AbaseRoma 14 - iBhayibhili Elingcwele 1978

Indlela yokuphatha ababuthakathaka ekukholweni

¹ Lowo obuthakathaka ekukholweni mamukeleni, kodwa kungabi ngokuphikisana laye.

² Omunye ukholwa ukuthi angadla konke, kodwa obuthakathaka udla imibhida yodwa.

³ Lowo odlayo kangamdeleli ongadliyo; ongadliyo kangamsoli odlayo; ngoba uNkulunkulu umamukele.

⁴ Ungubani wena osola inceku yomunye na? Ngoba ukuma ingabe ukuwa kwayo kuyindaba yeNkosi yayo; izakuma isibili, ngoba iNkosi ilamandla okuyimisa.

⁵ Omunye wazisa olunye usuku kulolunye, omunye wazisa insuku zonke. Kakube yilowo lalowo aqiniseke engqondweni yakhe.

⁶ Ohlonipha usuku, uluhlonipha ngenxa yeNkosi; odlayo, udla ngenxa yeNkosi, ngoba ubonga uNkulunkulu; ongadliyo, wenza njalo ebonga uNkulunkulu laye.

⁷ Ngoba kakho phakathi kwethu ozisilela yena, kakho lozifela yena;

⁸ ngoba uba siphila, siphilela iNkosi; uba sisifa, sifela iNkosi. Ngakhoke loba siphila loba sisifa, singabeNkosi.

⁹ Ngenxa yalokhu uKristu wafa, wabuya waphila, ukuba abe yiNkosi yabafileyo labaphilayo.

¹⁰ Wenake, umsolelani umzalwane wakho na? Futhi umdelelelani umzalwane wakho na? Ngoba sonke sizakuma phambi kwesihlalo sokuthonisisa sikaNkulunkulu.

¹¹ Ngoba kulotshiwe ukuthi: Lokhu ngiphila, itsho iNkosi, wonke amadolo azaguqa phambi kwami, lendimi zonke zizakudumisa uNkulunkulu.

¹² Ngakhoke ilowo lalowo wethu uzakuziphendulela kuNkulunkulu.

¹³ Ngakho kasingabe sisasolana; kodwa asizimisele ukuba singambekeli umzalwane isikhubekiso loba ulutho lokumwisa.

¹⁴ Ngiyazi ngeqiniso eNkosini uJesu ukuthi kakulalutho olungcolileyo ngokwalo; kodwa kulowo othi lungcolile, kuye lungcolile.

¹⁵ Uba umzalwane wakho elinyazwa yikudla kwakho, kawusahambi ngothando. Ungambhubhisi ngokudla kwakho lowo amfelayo uKristu.

¹⁶ Ngakho okuhle kini kakungahlanjazwa.

¹⁷ Ngoba umbuso kaNkulunkulu kawusikho ukudla lokunatha, kodwa uyikulunga lokuthula lokuthokoza eMoyeni oNgcwele.

¹⁸ Okhonza uKristu kulokhu uyamukeleka kuNkulunkulu, uthandekile ebantwini.

¹⁹ Ngakho asidingisise izinto eziletha ukuthula lokwakhisana.

²⁰ Ungawuchithi umsebenzi kaNkulunkulu ngenxa yokudla. Konke kuhlambulukile, kanti kubi kulowomuntu okhubekisa abanye ngokudla kwakhe.

²¹ Kuyinto elungileyo ukungadli inyama lokunganathi iwayini loba ukungenzi lutho olukhubekisa umzalwane wakho.

²² Ukukholwa olakho kakwaziwe nguwe loNkulunkulu. Ubusisiwe lowomuntu ongathandabuzi ngalokho akukhethayo!

²³ Kodwa othandabuzayo, uba esidla, ulahliwe, ngoba engadli ngokukholwa; konke okungaveli ekukholweni kuyisono.