AbaseRoma 12 - iBhayibhili Elingcwele 1978

Ukuhamba okungcwele

¹ Ngakhoke, bazalwane, ngiyalincenga ukuba, ngesihawu sikaNkulunkulu, linikele imizimba yenu ibe ngumnikelo ophilileyo, ongcwele, owamukelekayo kuNkulunkulu, kube yikukhonza kwenu okuqotho.

² Lingalingisi lumhlaba, kodwa liphendulwe ngokwenziwa zibentsha ingqondo zenu, ukuze libonisise okuyintando kaNkulunkulu, lokulungileyo, lokwamukelekayo, lokupheleleyo.

Ukuthobeka lokuphila kwamaKristu

³ Ngomusa engiwuphiweyo ngitsho kulowo lalowo wenu ukuba angacabangi ukuthi mkhulu kulalokho afanele ukucabanga khona, kodwa acabange ngokuqonda, njengalokhu uNkulunkulu abele ilowo lalowo isilinganiso sokukholwa.

⁴ Ngoba njengokuba silezitho ezinengi emzimbeni munye, kodwa izitho zonke kazilamsebenzi munye,

⁵ kunjalo thina esibanengi, singumzimba munye kuKristu; siyizitho omunye komunye.

⁶ Sileziphiwo ezehlukeneyo njengomusa esiwuphiweyo; uba isiphiwo siyikutshumayela, asitshumayele ngesilinganiso sokukholwa kwethu;

⁷ uba siyikukhonza, kakube senkonzweni. Ofundisayo kasebenzise isiphiwo sakhe ekufundiseni,

⁸ lolayayo kasisebenzise ekulayeni; ophanayo kanike ngesihle; osizayo kasize ngokutshiseka; olesihawu kakwenze ngentokozo.

⁹ Uthando lwenu kalube qotho. Zondani okubi, libambelele kokulungileyo.

¹⁰ Thandanani ngothando lobuzalwane, liziqhenye ekuhloniphaneni.

¹¹ Khuthalani lingadinwa; livuthe emoyeni; likhonze iNkosi.

¹² Thokozani ethembeni; libekezele ekuhluphekeni; liphikelele ekukhulekeni.

¹³ Bapheni abangcwele ekusweleni kwabo; liphathe kuhle izihambi.

¹⁴ Babusiseni abalizingelayo; busisani, lingabathuki.

¹⁵ Thokozani kanye labathokozayo, likhale labakhalayo.

¹⁶ Hlalisanani kuhle, lingazikhukhumezi, kodwa lihlangane labathobileyo, lingazitshayi abahlakaniphileyo.

¹⁷ Lingaphindiseli muntu okubi ngokubi; linakane okudumisekayo phambi kwabantu bonke.

¹⁸ Uba kungenzeka, zimiseleni ukuhlalisana ngokuthula labantu bonke.

¹⁹ Lina bathandiweyo, lingaziphindiseli, kodwa yekelelani ulaka lukaNkulunkulu, ngoba kulotshiwe ukuthi: Ngokwami ukuphindisela, ngizakuphindisela, kutsho iNkosi.

²⁰ Kodwa kulotshiwe futhi ukuthi: Uba isitha sakho silambile, siphe ukudla, uba somile, sinathise; ngoba ngokwenza njalo uzakumenza ayangeke kakhulu.

²¹ Unganqotshwa ngokubi, kodwa nqoba okubi ngokuhle.