Abahluleli 17 - iBhayibhili Elingcwele 1978

UMika lendlu yakhe yezithombe

¹ Kwakukhona umuntu othile wasezintabeni zakoEfrayimi, ibizo lakhe linguMika.

² Yena wathi kunina: Inhlamvu zesiliva eziyinkulungwane lekhulu ezantshontshwa kuwe, engakuzwa uqalekisa ngazo, zikhona kimi, yimi engazithathayo. Unina wathi: INkosi ikubusise, ndodana yami.

³ Wasezibuyisela kunina inhlamvu eziyinkulungwane lekhulu zesiliva. Unina wathi: Sengisahlukanisela iNkosi lesisiliva sami sibe ngesendodana yami, ukuba ngenze isithombe.

⁴ Eseyibuyisele imali kunina, unina wathatha inhlamvu zesiliva ezingamakhulu amabili, wazinika umkhandi owenza ngazo isithombe; sabekwa endlini kaMika.

⁵ UMika wayelendlu yokukhonzela, wenza izithombe, wamisa omunye wamadodana akhe ukuba abe ngumpristi wakhe.

⁶ Ngalezonsuku kwakungelankosi koIsrayeli; wonke umuntu wayesenza lokho akubona kulungile kuye.

⁷ Kwakukhona insizwa yaseBetlehema koJuda, eyosendo lukaJuda, yayingumLevi, ihlala khona.

⁸ Lowomuntu wasuka emzini waseBetlehema koJuda ukuyadinga indawo yokwakha. Ekuhambeni kwakhe wafika ezintabeni zakoEfrayimi emzini kaMika.

⁹ UMika wathi kuye: Uvela ngaphi? Yena wathi kuye: NgingumLevi waseBetlehema koJuda, ngidinga indawo yokwakha.

¹⁰ UMika wathi kuye: Hlala lami, ube ngubaba lompristi, ngizakukunika inhlamvu ezilitshumi zesiliva ngomnyaka, lezigqoko, lokudla kwakho.

¹¹ UmLevi wavuma ukuhlala laye, wasesiba njengabantwana bakhe kuye.

¹² UMika wambeka umLevi waba ngumpristi wakhe, wahlala endlini yakhe.

¹³ UMika wasesithi: Khathesi ngiyazi ukuba iNkosi izangiphumelelisa ngoba ngilomLevi ongumpristi wami.