AbaseGalathiya 5 - iBhayibhili Elingcwele 1978

¹ UKristu wasikhululela ukuba sibe lenkululeko. Ngakhoke manini liqine, lingabuyi libotshelwe futhi ejogweni lobugqili.

Inkululeko engoKristu

² Khangelani, mina Pawuli ngithi kini: Uba lisoka, uKristu kayikulisiza ngalutho.

³ Ngiyaqinisa futhi kumuntu wonke osokayo ukuthi umele ukugcina umlayo wonke.

⁴ Lehlukene loKristu lina elifuna ukulungisiswa ngomlayo; lehlukene lomusa.

⁵ Ngoba thina ngaye uMoya silindele ngokukholwa ithemba lokulunga.

⁶ Ngoba kuKristu kakusizi lutho ukusoka lokungasoki, kodwa kuphela ukukholwa okusebenza ngothando.

⁷ Beligijima kuhle; livinjelwe ngubani ukuba lingalaleli iqiniso na?

⁸ Lokhukuhuga kakuveli kuye owalibizayo.

⁹ Imvubelo eyingcosana ibilisa yonke inhlama.

¹⁰ Ngilethemba eNkosini ukuba kaliyikunakana okwehlukene lokwami; kodwa lowo olihluphayo uzakuthwala okwakhe ukulahlwa loba engubani.

¹¹ Kodwa mina, bazalwane, uba ngisatshumayela ukusoka, ngisazingelelwani na? Ngabe sesisusiwe isikhubekiso sesiphambano.

¹² Ngalabo abalihluphayo ngingathi kabazithene isibili!

Imisebenzi yomzimba lezithelo zikaMoya

¹³ Lina, bazalwane, labizelwa ekukhululekeni; lingenzi inkululeko yenu ibe lithuba lokukholisa umzimba kodwa ngothando sizanani omunye lomunye.

¹⁴ Ngoba umlayo wonke ugcwaliseka elizwini linye elokuthi: Wothanda umakhelwane wakho njengalokhu uzithanda wena.

¹⁵ Kodwa uba lilumana, lidlana, qaphelani ukuba lingaqedani.

¹⁶ Ngithi: Hambani ngoMoya lingakholisi inkanuko zomzimba.

¹⁷ Ngoba inkanuko zomzimba ziphambene lezikaMoya, kanti lenkanuko zikaMoya ziphambene lezomzimba; lezizinto ziphambene ukuze lingenzi lokho elikuthandayo.

¹⁸ Kodwa uba likhokhelwa nguMoya kalisekho ngaphansi komlayo.

¹⁹ Imisebenzi yomzimba isobala; yiyo le, ukuphinga, lokungcola, lamanyala,

²⁰ lokukhonza izithombe, lokuthakatha, lobutha, lenkani, lomona, lolaka, lokubanga, lokuxabana, lokwahlukana,

²¹ lomhawu, lokudakwa, lokuminza, lokunye okunjalo. Ngiyalitshela njengoba ngalitshela ngaphambili ukuthi abenza okunje kabayikulidla ilifa lombuso kaNkulunkulu.

²² Kodwa izithelo zikaMoya ziluthando, lokuthokoza, lokuthula, lokubekezela, lobubele, lokulunga, lokuthembeka,

²³ lobumnene, lokuzithinta; kokunje kakulamlayo.

²⁴ AbakaKristu Jesu babethele umzimba kanye lokuhugeka lezinkanuko zawo.

²⁵ Uba siphila ngoMoya, asihambe ngoMoya.

²⁶ Kasingazikhukhumezi, siqalane, sifelane umona.