Abahluleli 13 - iBhayibhili Elingcwele 1978

Ukuzalwa kukaSamsoni

¹ AbakoIsrayeli babuya benza okubi phambi kweNkosi. INkosi yabanikela ezandleni zamaFilistiya iminyaka engamatshumi amane.

² Kwakukhona umuntu othile waseZora, owakoDani, ibizo lakhe linguManowa; umkakhe wayeyinyumba engelabantwana.

³ Isithunywa seNkosi sabonakala kowesifazana sathi kuye: Khangela, uyinyumba, kawulabantwana, kodwa uzathatha isisu uzale indodana.

⁴ Ngakhoke qaphelisa ukuba unganathi wayini lokunye okudakayo, ungadli lutho olungcolileyo,

⁵ ngoba uzathatha isisu uzale indodana. Impuco kayiyikuthinta ikhanda layo, ngoba umntwana lowo uzakuba umNaziri kaNkulunkulu kusukela ekuzalweni kwakhe. Yena uzakuba ngowokuqala ukukhulula uIsrayeli ezandleni zamaFilistiya.

⁶ Owesifazana wasesiya ukubikela indoda yakhe esithi: Kufikile kimi umuntu kaNkulunkulu, ubuso bakhe bebunjengobuso besithunywa sikaNkulunkulu, busesabeka. Kangimbuzanga ukuba uvelaphi, futhi kangitshelanga ibizo lakhe.

⁷ Uthe kimi: Khangela, uzathatha isisu, uzale indodana; ngakho unganathi wayini lokunye okudakayo, ungadli lutho olungcolileyo, ngoba umntwana lowo uzakuba ngumNaziri kaNkulunkulu kusukela osukwini lokuzalwa kwakhe kuze kube sekufeni kwakhe.

⁸ UManowa wancenga iNkosi esithi: E Nkosi, umuntu kaNkulunkulu obumthumile ake abuye futhi kithi, asifundise ukuthi sizakwenza njani ngomntwana ozazalwa.

⁹ UNkulunkulu walilalela ilizwi likaManowa, isithunywa sikaNkulunkulu safika futhi kowesifazana ehlezi egangeni; kodwa uManowa umkakhe wayengekho.

¹⁰ Owesifazana wagijima masinyane, wabikela umkakhe wathi: Khangela, lowomuntu kaNkulunkulu owafika kimi mhlalokhuya usebonakele kimi.

¹¹ UManowa wasuka walandela umkakhe, wafika kulowomuntu wathi kuye: Unguye lowomuntu owakhuluma kulowesifazana na? Yena wathi kuye: Nginguye.

¹² UManowa wasesithi: Nxa esegcwalisekile amazwi akho, yena uzakuba ngumntwana onjani na? Uzasebenzani na?

¹³ Isithunywa seNkosi sathi kuye: Konke lokho engakutshoyo kumkakho akuqaphelise;

¹⁴ angadli lutho oluvela evinini, anganathi wayini lokunye okudakayo, angadli lutho olungcolileyo, agcine konke engamlaya khona.

¹⁵ UManowa wasesithi kuso isithunywa seNkosi: Ake uhlale lathi, sikuhlabele izinyane.

¹⁶ Isithunywa seNkosi sathi kuye: Uba ngihlala lani, kangiyikudla ukudla kwenu; kodwa uba lithanda ukulungisa umnikelo wokutshiswa, unikeleni eNkosini. UManowa wayengazi ukuba kwakuyisithunywa seNkosi.

¹⁷ Wasesithi kuso isithunywa seNkosi: Wena ungubani ibizo lakho, ukuze kuthi lapho amazwi akho egcwaliseka sikuhloniphe.

¹⁸ Isithunywa seNkosi sathi kuye: Ulibuzelani ibizo lami lokhu lona liyamangalisa na?

¹⁹ UManowa wasethatha izinyane lomnikelo wempuphu, wakunikela eNkosini phezu kwedwala, kuyo eyenza okumangalisayo.

²⁰ Kwathi lapho ilangabi liphuma ealtareni liqonde phezulu, isithunywa seNkosi senyuka ngelangabi lealtare uManowa lomkakhe bekhangele; bathi mbo phansi ngobuso babo.

²¹ Isithunywa seNkosi kasiphindanga sabonakala kuManowa lomkakhe. UManowa wasesazi ukuba kwakuyisithunywa seNkosi.

²² Wasesithi kumkakhe: Sizakufa impela ngoba sibone uNkulunkulu.

²³ Kodwa umkakhe wathi: Uba iNkosi ibiqonde ukusibulala, ibingayikwamukela umnikelo wethu wokutshiswa lomnikelo wethu wempuphu, loba isitshengise zonke lezizinto, lokusitshela izinto ezinjengalezi.

²⁴ Owesifazana wabeletha umfana, wamutha ibizo wathi nguSamsoni; umfana wakhula, leNkosi yambusisa.

²⁵ Umoya weNkosi waqala ukumvusa eseMahane‐Dani phakathi kweZora leEshitawoli.