AbaseRoma 16 - iBhayibhili Elingcwele 1978

UPawuli ubingelela abazalwane

¹ Ngiyamveza kini uFebe, isikhonzikazi sebandla laseKenikreya,

² ukuze limamukele eNkosini njengokufanele abangcwele, limsize ngakho konke akucela kini; ngoba yena usizile abanengi, lami uqobo.

³ Bingelelani uPriska loAkwila, izisebenzi kanye lami kuKristu Jesu,

⁴ abaqonda ingozi ngenxa yokusila kwami, engibabongayo, kungesimi ngedwa kodwa lamabandla wonke abezizwe.

⁵ Bingelelani lebandla elisendlini yabo. Bingelelani uEpenetu, umngane wami, ongowokuqala ukuphendukela kuKristu eAsiya.

⁶ Bingelelani uMariya owalisebenzela kakhulu.

⁷ Bingelelani uAnderoniku loJuniya abayizihlobo zami lezibotshwa kanye lami; bangabadumileyo phakathi kwabaphostoli, babekuKristu ngaphambi kwami.

⁸ Bingelelani uAmpiliyatu, umngane wami eNkosini.

⁹ Bingelelani uOrbanu isisebenzi kanye lathi kuKristu, loSitako umngane wami.

¹⁰ Bingelelani uApele, othembekileyo kuKristu. Bingelelani labo abendlu kaAristobulu.

¹¹ Bingelelani uHerodiyoni isihlobo sami. Bingelelani abendlu kaNarkisu abaseNkosini.

¹² Bingelelani uTrifina loTrifosa abasebenzela iNkosi. Bingelelani uPersisi othandekayo owayisebenzela kakhulu iNkosi.

¹³ Bingelelani uRufusi okhethiweyo eNkosini, lonina ongumama.

¹⁴ Bingelelani uAsinkiritu loFileko, loHerme, loPatroba, loHermasi, labazalwane abalabo.

¹⁵ Bingelelani oFilologu loJuliya, loNerusi lodadewabo, loOlimpa, labangcwele bonke abalabo.

¹⁶ Bingelelanani ngokwangana okungcwele. Wonke amabandla kaKristu ayalibingelela.

¹⁷ Ngiyalincenga, bazalwane, ukuba liqaphele ababanga ukuxabana lezikhubekiso bephambene lesifundiso elafundiswa sona. Baxwayeni bona,

¹⁸ ngoba abanjalo kabakhonzi iNkosi yethu uKristu, kodwa bakhonza inkanuko zabo; ngamazwi langokulalisa ngolimi bakhohlisa izinhliziyo zabangelacala.

¹⁹ Bonke sebezwile ngokulalela kwenu; ngakhoke ngiyathokoza ngani; kodwa ngithanda ukuba lihlakaniphe kokuhle, libe ngabangahlakaniphanga kokubi.

²⁰ UNkulunkulu uzakumchoboza masinyane uSathane ngaphansi kwenyawo zenu.

²¹ UTimothi isisebenzi kanye lami uyalibingelela; loLukiyu loJasoni loSosipatro izihlobo zami, bayalibingelela.

²² Mina Tertiyo engilobe lincwadi ngiyalibingelela eNkosini.

²³ UGayusi, engingenise kuye mina lebandla lonke, uyalibingelela. UErastu, umphathisikhwama somuzi, lomzalwane uKwarto, bayalibingelela. [

²⁴ Umusa weNkosi yethu uJesu Kristu kawube lani lonke. Ameni.]

Isicino

²⁵ Kuye olamandla okuliqinisa ngokwevangeli lami langokutshunyayelwa kukaJesu Kristu, langokwambulwa kwemfihlakalo eyayifihliwe ngezikhathi zakade,

²⁶ kodwa isibonakalisiwe khathesi, yaziswa ezizweni zonke ngemibhalo yabaprofethi njengomlayo kaNkulunkulu ongapheliyo ukuze zilalele ngokukholwa,

²⁷ kuNkulunkulu olokwazi yena yedwa kakube ubukhosi ngoJesu Kristu kuze kube nininini. Ameni.