AbaseKholose 1 - iBhayibhili Elingcwele 1978

Isibingelelo

¹ Mina Pawuli umphostoli kaKristu Jesu ngentando kaNkulunkulu, loTimothi umzalwane,

² sithi kibo abangcwele labazalwane abakholwayo kuKristu abaseKolose: Kakube kini umusa lokuthula okuvela kuNkulunkulu uBaba.

UPawuli ubonga ukukholwa lothando lwabaseKolose

³ Siyambonga njalo uNkulunkulu uYise weNkosi yethu uJesu Kristu nxa silikhulekela,

⁴ lokhu sizwile ngokukholwa kwenu kuKristu Jesu langothando lwenu elibathanda ngalo bonke abangcwele.

⁵ Lezizinto ezimbili zivela ethembeni elibekelwe lona ezulwini, elezwa ngalo ngaphambili ngelizwi leqiniso elilivangeli

⁶ eselifikile kini, njengalokhu selikhona emhlabeni wonke. Lelivangeli liyanda lithela izithelo, njengoba kunjalo laphakathi kwenu, kusukela mhla wosuku elezwa ngalo, lawazi umusa kaNkulunkulu ngeqiniso.

⁷ Lokhu lakufundiswa nguEpafra othandekayo oyinceku kanye lathi, oyisikhonzi esithembekileyo sikaKristu ngenxa yethu;

⁸ nguye futhi ositshele ngothando lwenu olungaye uMoya.

UPawuli uyabakhulekela

⁹ Ngakhoke lathi, kusukela mhla wosuku esezwa ngalo, kasiyekeli ukulikhulekela lokulicelela ukuba ligcwaliswe ngokwazi intando yakhe ngokuhlakanipha konke lokuqedisisa okungomoya,

¹⁰ lihambe ngokufanele iNkosi, liyithokozise ngakho konke, lithele izithelo emisebenzini yonke elungileyo, likhule ekumazini uNkulunkulu.

¹¹ Aliqinise ngamandla wonke ngokwamandla obukhosi bakhe, kuze kube khona ukubekezela lesineke lokujabula ezintweni zonke,

¹² libonge uYise owalenza lafanela ukuhlanganyela ilifa labangcwele ekukhanyeni.

¹³ Wasikhulula emandleni omnyama, wasisa embusweni weNdodana yakhe ethandekayo,

¹⁴ esilokuhlengwa ngayo lokuthethelelwa izono.

Ubuntu lomsebenzi kaKristu

¹⁵ Yona ifuze uNkulunkulu ongelakubonwa, elizibulo lezidalwa zonke.

¹⁶ Ngoba konke kwadalelwa kiyo okusezulwini lokusemhlabeni, okubonwayo lokungabonwayo, loba kuyizihlalo zobukhosi loba kuyiziphathamandla loba kuyimibuso loba kungamandla; konke kwadalwa ngayo, kwadalelwa yona.

¹⁷ Yona ingaphambi kwakho konke, lezinto zonke zimi ngayo.

¹⁸ Yona yinhloko yomzimba olibandla; iyikuqala, izibulo kwabafileyo, ukuze yona ibe ngeyokuqala ezintweni zonke.

¹⁹ Ngoba kwaba kuhle kuNkulunkulu ukuba ukuphelela konke kukaNkulunkulu kuhlale kiyo;

²⁰ lokuba ngayo abuyisane lezinto zonke ezisemhlabeni loba ezisezulwini, enze ukuthula ngegazi lesiphambano sayo.

²¹ Lani lalikade liphambene laye, liyizitha zakhe ngenhliziyo langemisebenzi emibi.

²² Kodwa khathesi usebuyisene lani emzimbeni wayo ngokufa ukuba alimise phambi kwakhe lingcwele, lingelacala, lingasoleki,

²³ uba lihlala ekukholweni, lisekelwe liqinile, lingasuki ethembeni levangeli elalizwayo. Lona latshunyayelwa kukho konke okudaliweyo okungaphansi kwezulu, engenziwe isikhonzi salo mina Pawuli.

Ukuhlanganyela kukaPawuli emsebenzini kaKristu

²⁴ Khathesi ngiyathokoza ekulihluphekeleni kwami. Lokho okusileleyo enhluphekweni zikaKristu ngiyakugcwalisa emzimbeni wami ngenxa yomzimba wakhe olibandla.

²⁵ Ngenziwa isikhonzi salo ngokwesimiso sikaNkulunkulu enganikwa sona ngenxa yenu ukuze ngilazise ilizwi likaNkulunkulu ngokupheleleyo,

²⁶ ngitsho imfihlakalo ebifihlakele selokhu kwaqala izikhathi lezizukulwana, kodwa khathesi ibonakalisiwe kwabangcwele bakhe.

²⁷ Bona uNkulunkulu wathanda ukubazisa ukuthi ingakanani inotho lobukhosi baleyomfihlakalo phakathi kwabezizwe; leyomfihlakalo yilokhu ukuthi uKristu uphakathi kwenu, lilethemba lenkazimulo.

²⁸ Nguye esimtshumayelayo, seluleka wonke umuntu, sifundisa bonke abantu ngokuhlakanipha konke, ukuze sibalethe bonke kuKristu bephelele.

²⁹ Ngitshikatshikela khona lokho, ngizama ngamandla wonke kaKristu asebenza ngawo kimi.