Abahluleli 1 - iBhayibhili Elingcwele 1978

Ukulwa kwabakoIsrayeli lamaKanani

¹ Emva kokufa kukaJoshuwa abakoIsrayeli babuza eNkosini bathi: Yisiphi isizwe esizakuhlasela amaKanani kuqala na?

² INkosi yathi: UJuda uzahamba kuqala; khangelani, ngilinikele ilizwe esandleni sakhe.

³ UJuda wathi kuSimeyoni umfowabo: Asihambe sonke siye elizweni engilinikiweyo ukuba sihlasele amaKanani; lami ngizahamba lawe elizweni olinikiweyo. USimeyoni wasehamba laye.

⁴ UJuda wasephuma ukuyahlasela, iNkosi yanikela amaKanani lamaPerizi ezandleni zabo; babulala abayizinkulungwane ezilitshumi eBezeki.

⁵ EBezeki bamfica uAdoni‐Bezeki, balwa laye, bawanqoba amaKanani lamaPerizi.

⁶ UAdoni‐Bezeki wabaleka, baxotshana laye, bambamba, baquma izithupha zakhe lamazwane akhe amakhulu.

⁷ UAdoni‐Bezeki wathi: Amakhosi angamatshumi ayisikhombisa equnywe izithupha zawo lamazwane awo amakhulu ayedobha imvuthuluka ngaphansi kwetafula yami. Lokho engakwenza kuwo, uNkulunkulu usekwenze kimi. Basebemusa eJerusalema, lapho afela khona.

⁸ AbakoJuda bahlasela iJerusalema, balithatha, balichitha ngomkhonto, balitshisa lonke ngomlilo.

⁹ Emva kwalokho abakoJuda bayahlasela amaKanani ayehlala ezintabeni laseNegebi laseShefela.

¹⁰ Basebehlasela amaKanani ayehlala eHebroni; iHebroni kuqala kwakuthiwa yiKiriyathi‐Arba; banqoba uSheshayi loAhimani loTalimayi.

¹¹ Basuka lapho, bahlasela abaseDebiri. IDebiri kuqala kwakuthiwa yiKiriyathi‐Seferi.

¹² UKalebi wathi: Lowo ohlasela iKiriyathi‐Seferi, alithumbe, ngizamendisela indodakazi yami uAkisa.

¹³ UOthiniyeli indodana kaKenaza umnawakhe kaKalebi walithumba; uKalebi wasemendisela uAkisa indodakazi yakhe.

¹⁴ UAkisa ekufikeni kwakhe kuye, umkakhe wamncenga ukuba amcelele insimu kuyise; uAkisa wasesehla kubabhemi wakhe, uKalebi wathi kuye: Ukhala ngani na?

¹⁵ Yena wathi kuye: Akungiphe isipho, lokhu ungibeke elizweni elomileyo laseNegebi; ngiphe imithombo yamanzi. UKalebi wasemnika imithombo engaphezulu lengaphansi.

¹⁶ Inzalo yomKeni, uyisezala kaMose, yasuka labakoJuda emzini waMalala, baya enkangala yakoJuda eningizimu kweAradi; bahlala phakathi kwamaAmaleki.

¹⁷ UJuda wahamba loSimeyoni umfowabo, banqoba amaKanani ayehlala eZefathi, iZefathi balichitha nya. Ngakho umuzi lowo wasuthiwa yiHorma.

¹⁸ UJuda kalithumbanga iGaza lelizwe lakhona, leAshikeloni lelizwe lakhona, leEkroni lelizwe lakhona.

¹⁹ INkosi yayilaye uJuda, wathumba ilizwe lasezintabeni, kodwa wehluleka ukubaxotsha abakhileyo esigodini, ngoba babelezinqola zokulwa zensimbi.

²⁰ IHebroni lanikwa uKalebi njengokutsho kukaMose; waxotsha kilo amadodana amathathu kaAnaki.

²¹ Kodwa abakoBenjamini kabawaxotshanga amaJebusi ayehlala eJerusalema; ngakho amaJebusi ahlala labakoBenjamini eJerusalema kuze kube lamhla.

²² AbakoJosefa bahlasela iBetheli, iNkosi yayilabo.

²³ Bathuma inhloli ukuhlola iBetheli; ibizo lalowomuzi kuqala lalithiwa yiLuzi.

²⁴ Lezinhloli zabona umuntu ephuma emzini, zathi kuye: Akusitshengise ukuba singangena njani emzini, sizakukuphatha ngomusa.

²⁵ Wasebatshengisa; bawuchitha umuzi ngomkhonto, kodwa bamyekela lowomuntu ukuba ahambe layo yonke indlu yakhe.

²⁶ Lowomuntu waya elizweni lamaHethi, wakha khona umuzi, wawubiza ngokuthi yiLuzi; kuselibizo lawo kuze kube lamhla.

²⁷ UManase kabaxotshanga abaseBeti‐Sheyani lasemizaneni yalo, labaseTanaki lasemizaneni yalo, labaseDori lasemizaneni yalo, labaseIbileyamu lasemizaneni yalo, labaseMegido lasemizaneni yalo; kodwa amaKanani aphikelela ukuhlala kulelolizwe.

²⁸ Kwathi uIsrayeli eselamandla wawasebenzisa nzima amaKanani, kodwa kawaxotshanga aphela.

²⁹ UEfrayimi kawaxotshanga amaKanani ayehlala eGezeri, kodwa ahlala eGezeri phakathi kwabo.

³⁰ UZebuluni kabaxotshanga abaseKitroni labaseNahaloli, kodwa amaKanani ahlala phakathi kwabo, bawasebenzisa nzima.

³¹ UAsheri kabaxotshanga abaseAko labaseSidoni labaseAhilabi labaseAkizibi labaseHeliba labaseAfiki labaseRehobi;

³² kodwa abakoAsheri bahlala phakathi kwamaKanani ayakhile elizweni, ngoba kabawaxotshanga.

³³ UNafitali kabaxotshanga abaseBeti‐Shemeshi labaseBeti‐Anathi, kodwa bahlala phakathi kwamaKanani ayakhile elizweni; abaseBeti‐Shemeshi labaseBeti‐Anathi bawasebenzisa nzima.

³⁴ AmaAmori abafuqela ezintabeni abakoDani, ngoba kawabavumelanga ukwehlela emagcekeni,

³⁵ amaAmori aphikelela ukuhlala entabeni yaseHeresi eAjaloni leShalibimi, kodwa abakoJosefa bawaphatha nzima, bawasebenzisa nzima.

³⁶ Umngcele wamaEdoma wawusukela emqansweni waseAkirabami, laseSela usiya phezulu.