Abahluleli 10 - iBhayibhili Elingcwele 1978

UTola loJayiri

¹ Emva kukaAbimeleki kwavela uTola indodana kaPuwa kaDodo, owakoIsakari, ukukhulula uIsrayeli. Wayehlala eShamiri ezintabeni zakoEfrayimi.

² Waba ngumahluleli koIsrayeli iminyaka engamatshumi amabili lantathu. Wafa, wangcwatshelwa eShamiri.

³ Ngemva kwakhe kwavela uJayiri owaseGileyadi, waba ngumahluleli koIsrayeli iminyaka engamatshumi amabili lambili.

⁴ Wayelamadodana angamatshumi amathathu agada obabhemi abangamatshumi amathathu, belemizi engamatshumi amathathu ethiwa yiHavothi‐Jayiri kuze kube lamhla, eselizweni laseGileyadi.

⁵ UJayiri wafa, wangcwatshelwa eKamoni.

AmaAmoni ahlupha abakoIsrayeli

⁶ AbakoIsrayeli babuya benza okubi phambi kweNkosi, bakhonza oBali laboAshera, onkulunkulu baseSiriya laseSidoni laseMowabi labamaAmoni labamaFilistiya; bayitshiya iNkosi, kabaze bayikhonza.

⁷ INkosi yamthukuthelela uIsrayeli, yamnikela ezandleni zamaFilistiya lamaAmoni

⁸ abahlupha abacindezela bonke abakoIsrayeli ababengaphetsheya kweJordani elizweni lamaAmori eliseGileyadi iminyaka elitshumi leficaminwembili.

⁹ AmaAmoni achapha iJordani ukuba alwe labakoJuda labakoBenjamini labakoEfrayimi; uIsrayeli wahlupheka kakhulu.

¹⁰ AbakoIsrayeli bakhala eNkosini bathi: Sonile kuwe, ngoba sikutshiyile, Nkulunkulu wethu, sakhonza oBali.

¹¹ INkosi yathi kibo: Kangilikhululanga yini kwabaseGibithe lakumaAmori lakumaAmoni lakumaFilistiya na?

¹² Lalapho amaSidoni lawo lamaAmaleki lamaMidiyani elicindezela, lakhala kimi, ngalikhulula ezandleni zawo.

¹³ Kantike lingitshiyile lakhonza abanye onkulunkulu; ngalokhoke kangisayikulikhulula futhi.

¹⁴ Hambani liyekhala kulabonkulunkulu elibakhethileyo, balikhulule bona ngesikhathi sokuhlupheka kwenu.

¹⁵ AbakoIsrayeli bathi eNkosini: Sonile; yenza kithi lokho okubona kulungile kuwe; ake usikhulule lamhla kodwa.

¹⁶ Basebekhupha onkulunkulu bezizweni phakathi kwabo, bakhonza iNkosi eyayingebe isakumela ukuhlupheka kukaIsrayeli.

¹⁷ AmaAmoni ahloma, amisa eGileyadi, labakoIsrayeli babuthana bamisa eMizipa.

¹⁸ Abantu lezikhulu zaseGileyadi bakhulumisana besithi: Ngubani ozaqala ukulwa lamaAmoni na? Uzakuba yinduna yabo bonke abaseGileyadi.