Abahluleli 5 - iBhayibhili Elingcwele 1978

Ihubo likaDebora loBaraki

¹ UDebora loBaraki indodana kaAbinowama basebehlabela ngalolosuku besithi:

² Ngokuba abakhokheli bakhokhela koIsrayeli, langokuba abantu bazinikela ngenhliziyo, bongani iNkosi!

³ Zwanini lina makhosi, lilalele lani zikhulu, ngizakuyihlabelela iNkosi, ngihubele iNkosi, uNkulunkulu kaIsrayeli.

⁴ Nkosi, ekusukeni kwakho eSeyiri, ekuhambeni kwakho usuka elizweni laseEdoma, umhlaba wazamazama, lephezulu lanyikinyeka, yebo, amayezi athontisa amanzi.

⁵ Izintaba zathuthumela phambi kweNkosi, leSinayi uqobo, phambi kweNkosi, uNkulunkulu kaIsrayeli.

⁶ Ensukwini zikaShamigari indodana kaAnathi, ensukwini zikaJayeli, izindwendwe zakhawula ukuhamba, lezihambi zemigwaqo zahamba ngezindledlana.

⁷ Abakhokheli baphela koIsrayeli, baphela ngaze ngavela mina Debora, ngaba ngunina koIsrayeli.

⁸ Ekukhetheni kwabo onkulunkulu abatsha kwaba khona ukulwa elizweni. Kwakungasabonwa isihlangu lomkhonto ebantwini abazinkulungwane ezingamatshumi amane koIsrayeli.

⁹ Inhliziyo yami ingasezinduneni zabakoIsrayeli, labazinikela ngenhliziyo phakathi kwabantu. Bongani iNkosi!

¹⁰ Lina eligada obabhemi abamhlophe, lani elihlala emacansini abuthakathaka, lani elihamba ngendlela, cabangani ngakho.

¹¹ Lalelani, abantu abahlabelayo ezindaweni zokukha amanzi bayalandisa ngokunqoba kweNkosi, ukunqoba kwabakhokheli bakoIsrayeli. Abantu beNkosi behlela emasangweni.

¹² Vuka, vuka, Debora! Vuka, vuka, uhlabele ingoma! Vuka, Baraki, uthumbe abathunjwa bakho, wena ndodana kaAbinowama.

¹³ Bafika abantu abaqotho ezinduneni zabo, abantu beNkosi bafika kuyo njengamaqhawe.

¹⁴ Basuka koEfrayimi behlela esigodini, belandela wena, Benjamini, lezihlobo zakho. KuMakiri kwaphuma izinduna, lakoZebuluni kwaphuma labo abaphatha intonga yenduna.

¹⁵ Izikhulu zakoIsakari zaziloDebora, uIsakari wayethembekile kuBaraki; behlela esigodini bemlandela. Kodwa uRubeni wayedabuke phakathi, kwakukhona ukuthandabuza okukhulu.

¹⁶ Wahlalelani ezibayeni zezimvu ukuzwa umhlanga wokukhaliselwa izimvu na? URubeni wayedabuka phakathi, kwakukhona ukuthandabuza okukhulu.

¹⁷ AbaseGileyadi bahlala ngaphetsheya kweJordani. UDani wahlalelani emikolweni na? UAsheri walibala ngasokhunjini lolwandle, wazihlalela ngasolwandle.

¹⁸ AbakoZebuluni bazidela kwaze kwaba sekufeni, loNafitali laye emagcekeni okulwa.

¹⁹ Amakhosi afika alwa, alwa amakhosi aseKanani, eTanaki ngasemanzini aseMegido, kawazuzanga impango yesiliva.

²⁰ Inkanyezi zalwa zisezulwini, endleleni zazo zalwa loSisera.

²¹ Amanzi eKishoni abakhukhula, amanzi amanengi omfula iKishoni. Wena mphefumulo wami, hamba ngamandla!

²² Aseduma amasondo amabhiza ngokugadula, ukugadula kwamabhiza akhe.

²³ Qalekisani iMerozi, kutsho isithunywa seNkosi, qalekisani kakhulu abakhileyo kulo, ngoba kabezanga ukusiza iNkosi, ukuyisiza iNkosi kanye lamaqhawe.

²⁴ Obusisiweyo kwabesifazana nguJayeli umkaHeberi umKeni, phakathi kwabesifazana abahlala emathenteni ubusisiwe kakhulu.

²⁵ USisera wacela amanzi, wamnika uchago, wamlethela amasi ngomganu oligugu.

²⁶ Wathatha ngesandla sakhe isikhonkwane sethente, ngesandla sokunene wathatha isando sesisebenzi, watshaya uSisera, wadabula ikhanda lakhe, watshaya wabhoboza isikhala sobuso.

²⁷ Wakhothama wawa, walala phansi ngasenyaweni zakhe, wakhothamela ngasenyaweni zakhe, wawela khona, lapha awela khona, wafela khona.

²⁸ Unina kaSisera wakhangela ngewindi, walunguza ngewindi, wamemeza wathi: Iphuziswe yini inqola yakhe yokulwa na? Uphuziswe yini umsindo wokugadula kwamabhiza akhe na?

²⁹ Amakhosazana akhe ahlakaniphileyo amphendula, kodwa yena waziphendula wathi:

³⁰ Bayabutha impango, bayayeyehlukaniselana, intombazana, yebo amantombazana amabili kuleyo laleyondoda, amalembu aphenduliweyo ngakaSisera, impango yamalembu aphenduliweyo, ilembu, yebo amalembu amabili aphenduliweyo ngawokucecisa intamo yami.

³¹ Zizabhubha ngokunjalo zonke izitha zakho, Nkosi. Kodwa bonke abakuthandayo kababe njengelanga lapho liphuma ngamandla alo. Kwaba khona ukuthula elizweni iminyaka engamatshumi amane.