Abahluleli 12 - iBhayibhili Elingcwele 1978

UJefta labakoEfrayimi

¹ Abantu bakoEfrayimi bahloma, bachapha baya eZafoni bathi kuJefta: Wachaphelani ukuyakulwa lamaAmoni ungasibizanga ukuba sihambe lawe na? Sizakukutshisela endlini.

² UJefta wathi kibo: Mina labantu bami sasilengxabano enkulu lamaAmoni; salibiza, kalisikhululanga ezandleni zabo.

³ Kwathi lapho ngibona ukuthi kaliyikusikhulula, ngazifaka engozini, ngachapha ukulwa lamaAmoni, iNkosi yawanikela esandleni sami. Pho, lizeleni kimi lamhla ukulwa lami na?

⁴ UJefta wasebutha bonke abantu baseGileyadi ukulwa labakoEfrayimi; abaseGileyadi babehlula abakoEfrayimi. AbakoEfrayimi babethe: Lingababalekileyo bakoEfrayimi, lina baseGileyadi eliphakathi kwabakoEfrayimi labakoManase.

⁵ AbaseGileyadi bavimbela abakoEfrayimi emazibukweni aseJordani. Kwakusithi lapho omunye wababalekileyo koEfrayimi esithi: Kahle ngichaphe; abaseGileyadi bathi kuye: UngokaEfrayimi na? Lapho esithi: Atshi;

⁶ bathi: Tshono uthi: Shibolethi. Yena athi: Sibolethi; ngoba engelakulibiza kuhle. Basebembamba, bembulala emazibukweni eJordani. Kwafa ngalesosikhathi abakoEfrayimi abazinkulungwane ezingamatshumi amane lambili.

⁷ UJefta waba ngumahluleli koIsrayeli iminyaka eyisithupha. Wasesifa uJefta owaseGileyadi, wamngcatshelwa emzini wakhe eGileyadi.

UIbizani loEloni loAbidoni

⁸ Emva kwakhe uIbizani waseBetlehema waba ngumahluleli koIsrayeli.

⁹ Wayelamadodana angamatshumi amathathu lamadodakazi angamatshumi amathathu. Wendisa amadodakazi angamatshumi amathathu, wathathela amadodana akhe izintombi ezingamatshumi amathathu. Waba ngumahluleli koIsrayeli iminyaka eyisikhombisa.

¹⁰ Wasesifa, wangcwatshelwa eBetlehema.

¹¹ Emva kwakhe uEloni waseZebuluni waba ngumahluleli koIsrayeli iminyaka elitshumi.

¹² Wasesifa, wangcwatshelwa eAjaloni elizweni lakoZebuluni.

¹³ Emva kwakhe uAbidoni indodana kaHileli wasePirathoni waba ngumahluleli koIsrayeli.

¹⁴ Wayelamadodana angamatshumi amane, lamadodana amadodana akhe angamatshumi amathathu, babegada obabhemi abangamatshumi ayisikhombisa; waba ngumahluleli koIsrayeli iminyaka eficaminwembili.

¹⁵ Wasesifa, wangcwatshelwa ePirathoni elizweni lakoEfrayimi ezintabeni zamaAmaleki.