AbaseRoma 15 - iBhayibhili Elingcwele 1978

¹ Thina esilamandla sifanele ukuthwala ubuthakathaka babangelamandla, singazithokozisi thina.

² Yilowo lalowo wethu kathokozise umakhelwana wakhe, amenzele okuhle lokuzakumakha.

³ Ngoba uKristu kazithokozisanga yena, kodwa kunjengokuba kulotshiwe ukuthi: Ukuthuka kwabakuthukayo kwehlela phezu kwami.

⁴ Ngoba konke okwalotshwa ngaphambili kwalotshelwa ukufundiswa kwethu, ukuze ngokubekezela langenduduzo yemibhalo sibe lethemba.

⁵ Kungathi uNkulunkulu wokubekezela lenduduzo angalipha ukuba libe nhliziyonye njengoKristu Jesu,

⁶ ukuze nganhliziyonye lomlomo munye limdumise uNkulunkulu uYise weNkosi yethu uJesu Kristu.

⁷ Ngakhoke yamukelanani njengalokhu uKristu wasamukela, ukuze kudunyiswe uNkulunkulu.

⁸ Ngoba ngithi uKristu waba yinceku yabasokileyo ukubonakalisa iqiniso likaNkulunkulu, ukuba aqinise izithembiso ezanikwa okhokho,

⁹ lokuba abezizwe bamdumise uNkulunkulu ngenxa yesihawu sakhe; njengokulotshiweyo ukuthi: Ngakhoke ngizakukudumisa phakathi kwabezizwe ngihubele ibizo lakho.

¹⁰ Lokuthi: Thokozani lina bezizwe kanye labantu bakhe.

¹¹ Lokuthi: Dumisani iNkosi lina bezizwe lonke; abantu bonke kabayidumise.

¹² Futhi uIsaya uthi: Kuzakuba khona impande kaJese, yena owaphakanyiswa ukubusa abezizwe, abezizwe bazakuthembela kuye.

¹³ Kungathi uNkulunkulu wethemba angaligcwalisa ngentokozo yonke langokuthula konke ekukholweni kwenu, ukuze ngamandla kaMoya oNgcwele likhule ethembeni.

UPawuli uchasisa umsebenzi wakhe

¹⁴ Mina ngokwami nganelisiwe ngani, bazalwane, ukuthi lina ligcwele okuhle, ligcwalisiwe yikwazi konke, lilamandla futhi okwelulekana.

¹⁵ Kodwa ngililobele ngesibindi ukulikhumbuza ngezinto ezinye ngenxa yomusa engiwuphiweyo nguNkulunkulu,

¹⁶ wokuba ngibe yisikhonzi sikaKristu Jesu kwabezizwe, ngikhonze ngevangeli likaNkulunkulu njengompristi, ukuze ukunikela kwami abezizwe kwamukeleke, kwenziwe kube ngcwele nguMoya oNgcwele.

¹⁷ Ngakhoke kuKristu Jesu ngilokuzincoma ngomsebenzi wami engiwenzela uNkulunkulu.

¹⁸ Kangilasibindi sokukhuluma ngolutho, kuphela ngezinto uKristu azisebenza ngami ukuze kube khona ukulalela kwabezizwe ngelizwi langesenzo,

¹⁹ langamandla ezibonakaliso lezimangaliso, langamandla kaMoya oNgcwele. Ngalokho ngitshumayele ivangeli likaKristu ngokupheleleyo kusukela eJerusalema kwaze kwafika eIliriku.

²⁰ Ngokunjalo ngiqonde ukutshumayela ivangeli lapho angakaziwa khona uKristu, ukuze ngingakhi phezu kwesisekelo somunye;

²¹ kodwa njengokulotshiweyo ukuthi: Abangatshelwanga ngaye bazakubona, labangezwanga bazakuqedisisa.

UPawuli ukhuluma ngokuya eRoma

²² Ngenxa yalokho ngavinjelwa kanengi ukuza kini.

²³ Kodwa khathesi, lokhu ngingaselandawo kulamazwe, futhi sekuyiminyaka eminengi ngilangatha ukuza kini,

²⁴ ngizadlula kini lapho ngisiya eSpaniya; ngoba ngithemba ukuthi ngizakulibona ekudluleni kwami, lokuthi, sengithokozile kanye lani okwesikhatshana, lizakungidlulisela phambili ukuya eSpaniya.

²⁵ Kodwa khathesi, ngisaya eJerusalema ukusa okokusiza abangcwele.

²⁶ Ngoba kwaba kuhle kwabaseMakedoniya labaseAkaya ukwenzela abayanga kwabangcwele baseJerusalema umnikelo othile.

²⁷ Yebo, kwaba kuhle kibo; ngoba lembala balomlandu kibo; ngoba uba abezizwe behlanganyela kanye labo ezintweni zabo zokomoya, abezizwe balomlandu futhi wokubasebenzela ezintweni zokomzimba.

²⁸ Ngakho nxa sengikuqedile lokhu, ngibanikile leziphiwo, ngizakusuka ngiye eSpaniya, ngidlule ngakini;

²⁹ ngiyazi ukuthi nxa ngisiza kini ngizakufika ngilesibusiso esipheleleyo sikaKristu.

³⁰ Ngiyalincenga, bazalwane, ngayo iNkosi yethu uJesu Kristu langothando lukaMoya, ukuba lizame kanye lami ngokungikhulekela kuNkulunkulu,

³¹ ukuze ngiphephe kwabangakholwayo baseJudiya lokuba umsebenzi engiya ngawo eJerusalema wamukeleke kibo abangcwele,

³² ukuba ngentando kaNkulunkulu ngize kini ngokuthokoza, ngivuseleleke phakathi kwenu.

³³ Kungathi uNkulunkulu wokuthula angaba lani lonke. Ameni.