AbaseGalathiya 3 - iBhayibhili Elingcwele 1978

Umuntu uyalungisiswa ngokukholwa

¹ Hawu maGalathiya ayizithutha! Ngubani oliloyileyo lina abekwa obala phambi kwenu uJesu Kristu ebethelwe na?

² Yilokhu kuphela engithanda ukukubuza kini ukuthi: Lamukela uMoya ngemisebenzi yomlayo loba ngokuzwa langokukholwa na?

³ Kanti liyizithutha kangaka na? Liqalile ngoMoya; selizakucina ngawenu amandla na?

⁴ Konke ukuhlupheka kwenu kwaba yize na? uba kambe kwaba yize.

⁵ Yena olinika uMoya losebenza imisebenzi yamandla phakathi kwenu ukwenza lokhu ngenxa yemisebenzi yenu yomlayo, ingabe ngenxa yokukholwa kwenu ivangeli na?

⁶ Khumbulani uAbrahama; wakholwa kuNkulunkulu, kwabalelwa kuye ukuthi yikulunga.

⁷ Ngakhoke yazini ukuthi abakholwayo yibo abangamadodana kaAbrahama.

⁸ Lombhalo wabona ngaphambili ukuba uNkulunkulu uzakulungisisa abezizwe ngokukholwa, watshumayela ivangeli ngaphambili kuAbrahama wathi: Izizwe zonke zizakubusiswa kuwe.

⁹ Ngakhoke bona abakholwayo babusiswa kanye loAbrahama owakholwayo.

¹⁰ Kodwa bonke abathemba imisebenzi yomlayo baqalekisiwe; ngoba kulotshiwe ukuthi: Baqalekisiwe bonke abangemi njalo kukho konke okulotshiweyo encwadini yomlayo ukuba bakwenze.

¹¹ Kusobala ukuthi ngomlayo kakulamuntu ongalungisiswa phambi kukaNkulunkulu; ngoba kuthiwa: Lowo olungileyo ngenxa yokukholwa uzakuphila.

¹² Umlayo kawusiwo owokukholwa, ngoba kuthiwa: Lowo owenza lezizinto uzakuphila ngazo.

¹³ UKristu wasihlenga ekuqalekisweni komlayo, yena waqalekiswa ngenxa yethu; ngoba kulotshiwe ukuthi: Baqalekisiwe bonke abalengiswa esihlahleni.

¹⁴ Wakwenza lokhu ukuba ngoKristu Jesu isibusiso sikaAbrahama sifike phezu kwabezizwe, ukuba samukele isithembiso sikaMoya ngokukholwa.

¹⁵ Bazalwane, ake ngililinganisele ngokwabantu. Intando yokucina yomuntu esiqinisiwe, kakho ongayichitha loba ongengezelela kuyo.

¹⁶ Izithembiso zanikwa uAbrahama lenzalo yakhe. Kakutshiwo ukuthi: Ezinzalweni, ngokungathi zinengi; kodwa kungathi yinye kuthiwa: Lasenzalweni yakho; enguKristu.

¹⁷ Ngitsho ukuthi isivumelwano esaqiniswa nguNkulunkulu ngaphambili kasichithwa ngumlayo owavela eminyakeni engamakhulu amane lamatshumi amathathu emva kokwenziwa kwaso, usenze isithembiso sibe yize.

¹⁸ Ngoba uba ilifa likhona ngomlayo, kalisekho ngesithembiso; kodwa uNkulunkulu walinika uAbrahama ngesithembiso.

Umsebenzi womlayo

¹⁹ Pho, umlayo uyini na? Wengezelelwa ngenxa yeziphambeko, kuze kufike inzalo eyanikwa isithembiso; wamiswa ngezithunywa ngesandla somlamuli.

²⁰ Kodwa umlamuli kasuye woyedwa; kanti uNkulunkulu munye.

²¹ Phoke, umlayo uphambene lezithembiso zikaNkulunkulu na? Phinde! Ngoba uba wawunikiwe umlayo olamandla okuphilisa, ukulunga ngabe kukhona ngomlayo isibili.

²² Kodwake umbhalo uvalele konke ngaphansi kwesono, ukuze isithembiso esingokukholwa kuJesu Kristu siphiwe abakholwayo.

²³ Kungakafiki ukukholwa sasilondolozwe ngaphansi komlayo, sivalelwe, kuze kufike ukukholwa obekuzakwambulwa.

²⁴ Ngakhoke umlayo wawungumlondolozi wethu kwaze kwafika uKristu, ukuze silungisiswe ngokukholwa.

²⁵ Kodwake khathesi sekufikile ukukholwa, kasisekho ngaphansi komlondolozi.

²⁶ Ngoba lina lonke lingabantwana bakaNkulunkulu ngokukholwa kuKristu Jesu.

²⁷ Lonke elabhaphathizelwa kuKristu lambethe uKristu.

²⁸ Kakukho umJuda lomGriki, kakukho obotshiweyo lokhululekileyo, kakukho owesilisa lowesifazana; ngoba lina lonke limunye kuKristu Jesu.

²⁹ Uba lingabakaKristu, liyinzalo kaAbrahama, liyizindlalifa njengokwathenjiswayo.