AbaseFiliphi 2 - iBhayibhili Elingcwele 1978

Ukuzithoba kukaKristu lokuphakanyiswa kwakhe

¹ Ngakhoke uba kukhona ukukhuthaza kuKristu, uba kukhona ukukhuthaza kothando, uba kukhona ukuhlanganyela kukaMoya, uba kukhona ububele lesihawu,

² gcwalisani ukuthokoza kwami ngokuba langqondonye, libe lothando lunye, libe lenhliziyonye lokuqonda kunye.

³ Lingenzi lutho ngokubangisana langokuziqhenya, kodwa ngokuthobeka litshaye sengathi abanye bangcono kulani.

⁴ Kakube yilowo lalowo angakhathaleli okwakhe yedwa, kodwa kakhathalele lokwabanye.

⁵ Kawube kini lowomqondo owawukhona kuKristu Jesu,

⁶ yena owathi elesimo sikaNkulunkulu, katshongo ukuthi kuyinto yokuphangwa ukulingana loNkulunkulu,

⁷ kodwa wazidela, wathatha isimo senceku, waba ngumuntu.

⁸ Wathi esebuntwini, wazithoba, walalela uNkulunkulu kwaze kwaba sekufeni, yebo, ekufeni esiphambanweni.

⁹ Ngakhoke uNkulunkulu wamphakamisa kakhulu, wamnika ibizo elikhulu kulawo wonke,

¹⁰ ukuze kuthi ebizweni likaJesu amadolo wonke aguqe, awabasezulwini, lawabasemhlabeni, lawabangaphansi komhlaba,

¹¹ lezindimi zonke zivume ukuthi uJesu Kristu uyiNkosi, kube ludumo lukaNkulunkulu uYise.

Ukupheleliswa komsebenzi wokusiliswa

¹² Ngakhoke, bathandiweyo bami, njengalokho lilalela ngezikhathi zonke, kungesikho nxa ngikhona kuphela, kodwa ikakhulu nxa ngingekho, phelelisani umsebenzi wokusiliswa kwenu ngokwesaba langokuthuthumela,

¹³ ngoba uNkulunkulu usebenza kini elenza ukuba lithande lisebenzele intando yakhe.

¹⁴ Yenzani zonke izinto ngokungasoli langokungabuzi,

¹⁵ ukuze lingasoleki, libe msulwa, abantwana bakaNkulunkulu abangelasici phakathi kwesizukulwana esingaqondanga lesiphambeneyo, elikhanya phakathi kwaso njengezinkanyezi emhlabeni;

¹⁶ libambelele ngokuqinileyo elizwini lokuphila ukuba ngibe lokuzincoma osukwini lukaKristu ngokuthi kangigijimelanga ize, kangisebenzelanga ize.

¹⁷ Yebo, loba nginikelwa emhlatshelweni ongumnikelo wokukholwa kwenu, ngiyathokoza kanye lani lonke.

¹⁸ Ngokunjaloke thokozani lani, lithokoze kanye lami.

UPawuli uzakuthumela uTimothi loEpafrodithu

¹⁹ Ngiyathemba eNkosini uJesu ukuthuma uTimothi kini masinyane, ukuze lami ngithokoziswe yikuzwa indaba zenu.

²⁰ Kangilaye omunye onjengaye, ozananzelela indaba zenu ngobuqotho;

²¹ ngoba bonke bazifunela okwabo, bengafuni okukaJesu Kristu.

²² Kodwa liyakwazi ukuthembeka kukaTimothi ukuthi usebenzile kanye lami ngenxa yevangeli njengomntwana kuyise.

²³ Ngiyathembake ukumthuma masinyane, nxa sengibonile ukuthi okuqondene lami kuphelela ngaphi.

²⁴ Njalo ngiyathemba eNkosini ukuthi lami ngizakuza kini masinyane.

²⁵ Ngibonile ukuthi kufanele ngithume kini loEpafrodithu, umzalwane lesisebenzi lolibutho kanye lami, lesithunywa senu sokungisebenzela ekusweleni kwami;

²⁶ ngoba wayelilangatha lonke, ekhathazekile ngoba lizwile ukuthi ubegula.

²⁷ Lempela wagula waphos’ukufa; kodwa uNkulunkulu wamhawukela, engahawukeli yena yedwa, kodwa ehawukela lami, ukuze ngingabi losizi phezu kolunye.

²⁸ Ngakhoke ngitshisekela ukumthuma, ukuze kuthi nxa selimbona futhi, lithokoze, losizi lwami lunciphe.

²⁹ Mamukelenike eNkosini ngokuthokoza konke, abanjaloke libahloniphe;

³⁰ ngoba ngenxa yomsebenzi kaKristu waphose wafa edela ukusila kwakhe, ukuze aphelelise okusileleyo ekungisebenzeleni kwenu.