AbaseRoma 10 - iBhayibhili Elingcwele 1978

¹ Bazalwane, ukufisa kwenhliziyo yami lokukhuleka kwami kuNkulunkulu ngabakithi kuyikuba basiliswe.

² Ngiyabafakazela ukuthi batshisekela uNkulunkulu, kodwa ukutshiseka kwabo kakulakwazi.

³ Ngoba kabakwazi ukulunga okuvela kuNkulunkulu, kodwa bafuna ukumisa okwabo; kabazehliseli ngaphansi kokulunga kukaNkulunkulu.

⁴ Ngoba uKristu uyawuqeda umlayo, alethele bonke abakholwayo ukulunga.

Ukulunga kukaNkulunlulu kungokwabo bonke abantu

⁵ UMose uloba ukuthi lowo owenza ukulunga okungomlayo uzakuphila ngakho.

⁶ Kodwa ukulunga okungokukholwa kuthi: Ungatsho enhliziyweni yakho ukuthi: Ngubani ozakwenyukela ezulwini? — okuyikuthi ukumehlisa uKristu —

⁷ lokuthi: Ngubani ozakwehlela emgodini ongelamkhawulo? — okuyikuthi ukumkhuphula uKristu kwabafileyo —

⁸ Kodwa kuthini na? Kuthi: Ilizwi liseduze lawe, lisemlonyeni lasenhliziyweni yakho; okutsho ilizwi lokukholwa esilitshumayelayo.

⁹ Ngoba uba uvuma ngomlomo wakho ukuthi uJesu uyiNkosi, ukholwa enhliziyweni yakho ukuthi uNkulunkulu wamvusa kwabafileyo, uzasiliswa.

¹⁰ Ngoba ukukholwa okusenhliziyweni kuletha ukulunga; lokuvuma ngomlomo kuletha ukusiliswa.

¹¹ Umbhalo uthi: Lowo okholwa kuye kayikuyangeka.

¹² Ngakho kakukho ukwahlukana phakathi komJuda lomGriki, ngoba iNkosi yona yiNkosi yabo bonke, inothele bonke abakhuleka kuyo.

¹³ Ngoba kuthiwa: Bonke abazakukhuleka ebizweni leNkosi bazakusiliswa.

¹⁴ Kodwa bazakukhuleka kuyo kanjani abangakholwanga kuyo na? Futhi, bazakukholwa kuyo kanjani abangezwanga ngayo na? Futhi, bazakuzwa kanjani bengelamtshumayeli na?

¹⁵ Bazakutshumayela kanjani uba bengathunywa na? Njengokulotshiweyo ukuthi: Yeka ubuhle bezinyawo zabo abatshumayela izindaba ezinhle!

¹⁶ Kodwa kabalilalelanga bonke ivangeli; ngoba uIsaya uthi: Nkosi, ngubani owakholwa ilizwi lethu na?

¹⁷ Ngakhoke ukukholwa kuvela ngokuzwa, lokuzwa kuvela ngelizwi likaKristu.

¹⁸ Kodwa ngithi: Kabezwanga na? Impela, bezwa. Ngoba kuthiwa: Ilizwi labo liphumele emhlabeni wonke, lamazwi abo aphumele emikhawulweni yomhlaba.

¹⁹ Kodwa ngibuya ngithi: UIsrayeli kaqedisisanga na? Kuqala uMose uthi: Mina ngizakulivusela umona ngabo abangesiso isizwe, ngilithukuthelise ngesizwe esingelangqondo.

²⁰ LoIsaya laye uthi: Ngafunyanwa yilabo abangangidinganga; ngabonakala kibo abangabuzanga ngami.

²¹ Kodwa ngoIsrayeli uthi: Usuku lonke ngelulela izandla zami kibo abantu abangalaleliyo labaphikayo.