AbaseGalathiya 4 - iBhayibhili Elingcwele 1978

Singabantwana bakaNkulunkulu ngoJesu Kristu

¹ Ngitsho ukuthi lapho indlalifa iseyingane, kayahlukanga ngalutho esigqilini, lanxa ingumnikazi wakho konke;

² kodwa lingaphansi kwabaphathi lababonisi kuze kufike isikhathi esamiswa nguyise.

³ Ngokunjalo lathi, lapho siseyizingane sasiyizigqili ngaphansi kwempi yemimoya yalumhlaba.

⁴ Kodwa kwathi isikhathi sesiphelele, uNkulunkulu wathumela iNdodana yakhe, yazalwa ngowesifazana, yazalelwa ngaphansi komlayo,

⁵ ukuze ihlenge abangaphansi komlayo ukuba samukele ukuma kwamadodana.

⁶ Lokhu lingamadodana uNkulunkulu wathumela uMoya weNdodana yakhe enhliziyweni zenu, ememeza esithi: Aba, Baba!

⁷ Ngakhoke kawuseyiso isigqili kodwa usuyindodana; uba uyindodana, uyindlalifa ngaye uNkulunkulu.

⁸ Ngalesosikhathi lingakamazi uNkulunkulu, laliyizigqili ngaphansi kwalabo abangesibo onkulunkulu ngemvelo;

⁹ kodwa khathesi njengalokhu selimazi uNkulunkulu, kumbe kangithi selisaziwa nguNkulunkulu, libuyelelani empini yemimoya yalumhlaba ebuthakathaka leyize na? Lithanda ukuphinda libe yizigqili zawo na?

¹⁰ Ligcina insuku lezinyanga lezikhathi leminyaka!

¹¹ Ngilovalo ngani ukuthi mhlawumbe ngisebenzele ize ngenxa yenu.

¹² Ngiyalincenga, bazalwane, wobani njengami, ngoba lami nginjengani. Kalingonanga ngalutho.

¹³ Liyazi ukuthi kwakungenxa yokugula ukuba ngitshumayele ivangeli kini okokuqala,

¹⁴ lanxa isimo somzimba wami sasiyisilingo kini, kalingeyisanga kalingidelelanga; kodwa langamukela ngokungathi ngiyisithunywa sikaNkulunkulu, ngokungathi nginguKristu Jesu uqobo.

¹⁵ Kwaya ngaphi, pho, ukuthokoza elalilakho na? Ngoba ngingalifakazela ukuthi, uba kwakungenzeka, lalingakhupha amehlo enu linginike wona.

¹⁶ Kambe sengiyisitha senu ngokulitshela iqiniso na?

¹⁷ Labobantu bayalitshisekela, kodwa kungesikho ngokuhle; bafuna ukulivalela ngaphandle ukuze litshisekele bona.

¹⁸ Kuhle ukuthi litshisekelelwe ngenxa yolutho oluhle insuku zonke, kungabi nxa ngikhona kini kuphela.

¹⁹ Bantwana bami, ngilomhelo futhi ngani, uKristu aze abunjwe phakathi kwenu.

²⁰ Bengingathanda ukuba khona phakathi kwenu ngiphendule indlela yokukhuluma kwami, ngoba ngididekile ngani.

USara loHagari bayimifanekiso yezivumelwano ezimbili

²¹ Ngitshelani lina elithanda ukuba ngaphansi komlayo, kaliwuzwa yini umlayo na?

²² Ngoba kulotshiwe ukuthi uAbrahama wayelamadodana amabili, enye ingeyesigqilikazi lenye ingeyomfazi okhululekileyo.

²³ Indodana yesigqilikazi yazalwa ngokwenyama, kodwa eyomfazi okhululekileyo yazalwa ngesithembiso.

²⁴ Lokhu kungumfanekiso; lababafazi bamele izivumelwano ezimbili, esinye esizalela ubugqili ngesasentabeni ethiwa iSinayi; singuHagari.

²⁵ ISinayi yintaba eseArabiya, yona imele iJerusalema lalamuhla, ngoba lisebugqilini kanye labantwana balo.

²⁶ Kodwa iJerusalema eliphezulu likhululekile, lona lingumama wethu.

²⁷ Ngoba kulotshiwe ukuthi: Thokoza wena nyumba ongazaliyo; kekela wena ongawuzwanga umhelo; ngoba umfazi otshiywe yindoda ulabantwana abanengi kulaye olendoda.

²⁸ Thina, bazalwane, njengoIsaka singabantwana besithembiso.

²⁹ Kodwa njengakulesosikhathi owazalwa ngokwenyama wamzingela yena owazalwa ngokoMoya, kusenjalo lalamuhla.

³⁰ Kodwa umbhalo uthini na? Uthi: Xotsha isigqilikazi lendodana yaso; ngoba indodana yesigqilikazi kayizukudla ilifa kanye lendodana yomfazi okhululekileyo.

³¹ Ngakhoke, bazalwane, thina kasisibo abantwana besigqilikazi, kodwa singabantwana bokhululekileyo.