AbaseGalathiya 1 - iBhayibhili Elingcwele 1978

Isibingelelo

¹ Mina Pawuli, umphostoli ongamiswanga ngabantu loba ngezandla zomuntu, kodwa nguJesu Kristu languNkulunkulu uYise owamvusa kwabafileyo,

² labazalwane bonke abalami, sithi kuwo amabandla aseGalathiya:

³ Kakube kini umusa lokuthula okuvela kuNkulunkulu uBaba laseNkosini yethu uJesu Kristu

⁴ owazinikela ngenxa yezono zethu, ukuba asophule kulesisikhathi esibi sakhathesi ngokwentando kaNkulunkulu uBaba;

⁵ kakube kuye ubukhosi kuze kube nininini. Ameni.

Ukuhlamuka kwabaseGalathiya evangelini likaKristu

⁶ Ngiyamangala ngoba limhlamuke masinyane kangaka yena owalibizela emuseni kaKristu, liye kwelinye ivangeli;

⁷ kungesilo elinye, kodwa bakhona abalididayo bethanda ukuhlanekela ivangeli likaKristu.

⁸ Kodwake loba kungaba yithi, loba isithunywa esivela ezulwini esilitshumayeza ivangeli eliphambene lalelo esalitshumayeza lona, kabe ngoqalekisiweyo.

⁹ Njengoba sengitshilo, ngiyaphinda futhi ngithi: Uba umuntu elitshumayeza ivangeli eliphambene lalelo elalamukelayo, kabe ngoqalekisiweyo.

UPawuli walizuza kuKristu ivangeli

¹⁰ Kambe ngiyazincengela ebantwini loba kuNkulunkulu khathesi na? Ngizama ukuthokozisa abantu na? Uba ngisathokozisa abantu, ngingebe yiyo inceku kaKristu.

¹¹ Ngoba ngithanda ukuba lazi, bazalwane, ukuthi ivangeli elatshunyayelwa yimi kayisilo elivela ebantwini.

¹² Lami kangilamukelanga emuntwini, futhi kangilifundiswanga, kodwa ngalizuza ngokwambulelwa nguJesu Kristu.

¹³ Selizwile ngokuhamba kwami kwakuqala ekukholweni kobuJuda, ukuthi ngalizingela kakhulu ibandla likaNkulunkulu, ngazama ukulichitha;

¹⁴ njalo ekukholweni kobuJuda ngabadlula abanengi abayintanga yami kwabakithi, ngatshisekela kakhulu amasiko abokhokho.

¹⁵ Kodwa kwaba kuhle kuNkulunkulu owangahlukanisela ngingakazalwa, wangibiza ngomusa wakhe,

¹⁶ ukuba ayambule iNdodana yakhe kimi, ukuze ngiyitshumayele phakathi kwabezizwe. Khona lapho kangibuzanga emuntwini,

¹⁷ futhi kangiyanga eJerusalema ukubonana lalabo ababengabaphostoli ngaphambi kwami, kodwa ngasuka ngaya eArabiya, ngaphinda ngabuyela eDamaseko.

¹⁸ Kwathi emva kweminyaka emithathu ngaya eJerusalema ukubonana loKefasi; ngahlala laye insuku ezilitshumi lanhlanu.

¹⁹ Kodwa kangibonanga lamunye kwabanye abaphostoli, kuphela uJakobe umfowabo weNkosi.

²⁰ Kulokhu engililobela khona kangiqambi manga phambi kukaNkulunkulu.

²¹ Ng’khona ngaya emazweni aseSiriya laseKilikhiya.

²² Ngangingakaziwa ngamehlo emabandleni kaKristu aseJudiya;

²³ ayesizwa nje kuthiwa: Lowo owayesizingela usetshumayela ukukholwa ayekade ezama ukukuchitha.

²⁴ Adumisa uNkulunkulu ngenxa yami.