AbaseRoma 6 - iBhayibhili Elingcwele 1978

Ukuphila okutsha okungoKristu

¹ Ngakho sizakuthini? Sizakuhlala esonweni ukuba kwande umusa na?

² Phinde! Thina esafa mayelana lesono singaba sisasila kanjani kuso na?

³ Kalazi yini ukuthi, thina esabhaphathizelwa kuKristu Jesu, sabhaphathizelwa ekufeni kwakhe na?

⁴ Ngalokhuke sambelwa laye ngokubhaphathizelwa ekufeni ukuba, njengoba uKristu wavuswa kwabafileyo ngobukhosi bukaYise, ngokunjalo lathi sihambe ekuphileni okutsha.

⁵ Ngoba uba sihlanganisiwe kanye laye ngokufa okufana lokwakhe, sizakuhlanganiswa kanye laye futhi ngokuvuka okufana lokwakhe.

⁶ Siyazi ukuthi umuntu wethu omdala wabethelwa kanye laye ukuba umzimba wesono ubhujiswe, ukuze singabi yizigqili zesono,

⁷ ngoba ofileyo ukhululiwe esonweni.

⁸ Kodwa uba sifile kanye loKristu, siyakholwa ukuthi sizakuphila futhi kanye laye.

⁹ Siyazi ukuthi uKristu, esevusiwe kwabafileyo, kasoze afe futhi; ngoba ukufa kungebe kusabusa phezu kwakhe.

¹⁰ Ngoba ukufa afa ngakho, wakufa kanye nje ngenxa yesono; kodwa ukuphila akuphilayo, ukuphilela uNkulunkulu.

¹¹ Ngokunjalo lani kalibokuthi lifile mayelana lesono, kodwa liphilele uNkulunkulu kuKristu Jesu.

¹² Ngakhoke kasingabusi isono emizimbeni yenu efayo, lize lilalele izinkanuko zawo.

¹³ Linganikeli izitho zenu esonweni, zibe yizikhali zokungalungi; kodwa zinikeleni lina kuNkulunkulu njengabavusiweyo kwabafileyo abaphilayo, linikele izitho zenu kuNkulunkulu zibe yizikhali zokulunga;

¹⁴ isono kasiyikubusa phezu kwenu ngoba kalingaphansi komlayo, kodwa lingaphansi komusa.

Umfanekiso wobugqili

¹⁵ Phoke? Sizakona ngoba singekho ngaphansi komlayo kodwa singaphansi komusa na? Phinde!

¹⁶ Kalazi yini ukuthi lowo elizinikela kuye ukuba libe yizigqili zokumlalela, liyizigqili zakhe elimlalelayo, loba ezesono okusa ekufeni, loba ezokulalela okuletha ukulunga na?

¹⁷ Kodwa kabongwe uNkulunkulu ngokuthi lina elake laba yizigqili zesono, selilalela ngenhliziyo indlela yesifundiso elanikelwa kuyo,

¹⁸ lokuthi, selikhululiwe esonweni, liyizigqili zokulunga khathesi.

¹⁹ Ngikhulumisa okwabantu ngenxa yobuthakathaka benu. Ngoba njengalokho lanikela izitho zenu ukuba zikhonze amanyala lobubi, kube khona ububi obukhulu, ngokunjaloke zinikeleni izitho zenu khathesi ukuba zikhonze ukulunga, kube khona ubungcwele.

²⁰ Lapho liseyizigqili zesono, lalikhululekile mayelana lokulunga.

²¹ Lazuza umvuzo bani na? Kalizuzanga lutho, kuphela lokho osekulithelela inhloni; ngoba ukucina kwakho kuyikufa.

²² Kodwa khathesi, njengoba selikhululiwe esonweni laba ngabakhonzayo uNkulunkulu, lizuza umvuzo oletha ubungcwele, lasekucineni ukuphila okungapheliyo.

²³ Ngoba inkokhelo yesono iyikufa, kodwa isiphiwo somusa sikaNkulunkulu siyikuphila okungapheliyo kuKristu Jesu iNkosi yethu.