AbaseRoma 3 - iBhayibhili Elingcwele 1978

AbaJuda balelungelo kulabanye ngoba banikiwe umlayo

¹ Phoke, kuyini umJuda adlula abanye ngakho na? Ukusoka kulokusiza bani na?

² Kukhulu ngezindlela zonke. Kuqala, ngoba abaJuda baphathisiwe amazwi kaNkulunkulu.

³ Uba abanye bengathembekanga, kunjani pho? Ukungathembeki kwabo kuzakwenza ize ukuthembeka kukaNkulunkulu na?

⁴ Phinde! Kakube yikuthi uNkulunkulu uqinisile loba wonke umuntu eqamba amanga, njengokulotshiweyo ukuthi: Ukuze ubonwe ukuthi ulungile emazwini akho, unqobe ekuthonisisweni kwakho.

⁵ Kodwa uba ukungalungi kwethu kubonakalisa ukulunga kukaNkulunkulu, sizakuthini na? UNkulunkulu kalunganga yini ngokwehlisela ulaka phezu kwethu na? Ngikhulumisa okomuntu.

⁶ Phinde! Ngoba uNkulunkulu angawuthonisisa umhlaba kanjani na?

⁷ Futhike, uba iqiniso likaNkulunkulu landisile udumo lwakhe ngamanga ami, ngisathonisiselwani njengesoni na?

⁸ Pho, kungani singenzi okubi ukuze kuvele okuhle, njengalokhu abanye abasigconayo besithi sitsho njalo na? Ukulahlwa kwabo kubafanele.

AbaJuda balesono njengabanye

⁹ Phoke, thina esingabaJuda singcono na? Atshi, kasingcono lakanye. Ngoba sesitshilo ukuthi abantu bonke, abaJuda lamaGriki, basemandleni esono,

¹⁰ njengokulotshiweyo ukuthi: Kakho olungileyo, kakho loyedwa;

¹¹ kakho oqedisisayo, kakho ofuna uNkulunkulu.

¹² Bonke baphambukile, bonakele bonkana; kakho owenza okuhle, kakho loyedwa.

¹³ Umphimbo wabo uliliba elivulekileyo, bakhohlisa ngenlimi zabo; ubuhlungu bezinyoka busendebeni zabo,

¹⁴ umlomo wabo ugcwele ukuthuka lokubaba.

¹⁵ Inyawo zabo ziphangisela ukuchitha igazi,

¹⁶ incithakalo losizi kusendleleni zabo,

¹⁷ indlela yokuthula kabayazi.

¹⁸ Ukwesaba uNkulunkulu kakukho engqondweni abo.

¹⁹ Siyazi ukuthi lokho okutshoyo umlayo, ukukhuluma kibo abangaphansi komlayo, ukuba yonke imilomo ivinjelwe, lokuba umhlaba wonke ube ngaphansi kokuthonisisa kukaNkulunkulu.

²⁰ Ngoba ngemisebenzi yomlayo kakho ozakulungisiswa phambi kwakhe, lokhu ngomlayo kuvela ukwazi isono kuphela.

Umuntu ulungisiswa ngoJesu Kristu

²¹ Kodwa sekubonakalisiwe ukulunga kukaNkulunkulu ngaphandle komlayo, lanxa kufakazelwa ngumlayo labaprofethi,

²² ngitsho ukulunga kukaNkulunkulu okungokukholwa kuKristu kibo bonke abakholwayo. Ngoba kawukho umahluko.

²³ Bonke bonile, basilele enkazimulweni kaNkulunkulu.

²⁴ Balungisiswa ngesihle ngomusa wakhe, ngokuhlengwa okukuKristu Jesu

²⁵ ammisayo uNkulunkulu ukuba abe yinhlawulo ngegazi lakhe, emukelwe ngokukholwa. UNkulunkulu wakwenza lokhu ukuba abonakalise ukulunga kwakhe, ngoba ngokubekezela kwakhe wayekela izono ezenziwa ngaphambili;

²⁶ wafisa ukubonakalisa ukulunga kwakhe kulesisikhathi, ukuze azibonakalise ukuthi yena ulungile lokuthi uyamlungisisa lowo okholwa kuJesu.

²⁷ Ngakhoke kungaphi ukuzincoma kwethu na? Kuvalelwe phandle. Ngomthetho bani? Ngokwemisebenzi na? Atshi bo, kodwa ngomthetho wokukholwa.

²⁸ Ngoba sithi umuntu ulungisiswa ngokukholwa ngaphandle kwemisebenzi yomlayo.

²⁹ Kambe uNkulunkulu unguNkulunkulu wabaJuda kuphela na? Kasuye uNkulunkulu lowabezizwe na? Yebo, lowabezizwe,

³⁰ lokhu uNkulunkulu emunye. Uzakulungisisa abasokileyo ngokukholwa kwabo labangasokanga ngokukholwa.

³¹ Ngakhoke siyawenza umlayo ube yize ngokukholwa na? Phinde! Kodwa siyawuqinisa umlayo.