Abahluleli 15 - iBhayibhili Elingcwele 1978

¹ Kwathi ngemva kwesikhathi, ngesikhathi sokuvuna amabele, uSamsoni wayabona umkakhe emphathele izinyane. Wathi: Ngizangena endlini yomkami. Kodwa uyisezala kamvumelanga ukungena.

² Wathi: Ngacabanga ukuthi usumzonda kakhulu, ngasengimnika umkhaphi wakho. Umnawakhe kamuhle kulaye na? Ungazithathela yena.

³ USamsoni wasesithi kubo: Khathesi kangiyikuba lacala mayelana lamaFilistiya uba ngiwenzela okubi.

⁴ Ngakho uSamsoni wasesuka, wabamba amakhanka angamakhulu amathathu, wathatha izibane, wawafulathelisa umsila uqondana lomsila, wabophela isibane emisileni emibili.

⁵ Waselumathisa izibane, eyekela amakhanka ukuba angene emabeleni amaFilistiya, kwatsha amabele emiyo labuthelelweyo kanye lezivini lezivande zamaoliva.

⁶ AmaFilistiya asesithi: Ngubani owenze lokhu na? Kwathiwa: NguSamsoni, ngoba uyisezala ongumuntu waseTimina umthathele umkakhe, wamnika umkhaphi wakhe. AmaFilistiya asefika, amtshisa owesifazana loyise ngomlilo.

⁷ USamsoni wathi: Uba kuyikho lokhu elikwenzayo, ngiyafunga ukuba ngizaphindisela kini, ngingakasuki lapha.

⁸ Wabahlasela ngamandla wonke, wabulala abanengi. Wasuka wayahlala obhalwini lweliwa laseEtamu.

USamsoni unqoba amaFilistiya eLehi

⁹ AmaFilistiya asuka ayamisa koJuda, ahlasela iLehi.

¹⁰ AbakoJuda bathi: Lisihlaselelani na? Athi: Sizebopha uSamsoni, ukuba simenze lokho asenza khona.

¹¹ Abantu bakoJuda abazinkulungwane ezintathu basuka baya obhalwini lweliwa laseEtamu, bathi kuSamsoni: Kawazi yini ukuba amaFilistiya yiwo asibusayo na? Pho, kuyini lokhu osenzele khona na? Yena wathi kibo: Ngenze njengokwenza kwawo kimi.

¹² Bathi kuye: Sizile ukukubopha ukuba sikunikele kumaFilistiya. USamsoni wathi kibo: Fungani kimi ukuthi lina kaliyikungihlasela.

¹³ Bona bathi kuye: Atshi, thina sizakukubopha kuphela, sikunikele kuwo, kasiyikukubulala. Basebembopha ngamagoda amabili amatsha, bamsusa edwaleni.

¹⁴ Kwathi esefikile eLehi, amaFilistiya amhlangabeza eklabalala. Umoya weNkosi wehlela ngamandla phezu kwakhe, lamagoda ayebophe ingalo zakhe aba njengesikusha esitshiswe ngomlilo, izibopho zakhe zawohloka ezandleni zakhe.

¹⁵ Wasefumana umhlathi omutsha kababhemi, welula isandla sakhe wawudobha, wabulala ngawo abantu abayinkulungwane.

¹⁶ Wathi: Ngomhlathi kababhemi ngibatshayile, baba zinqumbi, ngomhlathi kababhemi ngibulele abantu abayinkulungwane.

¹⁷ Kwathi eseqedile ukukhuluma wawulahla umhlathi. Leyondawo yasibizwa ngokuthi iRamathi‐Lehi.

¹⁸ Wayesomile kakhulu. Wakhala eNkosini wathi: Unikile lokhu ukukhululwa okukhulu ngesandla senceku yakho; sengizakufa yikoma, ngiwele ezandleni zabangasokanga na?

¹⁹ UNkulunkulu wasevula igodi phansi eliseLehi, kwagobhoza amanzi kilo. Kwathi esenathile uSamsoni, umoya wakhe wabuya waqaqabuka. Ngalokho ibizo lalowomthombo lathiwa yiEni‐Hakore; useLehi kuze kube lamhla.

²⁰ USamsoni waba ngumahluleli koIsrayeli ensukwini zamaFilistiya iminyaka engamatshumi amabili.