakubizwa ngokuthi ngamadodana kaNkulunkulu ophilayo.

²⁷ UIsaya laye umemeza ngoIsrayeli esithi: Lanxa inani labakoIsrayeli lingangetshebetshebe lolwandle, kuzakusiliswa abalutshwana kuphela.

²⁸ Ngoba iNkosi izakuquma indaba emhlabeni, iyiqume iphele ngokukhawuleza.

²⁹ Kunjengalokho akutshoyo uIsaya ngaphambili ukuthi: Uba iNkosi yamabandla ibingasitshiyelanga inzalo, besizakuba njengeSodoma, sifane leGomora.

AbakoIsrayeli bahluleka ukuwugcina umlayo

³⁰ Pho, sizakuthini? Sizakuthi abezizwe abangakudingisisanga ukulunga bakuzuzile, ukulunga okungokukholwa;

³¹ kodwa uIsrayeli, owadingisisa umlayo wokulunga, kaphumelelanga ukuwuzuza umlayo.

³² Ngani na? Ngoba kabawudingisisanga ngokukholwa, kodwa ngokungathi ngemisebenzi. Bakhubeka elitsheni lokukhubekisa,

³³ njengokulotshiweyo ukuthi: Khangela, ngibeka eZiyone ilitshe lokukhubekisa, ledwala lokuwisa; okholwa kuye kayikuyangeka.