AbaseKholose 4 - iBhayibhili Elingcwele 1978

¹ Makhosi, yenzelani izigqili zenu okulungileyo lokufaneleyo, lazi ukuthi lani lileNkosi ezulwini.

² Khuthalani ekukhulekeni, lilinde kukho, libonge.

³ Lisikhulekele lathi ukuba uNkulunkulu asivulele ithuba lelizwi ukuba sitshumayele imfihlakalo kaKristu engibotshwe ngenxa yayo,

⁴ ukuze ngiyibonakalise njengalokhu ngifanele ukukhuluma.

⁵ Hambani ngokuhlakanipha mayelana labangaphandle, lisebenzise amathuba wonke.

⁶ Ukukhuluma kwenu kakube lomusa, kungabi duma, ukuze likwazi ukubaphendula bonke ngokufaneleyo.

Ukubingelela kwabazalwane. Isicino

⁷ Konke okumaqondana lami uzakulitshela uTikiko, umzalwane othandekayo lesikhonzi esithembekileyo eNkosini.

⁸ Ngimthumile kini ngakho lokhu ukuze lazi ukuthi sihlezi kanjani lokuba aduduze inhliziyo zenu.

⁹ Ngithume uOnesimo kanye laye, umzalwane othembekileyo lothandekayo, ongomunye wakini. Bazakulazisa ngakho konke okulapha.

¹⁰ Uyalibingelela uAristako oyisibotshwa kanye lami; loMarko umzawakhe kaBarnabasi, elalaywa ngaye ukuthi uba efika kini, mamukeleni,

¹¹ loJoshuwa othiwa nguJustusi. Yibo bodwa abokusoka abasebenzela umbuso kaNkulunkulu kanye lami, abakade beyinduduzo kimi.

¹² Uyalibingelela uEpafra omunye wakini, inceku kaKristu Jesu; uyalikhulekela kakhulu ngezikhathi zonke ukuba lime liphelele liqine entandweni yonke kaNkulunkulu.

¹³ Ngoba ngingamfakazela ukuthi ulisebenzele kakhulu lina, labaseLawodikeya, labaseHiyerapoli.

¹⁴ Uyalibingelela uLuka inyanga ethandekayo, loDema.

¹⁵ Bingelelani abazalwane baseLawodikeya, loNimfa kanye lebandla elisemzini wakhe.

¹⁶ Nxa isifundiwe lincwadi phakathi kwenu kayifundwe lasebandleni labaseLawodikeya; lani liyifunde futhi leyo evela eLawodikeya.

¹⁷ Limtshele uArkipho lithi: Qaphela inkonzo oyamukele eNkosini, ukuba uyiphelelise.

¹⁸ Mina Pawuli ngiyaloba lokhukubingelela ngesami isandla. Khumbulani izibopho zami. Umusa kawube kini.