AbaseKholose 2 - iBhayibhili Elingcwele 1978

¹ Ngoba ngithanda ukuba lazi ukuthi ngilizamela ngokungakanani lina kanye labaseLawodikeya, labo bonke abangakaze bangibone.

² Inhliziyo zabo kaziduduzeke; kabahlanganiswe othandweni; kababe lenotho yonke yokuqedisisa okupheleleyo, bazisise imfihlakalo kaNkulunkulu enguKristu,

³ okufihlwe kuye inotho yonke yokuhlakanipha leyokwazi.

⁴ Ngilitshela lokhu ukuze lingakhohliswa muntu ngamazwi ayengayo.

⁵ Ngoba lanxa ngingekho ngokomzimba, kanti ngikhona kini ngokomoya, ngithokoza lapho ngibona ukulungelana kwenu lokuqina kokukholwa kwenu kuKristu.

Ukuhlala kuKristu

⁶ Ngakhoke njengalokho limamukele uKristu Jesu iNkosi, hlalani kuye,

⁷ ligxilile, lakhiwe kuye, liqiniswe ekukholweni njengokufundiswa kwenu, lande ekubongeni.

⁸ Xwayani funa kube khona olithumbayo ngokuhlakanipha langokukhohlisa okuyize, okungokwemvelo yabantu langokwempi yemimoya yalumhlaba, kungesikho ngokukaKristu.

⁹ Ngoba kuhlala kuye ngomzimba ukuphelela konke kobuNkulunkulu;

¹⁰ liphelelisiwe kuye. Uyinhloko yokubusa konke lamandla.

¹¹ Lasokelwa kuye ngokusoka okungenziwanga ngezandla, kodwa okulikhulula emandleni omzimba; lokhu kuyikusoka kukaKristu.

¹² Lambelwa kanye laye ngobhaphathizo, ngalo futhi lavuswa kanye laye ngokukholwa ngamandla kaNkulunkulu amvusa kwabafileyo.

¹³ Lanike, lanxa belifile ngeziphambeko langokungasoki kwenyama yenu, uNkulunkulu ulenze laba ngabaphilayo kanye loKristu. Usithethelele iziphambeko zethu zonke;

¹⁴ uyicimile incwadi yemilandu emelana lathi ngemilayo yayo; wayisusa ngokuyibethela esiphambanweni;

¹⁵ wabamuka izikhali ababusi labalamandla, wabaveza obala ebayangisa, wabanqoba ngesiphambano.

¹⁶ Ngakho kakungabi khona umuntu olilahla ngokudla langokunatha, loba langemikhosi, loba ngokuthwasa kwenyanga, loba ngeSabatha.

¹⁷ Lezizinto ziyisithunzi nje salokho okuzayo; kodwa umzimba oyiwo ngokaKristu.

Ukuxwayisa ngezifundiso zamanga

¹⁸ Kakungabi khona umuntu olamuka umvuzo wenu, ethanda ukuzenza othobileyo lokukhonza izithunywa, ebambelela phezu kwemibono yakhe, ezikhukhumeza ngeze ngemicabango yakhe emibi.

¹⁹ Lowo kabambeleli kuKristu oyinhloko, okondliwa ngaye wonke umzimba, uhlanganiswa ngamalunga lemisipha, ukhula ngokukhula kukaNkulunkulu.

²⁰ Uba lafa kanye loKristu, lakhululwa kuyo impi yemimoya yalumhlaba, kungani ukuba kungathi lisaphila ngokomhlaba na? Kungani lithobela imithetho yokuthi:

²¹ Ungaphathi, ungezwa ngolimi, ungathinti?

²² Limithetho imayelana lezinto ezigugiswa yikusetshenziswa, ilandela imilayo lezifundiso zabantu.

²³ Yona ikhanya injengokuhlakanipha, ngoba kuvela ngayo ukukhonza lokuzithoba lokuphatha kanzima umzimba; kodwa kayisizi lutho mayelana lokuzithinta.