AbaseKholose 3 - iBhayibhili Elingcwele 1978

Ukunakana ngokwaphezulu lokubulala inkanuko zasemhlabeni

¹ Ngakhoke uba livusiwe kanye loKristu, funani okwaphezulu, lapho akhona uKristu ehlezi ngakwesokunene sikaNkulunkulu.

² Nakanani ngokwaphezulu, linganakani ngokwasemhlabeni.

³ Ngoba lafa, ukuphila kwenu kufihliwe loKristu kuNkulunkulu.

⁴ Lapho esebonakaliswa uKristu oyikuphila kwethu, lani lizakubonakaliswa kanye laye enkazimulweni.

⁵ Ngakhoke bulalani inkanuko zenu zasemhlabeni, ukuphinga lokungcola, inkanuko ezimbi, ukufisa okubi, lomhawu oyikukhonza izithombe.

⁶ Lezizinto zibanga ulaka lukaNkulunkulu.

⁷ Lalihamba kuzo lani lapho lalisahlezi kuzo.

⁸ Kodwa khathesi lahlani konke lokhu, ulaka, ukuthukuthela, inzondo, ukuhlambaza, lokukhuluma okubi ngomlomo wenu.

⁹ Lingaqambelani amanga, lokhu selimlahlile umuntu omdala lezenzo zakhe,

¹⁰ selambethe omutsha owenziwa kutsha ekwazini ukuze afuze lowo owamenzayo.

¹¹ Lapho kakukho umGriki lomJuda, osokileyo longasokanga, owezizwe lomSikethiya, isigqili lokhululekileyo; kodwa uKristu uyikho konke, ukibo bonke.

¹² Ngakhoke, njengabakhethiweyo bakaNkulunkulu abangcwele labathandekayo, yambathani ububele lesihawu, lokuzithoba, lobumnene, lokubekezela,

¹³ libekezelelane, lithethelelane, uba umuntu elensolo komunye. Njengoba iNkosi yalithethelela, yenzani njalo lina.

¹⁴ Phezu kwakho konke lokhu yambathani uthando oluyisibopho sokuzwana okupheleleyo.

¹⁵ Kakubuse enhliziyweni zenu ukuthula kukaKristu, elabizelwa kukho emzimbeni munye; futhi wobani ngababongayo.

¹⁶ Ilizwi likaKristu kalihlale phakathi kwenu ngokupheleleyo. Fundisanani lilayane ngokuhlakanipha konke. Hlabelelani amahubo lezihlabelo lengoma zokomoya, libonge uNkulunkulu enhliziyweni zenu.

¹⁷ Konke elikwenzayo, loba kungelizwi loba kungezenzo, kwenzeni konke ebizweni leNkosi uJesu, libonge uNkulunkulu uYise ngaye.

Ukuphathana kwabomuzi

¹⁸ Bafazi, zehliseleni ngaphansi kwamadoda enu njengokufanele iNkosi.

¹⁹ Madoda, thandani omkenu, lingabi lolunya kibo.

²⁰ Bantwana, lalelani abazali benu ezintweni zonke, ngoba lokhu kuyayithokozisa iNkosi.

²¹ Bobaba, lingabathukuthelisi abantwana benu ukuba bangadani.

²² Zigqili, lalelani ezintweni zonke labo abangamakhosi enu emhlabeni, kungesikho ngokubamba amehlo njengabathokozisa abantu, kodwa ngobuqotho benhliziyo, liyesabe iNkosi.

²³ Konke elikwenzayo kwenzeni ngenhliziyo kungathi likwenzela iNkosi, atshi abantu,

²⁴ lazi ukuthi lizakwamukela umvuzo welifa eNkosini. UKristu yiyo iNkosi eliyikhonzayo.

²⁵ Owenza okubi uzakwamukeliswa okubi akwenzileyo; uNkulunkulu kabandlululi muntu.