AbaseGalathiya 2 - iBhayibhili Elingcwele 1978

Umsebenzi kaPawuli wavunyelwa ngabaphostoli baseJerusalema

¹ Kwathi emva kweminyaka elitshumi lane ngaya futhi eJerusalema kanye loBarnabasi, ngathatha loTitosi futhi.

² Ngaya khona ngoba ngambulelwa nguNkulunkulu ukuba ngiye khona. Ngabalandisela ngevangeli engilitshumayela phakathi kwabezizwe, kodwa ngakwenza lokhu phambi kwabadumileyo bebodwa, funa mhlawumbe kungaba yikuthi ngigijimela ize, loba sengagijimela ize.

³ Kodwa ngitsho loTitosi owayelami engumGriki kacindezelwanga ukuba asoke.

⁴ Kodwa kwaba ngenxa yabazalwane bamanga abangeniswa ngensitha, abangena ngokunyenya ukuba bahlole ukukhululeka kwethu esilakho kuKristu Jesu, ukuze basenze izigqili.

⁵ Kasibathobelanga ngokuzehlisela ngaphansi kwabo ngitsho okwesikhatshana nje, ukuze iqiniso levangeli lime njalo kini.

⁶ Kodwa labo okuthiwa ngabadumileyo — loba bengobani kakutsho lutho kimi; uNkulunkulu kakhethi muntu — ngithi labo abadumileyo kabangelekelelanga ngalutho;

⁷ kodwa babona ukuthi nginikiwe ukutshumayela ivangeli kwabezizwe njengoPetro owanikwa ukutshumayela ivangeli kubaJuda.

⁸ Ngoba uNkulunkulu owenza ukuba uPetro abe ngumphostoli wabaJuda wangenza lami ukuba ngibe ngumphostoli wabezizwe.

⁹ Ngakhoke, bathi ukubona umusa engiwuphiweyo, oJakobe loKefasi loJohane abadume ngokuthi zinsika zebandla, banika mina loBarnabasi isandla sokunene sobudlelwano ukuba thina siye kwabezizwe, bona baye kubaJuda.

¹⁰ Bacela lokhu kuphela ukuba sikhumbule abayanga, into lami engangikhuthalele ukuyenza.

UPawuli umelana loPetro. Umlayo kawulungisisi muntu

¹¹ Kodwa ekufikeni kukaKefasi eAntiyoki ngamelana laye ubuso lobuso, ngoba wayesoleka.

¹² Ngoba bengakafiki abathile abavela kuJakobe, wayesidla labezizwe; kodwa kuthe ukuba bafike, wamonyuka, wahlukana labo esesaba abokusoka.

¹³ Labanye abaJuda bazenzisa kanye laye, waze wathatheka loBarnabasi ngokuzenzisa kwabo.

¹⁴ Kodwa kuthe sengibonile ukuba kabahambi ngokweqiniso levangeli, ngathi kuKefasi phambi kwabo bonke: Uba wena ungumJuda, uhamba ngokwabezizwe ungahambi ngokwabaJuda, ungabacindezela kanjani abezizwe ukuba bahambe ngokwabaJuda na?

¹⁵ Thina singabaJuda ngemvelo, kasisibo abezizwe, izoni.

¹⁶ Kodwa siyazi ukuthi umuntu kalungisiswa ngemisebenzi yomlayo, kuphela ngokukholwa kuKristu Jesu; lathi sakholwa kuKristu ukuba silungisiswe ngokukholwa kuKristu kungesikho ngemisebenzi yomlayo; ngoba ngemisebenzi yomlayo kakuyikulungisiswa muntu.

¹⁷ Kodwa lapho sifuna ukulungisiswa ngoKristu, thina uqobo sifunyaniswe siyizoni, kanti uKristu uyisisebenzi sesono na? Phinde!

¹⁸ Ngoba uba ngibuye ngakhe lokho engikudilizileyo, ngitshengisa ukuba ngingoweqa umlayo.

¹⁹ Ngoba ngomlayo mina ngafa kuwo umlayo, ukuba ngiphilele uNkulunkulu.

²⁰ Ngibethelwe kanye loKristu; kakuseyimi ophilayo, kodwa uKristu uphila kimi; ukuphila engikuphila khathesi ngikuphila ngokukholwa iNdodana kaNkulunkulu eyangithandayo, yazinikela ngenxa yami.

²¹ Kangiwutshayi ize umusa kaNkulunkulu, ngoba uba ukulunga kungomlayo, uKristu wafela ize.