AbaseRoma 7 - iBhayibhili Elingcwele 1978

Ukukhululeka emlayweni

¹ Kalazi yini, bazalwane — ngoba ngikhuluma lalabo abawaziyo umlayo — ukuthi umlayo ubusa umuntu esasila kuphela na?

² Ngakho umfazi ubotshelwe ngomlayo endodeni isekhona; kodwa uba indoda isifile, ukhululiwe emlayweni omayelana lendoda.

³ Ngakhoke, lapho indoda isekhona, uzakuthiwa yisifebe, uba esiba ngowenye indoda; kodwa uba indoda isifile, ukhululekile emlayweni, angebe yisifebe uba esendela kwenye indoda.

⁴ Ngokunjaloke, bazalwane, selifile lani mayelana lomlayo ngomzimba kaKristu, ukuze libe ngabomunye, lowo owavuswa kwabafileyo ukuba sithelele uNkulunkulu izithelo.

⁵ Kwathi sisaphila ngokwabantu, inkanuko zethu ezimbi ezavuswa ngomlayo zasebenza ezithweni zethu ukuthelela ukufa izithelo.

⁶ Kodwa khathesi sesikhululiwe emlayweni, sifile mayelana lalokho esasibanjiwe yikho, ukuba sikhonze uNkulunkulu ekuphileni okutsha kukaMoya, singakhonzi ngokudala okulotshiweyo.

Umlayo lesono

⁷ Phoke, sizakuthini na? Umlayo uyisono na? Phinde! Kodwa bengingayikusazi isono uba bekungekho umlayo. Bengingayikuwazi umhawu uba umlayo ubungatshongo ukuthi: Ungabi lamhawu.

⁸ Kodwa isono sathola ithuba ngomthetho, sasebenza kimi umhawu wonke. Ngaphandle komlayo isono sifile.

⁹ Minake ngake ngasila ngaphandle komlayo; kodwa kwathi sekufikile umthetho, isono savuka,

¹⁰ ngafa mina. Lowomthetho obuzakuletha ukuphila wona wafunyanwa uletha ukufa kimi,

¹¹ ngoba isono sathola ithuba ngomthetho, sangikhohlisa, sangibulala ngawo.

¹² Ngakhoke umlayo ungcwele, lomthetho ungcwele, ulungile, muhle.

¹³ Pho, okuhle kwaletha ukufa kimi na? Phinde! Kodwa isono, ukuba sibonakaliswe ukuthi siyisono, singibangele ukufa ngakho okuhle, ukuze isono ngawo umlayo sibe yisono esikhulu.

¹⁴ Siyazi ukuthi umlayo ungowomoya; kanti mina ngingowenyama, ngithengisiwe njengesigqili esonweni.

¹⁵ Ngitsho lezenzo zami kangiziqondi, ngoba lokho engikwenzayo, kakusikho lokho engikuthandayo; kodwa lokho engikuzondayo yikho engikwenzayo.

¹⁶ Uba ngikwenza lokho engingakuthandiyo, ngiyawuvumela umlayo ukuthi ulungile.

¹⁷ Kodwa ngalokhu kakuseyimi engikwenzayo, kodwa yisono esihlala kimi.

¹⁸ Ngoba ngiyazi ukuthi kimi, ngitsho enyameni yami, kakuhlali okuhle; ngoba kukhona kimi ukuthanda ukwenza okuhle, kodwa ukukwenza kakukho.

¹⁹ Okuhle engikuthandayo kangikwenzi, kodwa okubi engingakuthandiyo yikho engikwenzayo.

²⁰ Uba ngikwenza lokho engingakuthandiyo kakuseyimi engikwenzayo, kodwa yisono esihlala kimi.

²¹ Ngakhoke lokho engikufumanayo yilokhu kokuthi, lapho ngithanda ukwenza okuhle, okubi kuseduzane lami.

²² Ngiyathokoza emlayweni kaNkulunkulu isibili sami,

²³ kodwa ngibona ezithweni zami omunye umlayo olwayo lomlayo wengqondo yami, ungithumbela emlayweni wesono osezithweni zami.

²⁴ Hawu, mina muntu ososizini! Ngubani ozakungikhulula kulumzimba wokufa na?

²⁵ NguNkulunkulu yedwa ngoJesu Kristu iNkosi yethu. Kabongwe uNkulunkulu. Ngalokhoke mina ngokwami ngikhonza umlayo kaNkulunkulu ngengqondo, kodwa ngikhonza umlayo wesono ngokwabantu.