AbaseFiliphi 4 - iBhayibhili Elingcwele 1978

UPawuli ubeluleka ngokuqina langokuzwana ekukholweni

¹ Ngakhoke, bazalwane, engibathandayo lengibalangathayo, lina ntokozo lomqhele wami, manini liqine ngokunjalo eNkosini, bathandekayo bami.

² Ngiyabalaya uYuwodiya loSintike ukuba babe lomqondo munye eNkosini.

³ Ngiyakuncenga lawe, mnakwethu oqotho, siza labo abesifazana, ngoba basebenza kakhulu kanye lami evangelini, kanye loKlementi lezinye izisebenzi amabizo azo asencwadini yokuphila.

⁴ Thokozani eNkosini njalonjalo; ngiyaphinda ngithi: Thokozani.

⁵ Ukubekezela kwenu kakwaziwe yibo bonke abantu; iNkosi iseduze.

⁶ Lingakhathazeki ngalutho, kodwa kukho konke izicelo zenu kazaziwe nguNkulunkulu ngokukhuleka langokunxusa kanye langokubonga.

⁷ Ukuthula kukaNkulunkulu okudlula ukuqedisisa konke kuzakulondoloza inhliziyo zenu lemicabango yenu kuKristu Jesu.

⁸ Elokucinake, bazalwane, konke okuliqiniso, konke okuhloniphekayo, konke okulungileyo, konke okuhlambulukileyo, konke okuhle, konke okulodumo oluhle, uba kukhona okudumisekayo, nakanani ngakho lokhu.

⁹ Elakufundayo, lakwamukela, lakuzwa, lakubona kimi, kwenzeni lokho, ng’khona uNkulunkulu wokuthula ezakuba lani.

UPawuli ubonga isiphiwo abasithumela kuye eRoma

¹⁰ Ngiyathokoza kakhulu eNkosini, ngokuthi khathesi selize lavuselela ukunginanzelela kwenu; belinginanzelela kambe, kodwa laswela ithuba.

¹¹ Kakusikho ukuthi ngitsho mayelana lokuswela kwami, ngoba sengifundile ukuba nganeliswe loba ngihlezi ngokunjani.

¹² Ngiyakwazi ukuswela, ngiyakwazi lokubusa; kukho konke lasezintweni zonke sengifundile ukusutha, lokulamba, lokubusa, lokuswela.

¹³ Ngingakwenza konke ngaye ongiqinisayo.

¹⁴ Kodwa lenze kuhle ngokuhlanganyela kwenu ekuhluphekeni kwami.

¹⁵ Liyazi lani, lina baseFiliphi, ukuthi ekuqaleni kwevangeli ekusukeni kwami eMakedoniya kwakungekho bandla lelilodwa elahlanganyela lami endabeni yokupha lokwamukela, kuphela lina lodwa;

¹⁶ ngoba laseTesalonika lathumela okokungisiza kanye ingabe kabili.

¹⁷ Kangitsho ukuthi ngifuna isiphiwo, kodwa ngifuna isithelo esizakwandisa ukulunga kwenu.

¹⁸ Kodwa ngilakho konke ngokupheleleyo; nganelisiwe nginikwe nguEpafrodithu iziphiwo elazithumelayo, eziliphunga elihle, umnikelo omuhle lowamukelekayo kuNkulunkulu.

¹⁹ UNkulunkulu wami uzakugcwalisa konke ukuswela kwenu ngobunengi benotho yakhe kuKristu Jesu.

²⁰ Akube udumo kuNkulunkulu onguBaba kuze kube nininini. Ameni.

Isicino

²¹ Bingelelani bonke abangcwele abakuKristu Jesu. Abazalwane abalami lapha bayalibingelela.

²² Bonke abangcwele bayalibingelela, ikakhulu labo abendlu kaKesari.

²³ Umusa weNkosi uJesu Kristu kawube lomoya wenu.