AbaseRoma 5 - iBhayibhili Elingcwele 1978

Izithelo zokulunga

¹ Ngakhoke lokhu sesilungisisiwe ngokukholwa, asibe lokuthula kuNkulunkulu ngeNkosi yethu uJesu Kristu.

² Ngaye singenisiwe kulumusa esimi kuwo; asithokozeni ngethemba lethu lokuthi sizakuhlanganyela inkazimulo kaNkulunkulu.

³ Kakusikho lokhu kuphela; futhi asithokoze langenhlupheko zethu sazi ukuthi ukuhlupheka kuveza ukuphikelela,

⁴ ukuphikelela kuveza ukuqina, lokuqina kuveza ithemba.

⁵ Ithemba kalidanisi, ngoba uthando lukaNkulunkulu lutheliwe enhliziyweni zethu ngoMoya oNgcwele esimuphiweyo.

⁶ Ngoba sisebuthakathaka, ngesikhathi esifaneleyo uKristu wafela ababi.

⁷ Ngoba kunzima ukuba umuntu afele olungileyo, kodwa mhlawumbe kungaba khona olesibindi sokufela omuhle.

⁸ Kodwa uNkulunkulu uqinisa uthando lwakhe kithi ngalokhu ukuthi uKristu wasifela siseyizoni.

⁹ Ngakho kakhuluke, lokhu sesilungisisiwe ngegazi lakhe, sizakusiliswa ngaye olakeni lukaNkulunkulu.

¹⁰ Ngoba uba, lapho siseyizitha, sazuza ukubuyisana loNkulunkulu ngokufa kweNdodana yakhe, ikakhulu, lokhu sesizuze ukubuyisana, sizakusiliswa ngokuphila kwayo.

¹¹ Kakusikho lokhu kuphela, kodwa sizincoma futhi ngoNkulunkulu ngeNkosi yethu uJesu Kristu, esesamukelisiwe ngaye ukubuyisana.

Ukufa kwafika ngoAdamu; ukuphila kwafika ngoJesu

¹² Ngakhoke, njengalokhu isono sangena emhlabeni ngamuntu munye, langesono kwangena ukufa, ngokunjalo ukufa kwabehlela abantu bonke, ngoba bonke bonile.

¹³ Isono sasikhona emhlabeni kungakabi khona umlayo, kodwa isono kasibalelwa ungekho umlayo.

¹⁴ Kanti ukufa kwabusa kusukela kuAdamu kwaze kwafika kuMose, laphezu kwalabo ababengonanga ngendlela yokweqa kukaAdamu, ongumfanekiso wakhe obezakuza.

¹⁵ Kodwa isiphiwo somusa kasinjengesiphambeko. Ngoba uba ngesiphambeko samuntu munye, abanengi bafa, ikakhulu kwanda kwabanengi umusa kaNkulunkulu lesiphiwo esivela ngomusa wamuntu munye, uJesu Kristu.

¹⁶ Futhi isiphiwo somusa kasinjengokwavezwa yikona kwalowomuntu owonayo. Ngoba ukuthonisiswa okwaba ngesiphambeko samuntu munye kwaletha ukulahlwa, kodwa isiphiwo somusa esaba ngeziphambeko ezinengi saletha ukulungisiswa.

¹⁷ Ngoba uba ngesiphambeko samuntu munye ukufa kwabusa ngalowo emunye, ikakhulu bona, abamukela ubunengi bomusa lobunengi besiphiwo sakhe sokulunga, bazakubusa ekuphileni ngalowo emunye, uJesu Kristu.

¹⁸ Ngakhoke, njengoba isiphambeko sinye salethela abantu bonke ukulahlwa, ngokunjalo isenzo sinye sokulunga silethela abantu bonke ukulungisiswa lokuphila.

¹⁹ Ngoba njengoba ngokungalaleli komuntu munye abanengi benziwa izoni, ngokunjalo ngokulalela komuntu munye abanengi bazakwenziwa abalungileyo.

²⁰ Umlayo waba khona ukuba isiphambeko sande; kodwa lapho kwanda isono khona, umusa wanda kakhulukazi,

²¹ ukuze, njengoba isono sabusa ngokufa, ngokunjalo umusa ubuse ngokulunga, kube khona ukuphila okungapheliyo ngoJesu Kristu iNkosi yethu.