AbaseGalathiya 6 - iBhayibhili Elingcwele 1978

Imilayezelo yokusizana

¹ Bazalwane, uba umuntu esehlelwa yisiphambeko, lina abakaMoya mlungiseni onjalo ngomoya wobumnene. Uqaphele lawe ukuba ungalingwa wena.

² Thwalisanani imithwalo yenu, ligcwalise umlayo kaKristu ngokwenza njalo.

³ Ngoba uba umuntu ezitshaya ulutho, yena engasilutho, uyazikhohlisa.

⁴ Kodwa kakube yilowo lalowo ahlole owakhe umsebenzi, ng’khonake ezakuba lokuzincoma ngokungokwakhe yedwa, kungabi ngokomunye.

⁵ Ngoba ilowo lalowo uzakuthwala owakhe umthwalo.

⁶ Ofundiswayo ilizwi kahlanganyele lalowo omfundisayo ezintweni zonke ezinhle.

⁷ Lingakhohliswa; uNkulunkulu kahlekwa. Ngoba lokho akuhlanyelayo umuntu, uzakuvuna khona lokho.

⁸ Ohlanyelela inkanuko zakhe uzavuna ukubhubha okuvela kuzo; kodwa ohlanyelela uMoya uzavuna ukuphila okungapheliyo okuvela kuMoya.

⁹ Kasingadinwa yikwenza okuhle, ngoba ngesikhathi esifaneleyo sizakuvuna uba singadinwanga.

¹⁰ Ngakhoke njengoba silethuba asenze okuhle kibo bonke, ikakhulu kwabendlu yokukholwa.

Isicino

¹¹ Ake libone amabala amakhulu engililobela ngawo ngesami isandla.

¹² Bonke abafuna ukubukeka ngemizimba yibo abalicindezela ukuba lisoke, bekwenzela kuphela ukuba bangazingelwa ngenxa yesiphambano sikaKristu.

¹³ Ngoba ngitsho lalabo abasokayo kabawugcini umlayo, kodwa bathanda ukuba lisoke ukuze bazincome ngokusoka kwenu.

¹⁴ Kodwa kimi kakungabi khona lakanye ukuzincoma, kuphela ngesiphambano seNkosi yethu uJesu Kristu, okubethelwe ngaso umhlaba kimi, lami kuwo umhlaba.

¹⁵ Ngoba ukusoka lokungasoki kakusilutho, kodwa okukhulu yikudalwa kutsha kuphela.

¹⁶ Ukuthula lesihawu kakube kibo bonke abahamba ngalindlela, yebo, lakuIsrayeli kaNkulunkulu.

¹⁷ Kangingabe ngisahlutshwa muntu, ngoba ngilazo emzimbeni wami impawu zikaJesu.

¹⁸ Umusa weNkosi yethu uJesu Kristu kawube lomoya wenu, bazalwane. Ameni.