AbaseFiliphi 3 - iBhayibhili Elingcwele 1978

UPawuli ubaxwayisa ngokulunga okungokwabantu

¹ Elokucinake, bazalwane, thokozani eNkosini. Ukulilobela futhi ngalezizinto kakungidinisi, kodwa lina kuyalivikela.

² Xwayani izinja, lixwaye abenza okubi, lixwaye abazisikayo.

³ Ngoba singabokusoka thina esikhonza uNkulunkulu ngoMoya, siziqhenya kuKristu Jesu, singathembeli kokomzimba.

⁴ Kodwa mina uqobo bengingaba lokuthembela kokomzimba. Uba umuntu ecabanga ukuthi ulokuthembela kokomzimba, mina ngilakho kakhulu;

⁵ ngasokwa ngosuku lwesificaminwembili ngingowohlanga lukaIsrayeli, owesizwe sakoBenjamini, umHeberu wamaHeberu; ngokomlayo ngingumFarisi;

⁶ ngokokukhuthala ngazingela ibandla; ngokulunga okusemlayweni ngingongasolekiyo.

Ukulunga okukuKristu kuyinzuzo

⁷ Kantike lokho okwakuyinzuzo kimi ngakutshaya ize ngenxa kaKristu.

⁸ Yebo impela, konke ngikutshaye ize ngenxa yobukhulu bokumazi uKristu Jesu iNkosi yami. Ngilahlekelwe yikho konke ngenxa yakhe, ngikutshaya imfucuza, ukuze ngizuze uKristu,

⁹ ngifunyanwe kuye, ngingelakho ukulunga okungokwami okungomlayo, kodwa ngilalokho okungokukholwa kuKristu, ngitsho ukulunga okuvela kuNkulunkulu okungokukholwa;

¹⁰ ukuze ngimazi yena, lamandla okuvuka kwakhe, ngihlanganyele enhluphekweni zakhe, ngimfuze ekufeni kwakhe,

¹¹ ukuze kuthi uba kungenzeka ngifinyelele ekuvukeni kwabafileyo.

¹² Kangitsho ukuthi sengifinyelele kulokho, lokuthi sengiphelelisiwe; kodwa ngizamelela ukuba mhlawumbe ngingakubamba yini lokho engabanjelwa khona nguKristu Jesu.

¹³ Bazalwane, kangitsho ukuthi mina uqobo sengikubambile; kodwa kunye engikwenzayo, ngikhohlwa okungasemuva ngizamelele kokungaphambili,

¹⁴ ngizamelela ukufika ekucineni, ngizuze umvuzo wokubizwa okukhulu kwaphezulu okukaNkulunkulu kuKristu Jesu.

¹⁵ Ngakhoke thina esesiphelele asibe lomqondo onjalo; uba ezintweni ezithile lilomqondo omunye, lalokhu uNkulunkulu uzakulambulela khona.

¹⁶ Kasihambe ngalezondlela esesifinyelele kuzo.

UPawuli ubeluleka ngokumlandela

¹⁷ Bazalwane, ngilingisani, libaqaphelisise abahamba njengathi esiyisibonelo senu.

¹⁸ Ngoba abanengi, engalitshela kanengi ngabo, lakhathesi ngilitshela ngezinyembezi, bahamba njengezitha zesiphambano sikaKristu;

¹⁹ ukuphela kwabo kuyikubhujiswa, unkulunkulu wabo uyisisu, lodumo lwabo lusehlazweni labo, bathanda izinto zomhlaba.

²⁰ Kodwa thina ikithi lisezulwini, lapho futhi silindele ukuba kuvele khona uMsilisi, iNkosi uJesu Kristu,

²¹ ozakuphendula isimo somzimba wethu wasemhlabeni, ufane lomzimba wakhe olenkazimulo, ngamandla awaphiweyo ukuba azehlisele ngaphansi kwakhe zonke izinto.