AbaseRoma 2 - iBhayibhili Elingcwele 1978

Bonke abaJuda labezizwe bazakuthonisiswa nguNkulunkulu

¹ Ngakhoke, wena muntu, kawulakuzilandulela, loba ungubani, lapho uthonisisa; ngoba ngalokho othonisisa ngakho omunye uyazilahla wena, ngoba wena othonisisayo uyakwenza khona lokho lawe.

² Siyazi ukuthi ukuthonisisa kukaNkulunkulu kwehlela ngokweqiniso abenza okunjalo.

³ Wena muntu othonisisa abenza okunjalo, ukwenza lawe, ucabanga ukuthi uzakuphepha ukuthonisisa kukaNkulunkulu na?

⁴ Kumbe uyabeyisa yini ubukhulu besihawu sakhe lobokubekezela lobesineke sakhe na? Kawazi yini ukuba isihawu sikaNkulunkulu sikudonsela ekuphendukeni na?

⁵ Kodwa ngobulukhuni benhliziyo yakho engaphendukiyo uzibekelela ulaka ngosuku lolaka, mhla kusambulwa ukuthonisisa okulungileyo kukaNkulunkulu

⁶ ozakunika lowo lalowo ngokwemisebenzi yakhe.

⁷ Labo abathi ngesineke bafune inkazimulo lodumo lokungabhubhi ngokwenza imisebenzi emihle, uzakubanika ukuphila okungapheliyo;

⁸ kodwa abalenkani bengalaleli iqiniso, belalela ukungalungi, bazakuzwa intukuthelo lolaka.

⁹ Usizi lokubandezeka kuzakwehlela abantu bonke abenza okubi, umJuda kuqala, lomGriki futhi;

¹⁰ kodwa inkazimulo lodumo lokuthula kuzakwehlela phezu kwabo bonke abenza okuhle, umJuda kuqala, lomGriki futhi.

¹¹ Ngoba uNkulunkulu kakhethi muntu;

¹² abonileyo bengelamlayo bazakubhubha bengelamlayo; lalabo abonileyo belomlayo bazakuthonisiswa ngomlayo.

¹³ Ngoba kakusibo abezwayo umlayo abangabalungileyo phambi kukaNkulunkulu, kodwa abenzayo umlayo yibo abazakulungisiswa.

¹⁴ Nxa abezizwe abangelawo umthetho besenza ngokwemvelo okungokomlayo, lanxa bona bengelawo umlayo, bangumlayo wabo ngokwabo,

¹⁵ ngoba babonakalisa ukuba umsebenzi womlayo ulotshiwe enhliziyweni zabo; lesazela sabo siyafakaza laso, lemicabango yabo ibasole loba ibavumele,

¹⁶ ngosuku uNkulunkulu azakuthonisisa ngalo imfihlakalo zenhliziyo zabantu ngoKristu Jesu; litsho njalo ivangeli lami.

Ukwahluleka komlayo lokokusoka

¹⁷ Kodwa wenake, uba usithi ungumJuda, uba uthemba umlayo, uzincoma ngoNkulunkulu,

¹⁸ uba usazi intando yakhe, uba ukhetha okulungileyo ngoba ufundisiwe umlayo,

¹⁹ uba uzithembile wena ukuthi ungumdonsi weziphofu, uyikukhanya kwabasemnyameni,

²⁰ ungumluleki wezithutha lomfundisi wezingane, lokhu ulakho ukuma kokwazi lokweqiniso emlayweni,

²¹ wenake ofundisa omunye, kawuzifundisi na? Wena otshumayela ukuba umuntu angebi, uyeba na?

²² Wena othi umuntu angafebi, uyafeba na? Wena onengwa yizithombe, uphanga amathempeli na?

²³ Wena ozincoma ngomlayo, udumaza uNkulunkulu ngokweqa umlayo na?

²⁴ Kulotshiwe ukuthi: Ibizo likaNkulunkulu liyahlanjazwa phakathi kwabezizwe ngenxa yenu.

²⁵ Ukusoka kambe kuyasiza uba ugcina umlayo; kodwa uba uweqa umlayo, ukusoka kwakho kuphenduka ukungasoki.

²⁶ Ngakhoke uba ongasokanga egcina izimiso zomlayo, ukungasoki kwakhe kakuyikubalwa ukuthi kuyikusoka na?

²⁷ Ng’khonake ongasokanga ngokwemvelo, egcina umlayo, uzakuthonisisa wena othi ulombhalo lokusoka weqe umlayo.

²⁸ Ngoba omgumJuda oqotho kasuye ongumJuda ngokwamehlo, lokusoka okuqotho kakusikho okubonwa emzimbeni.

²⁹ Kodwa umJuda oqotho ngulowo onguye ngaphakathi, lokusoka okuqotho kungokwenhliziyo, kungokomoya kungesikho okungokokulotshiweyo; ukuvezwa kwakhe kuvela kuNkulunkulu kungaveli ebantwini.