AbaseRoma 13 - iBhayibhili Elingcwele 1978

Mayelana lokulalela amakhosi

¹ Kakube yilowo lalowo azehlisele ngaphansi kwamandla ombuso. Ngoba kakukho amandla ombuso angaveli kuNkulunkulu; lamandla akhona amiswe nguye.

² Ngakhoke omelana lamandla ombuso umelana lesimiso sikaNkulunkulu; lalabo abamelana lawo bazakwamukeliswa ukulahlwa.

³ Ngoba ababusi kabesabeki kwabenza okuhle, kodwa besabeka kwabenza okubi. Uyathanda ukungesabi ababusayo na? Ngakho yenza okuhle, uzakubongwa yibo;

⁴ ngoba bayizinceku zikaNkulunkulu zokukwenzela okuhle. Kodwa uba usenza okubi, yesaba, ngoba umkhonto kabawuphatheli ize. Bayizinceku zikaNkulunkulu zokwehlisela ulaka lwakhe phezu kowenza okubi.

⁵ Ngalokhoke ufanele uzehlise, kungabi ngenxa yolaka kuphela, kodwa langenxa yesazela.

⁶ Ngoba ngenxa yalokho lithela umthelo; ngoba ababusayo bayizinceku zikaNkulunkulu, ezikhuthalela khona lokho.

⁷ Phanini bonke okubafaneleyo; thelani umthelo kofanele umthelo, limkhokhelele ofanele inkokhelo, limhloniphe ofanele inhlonipho, limdumise ofanele ukudunyiswa.

Ukuthanda abazalwane

⁸ Lingabi lamlandu komuntu, kuphela owokuthandana; ngoba othanda umakhelwana wakhe ugcwalisile umlayo.

⁹ Ngoba limithetho ethi: Ungafebi, ungabulali, ungebi, ungabi lamhawu; loba kukhona omunye umlayo, yonke ihlanganiswa kulelilizwi elithi: Wothanda umakhelwana wakho njengalokhu uzithanda wena.

¹⁰ Uthando kalwenzi okubi kumakhelwana; ngakho uthando luyikugcwaliseka komlayo.

Ukuhamba ekukhanyeni

¹¹ Langaphandle kwalokhu yazini ukuthi lesisikhathi sinjani; yisikhathi sokuba livuke ebuthongweni. Ngoba ukusiliswa kwethu sekusondele kithi khathesi kulalesosikhathi esaqala ukukholwa ngaso.

¹² Ubusuku sebudlulile, sekuzakusa. Ngakhoke asilahle imisebenzi yomnyama, sihlome izikhali zokukhanya.

¹³ Asihambe ngokufaneleyo njengasemini, singahambi ngokuminza langokudakwa, langokufeba, langokungabi lanhloni, langokuxabana, langomona.

¹⁴ Kodwa yambathani iNkosi uJesu Kristu; lingananzeleli ngokusuthisa inkanuko zomzimba.