AbaseFiliphi 1 - iBhayibhili Elingcwele 1978

Isibingelelo

¹ Thina oPawuli loTimothi, inceku zikaKristu Jesu, sithi kubo bonke abangcwele kuKristu Jesu abaseFiliphi, kanye lababonisi lezikhonzi:

² Kakube kini umusa lokuthula okuvela kuNkulunkulu uBaba laseNkosini uJesu Kristu.

UPawuli ubonga uNkulunkulu ngabo; uyabakhulekela

³ Ngiyambonga uNkulunkulu wami ekulikhumbuleni kwami konke;

⁴ langezikhathi zonke ekulikhulekeleni kwami konke ngikhuleka ngokuthokoza,

⁵ ngokuhlanganyela kwenu evangelini kusukela osukwini lokuqala kuze kube khathesi.

⁶ Ngilethemba lokuthi yena lowo owaqalisa umsebenzi omuhle kini uzakuwuphelelisa kuze kube sosukwini lukaJesu Kristu.

⁷ Impela kufanele ukuba ngikhumbule ngokunjalo ngani lonke, ngoba ngiyalithanda kakhulu, ngoba ekubotshweni kwami lasekuvikeleni kwami lasekuqiniseleni kwami ivangeli lina lonke lihlanganyela lami, emuseni kaNkulunkulu.

⁸ Ngoba uNkulunkulu ungufakazi wami wokuthi ngiyalilangatha kangakanani lonke ngothando lukaKristu Jesu uqobo.

⁹ Ngikhulekela ukuthi uthando lwenu lwande kakhulu njalo ekwazini lasekuqedisiseni konke,

¹⁰ ukuze likwazi okuhle kakhulu, lize lihlambuluke lingasoleki kuze kube sosukwini lukaKristu,

¹¹ ligcwaliswe ngezithelo zokulunga ezingoJesu Kristu, kube yibukhosi lodumo kuNkulunkulu.

UPawuli ulandisa ngokuhlala kwakhe eyisibotshwa eRoma

¹² Ngithanda ukuba lazi, bazalwane, ukuthi lokho okwangehlelayo kusizile ukuqhubela phambili ivangeli.

¹³ Ukubotshwa kwami kubonakele kubo bonke abalindi besigodlo kanye labanye ukuthi kungenxa kaKristu,

¹⁴ langenxa yakho abazalwane abanengi baqinisiwe eNkosini, sebelesibindi sokukhuluma ilizwi likaNkulunkulu ngokungesabi.

¹⁵ Abanye kambe batshumayela uKristu ngomona langombango, kodwa abanye bamtshumayela ngenhliziyo enhle;

¹⁶ laba abesibili batshumayela ngothando, bayazi ukuthi ngimiselwe ukuvikela ivangeli;

¹⁷ kodwa labo abokuqala batshumayela uKristu ngombango kungesikho ngenhliziyo enhle, besithi bazakungivusela ukuhlupheka ekubotshweni kwami.

¹⁸ Kulani pho? Uba uKristu etshunyayelwa ngezindlela zonke, loba ngokuzenzisa ingabe ngeqiniso, ngalokhuke ngiyathokoza.

¹⁹ Yebo ngizathokoza, ngoba ngiyazi ukuthi ngokukhuleka kwenu langokusiza kukaMoya kaJesu Kristu lokhu kuzakungisilisa,

²⁰ njengokufisa lokuthemba kwami okukhulu ukuthi kangiyikuyangeka, kodwa ngesibindi sonke, khathesi langezikhathi zonke, uKristu uzakudunyiswa emzimbeni wami, loba ngisila loba ngisifa.

²¹ Ngoba kimi ukusila kunguKristu, ukufa kuyinzuzo;

²² kodwa uba lokhukusila emzimbeni kuyisithelo somsebenzi kimi, kangikwazi engingakukhetha.

²³ Ngiphakathi kokubili; ngilesifiso sokusuka ngibe loKristu, ngoba lokhu kuhle kakhulu;

²⁴ kantike ukuhlala emzimbeni kuyadingeka kakhulu ngenxa yenu.

²⁵ Ngileqiniso ngalokho, ngiyazi ukuthi ngizakuba khona, yebo, ngihlale lani lonke, kube yikuqhubeka lokuthokoza kwenu ekukholweni,

²⁶ ukuze ukuzibonga kwenu ngami kwande kuKristu Jesu ngokufika kwami kini futhi.

UPawuli ubalaya ukuba bahambe ngokwevangeli

²⁷ Kuphela hambani ngokufanele ivangeli likaKristu, kuze kuthi, loba ngifika kini loba ngingekho, ngizwe indaba zenu zokuthi liqinile emoyeni munye, lasengqondweninye lilwela ukukholwa kwevangeli,

²⁸ lingethuswa ngalutho ngabamelene lani; lokhu kuzakuba yisibonakaliso kibo sokubhubha kwabo, kodwa kini kuzakuba ngesokusiliswa kwenu; lokhu kuvela kuNkulunkulu.

²⁹ Ngoba ngenxa kaKristu lina labelwa, kangitsho ukukholwa kuphela, kodwa lokuhlupheka ngenxa yakhe,

³⁰ ngokuhlanganyela kwenu kulokhukulwa elangibona ngikukho, lelingizwa ukuthi ngikukho lakhathesi.