AbaseRoma 11 - iBhayibhili Elingcwele 1978

AbakoIsrayeli abakhethiweyo nguNkulunkulu bayasiliswa

¹ Ngalokhoke ngithi: UNkulunkulu ubalahlile abantu bakhe na? Phinde! Ngoba mina ngokwami ngingumIsrayeli, ngingowenzalo kaAbrahama lowesizwe sikaBenjamini.

² UNkulunkulu kabalahlanga abantu bakhe abazi ngaphambili. Kalazi yini ukuthi umbhalo uthini ngoElija ukuba esola uIsrayeli kuNkulunkulu,

³ esithi: Nkosi, bababulele abaprofethi bakho, badilizile ama‐altare akho, yimi ngedwa engiseleyo, sebefuna ukungibulala.

⁴ Kodwa uNkulunkulu emphendula wathini? Wathi: Ngizilondolozele mina amadoda azinkulungwane eziyisikhombisa angaguqanga ngamadolo kuBali.

⁵ Kunjaloke kukhona langalesisikhathi ingxenye yabo abaseleyo ngokukhetha komusa.

⁶ Kodwa uba kungomusa, kakusayi ngemisebenzi; uba kungenjalo, umusa kawuseyiwo umusa.

⁷ Phoke? Lokho uIsrayeli ayekufuna kakufumananga, kanti abakhethiweyo bakufumana; labanye benziwa baba lukhuni;

⁸ njengokulotshiweyo ukuthi: UNkulunkulu wabanika umoya wobuthongo, lamehlo okungaboni, lendlebe zokungezwa kuze kube lamuhla.

⁹ LoDavida uthi: Ukudla kwabo kakube ngumjibila lesifu, lesikhubekiso lempindiselo kibo;

¹⁰ amehlo abo kawafiphale ukuba bangaboni, kugotshwe umhlane wabo kokuphela.

¹¹ Ngakho ngithi: Bakhubeka ukuba bawe na? Phinde! Kodwa ngesiphambeko sabo ukusilisa sekufikile kwabezizwe ukumvusela uIsrayeli umona.

¹² Kodwa uba isiphambeko sabo sinothisa umhlaba, lokwahluleka kwabo kunothisa abezizwe, ukuphelela kwabo kuzaletha okukhulu kangakanani.

Ukusilisa kwafika kwabezizwe

¹³ Ngikhuluma lani lina bezizwe. Njengalokho mina ngingumphostoli wabezizwe ngikhulisa inkonzo yami,

¹⁴ ukuba mhlawumbe ngibavusele umona abakithi, ngisilise abanye babo.

¹⁵ Ngoba uba ukulahlwa kwabo kuyikubuyiswa komhlaba, ukwamukelwa kwabo kungaba yini na? Kungaba yikuphila kwabafileyo!

¹⁶ Uba ingxenye yokuqala yenhlama ingcwele, lenhlama yonke injalo; uba impande ingcwele, lengatsha zinjalo.

¹⁷ Kodwa uba kwaphulwe ezinye ingatsha, lawe oyisihlahla seoliva sasegangeni waxhunyelelwa endaweni yazo ukuba uhlanganyele lazo impande lomhluzi wesihlahla,

¹⁸ ungazincomi phezu kwengatsha. Uba uzincoma, khumbula ukuba kasuwe othwele impande, kodwa impande zithwele wena.

¹⁹ Uzakuthi wena: Ingatsha zaphulwa ukuba mina ngixhunyelwe.

²⁰ Kulungile; zaphulwa ngokungakholwa kwabo; wena umi ngokukholwa. Ngakho ungazikhukhumezi, kodwa yesaba;

²¹ ngoba uba uNkulunkulu engayekelanga ingatsha zemvelo, lawe kayikukuyekela.

²² Khangelake ububele lobukhali bukaNkulunkulu; ubukhali kulabo abawayo, kodwa kuwe kukhona ububele uba uhlala ebubeleni; uba kungenjalo, uzakuqunywa lawe.

²³ Lalabo, uba beyekela ukungakholwa kwabo, bazakuxhunyelwa, ngoba uNkulunkulu ulamandla okubaxhuma.

²⁴ Ngoba uba wena waqunywa esihlahleni seoliva sasegangeni ngemvelo, waxhunyelelwa ngokuphambene lemvelo esihlahleni seoliva esihlanyelweyo, ikakhulu labo beyizingatsha zemvelo bazakuxhunyelelwa esihlahleni sakibo.

UNkulunkulu ulesihawu kibo bonke abantu

²⁵ Ngithanda ukuba lazi limfihlakalo, bazalwane, funa lizitshaye abahlakaniphileyo, ukuthi ingxenye kaIsrayeli yehlelwe yibulukhuni kuze kungene abezizwe ngokupheleleyo

²⁶ andubana uIsrayeli wonke ezakusiliswa, njengokulotshiweyo ukuthi: Kuzakuvela eZiyone uMkhululi, asuse ububi kuJakobe;

²⁷ yilesi isivumelwano engizakubanika sona, lapho ngisusa izono zabo.

²⁸ Ngokwevangeli bayizitha zikaNkulunkulu ngenxa yenu; kodwa ngokukhetha kwakhe bangabathandiweyo ngenxa yabokhokho.

²⁹ Ngoba iziphiwo zikaNkulunkulu lokubiza kwakhe kakulakuphenduka.

³⁰ Njengalokhu lina kade lingamlaleli uNkulunkulu, kodwa selihawukelwe ngenxa yokungalaleli kwabo,

³¹ ngokunjalo lalabo kabalalelanga ukuze ngesihawu elenzelwe sona bahawukelwe khathesi.

³² Ngoba uNkulunkulu ubenzile bonke abantu ukuba bangalaleli, ukuze abe lesihawu kibo bonke.

³³ Yeka ukuzika kwenotho, lokuhlakanipha, lolwazi lukaNkulunkulu! Yeka izahlulelo zakhe ezingaphenyekiyo lendlela zakhe ezingalandelekiyo!

³⁴ Ngoba kuthiwa: Ngubani owake wayazi ingqondo yeNkosi na? Ngubani owaba ngumluleki wayo na?

³⁵ Ngubani owake wamnika ulutho ukuba alubuyiselwe na?

³⁶ Ngoba konke kuvela kuye, kungaye, kuya kuye; kakube kuye ubukhosi kuze kube nininini. Ameni.