2 uTimothi 3 - iBhayibhili Elingcwele 1978

Izinto ezimbi zezinsuku zokucina

¹ Yazi lokhu ukuthi ensukwini zokucina kuzakufika izikhathi ezinzima.

² Ngoba abantu bazakuba ngabazithandayo, labathanda imali, labazigqajayo, labaziqakisayo, labathukayo, labangalaleli abazali babo, labangabongiyo, lababi,

³ labangelathando, labanhliziyo zilukhuni, labahlebayo, labangazikhuziyo, labalolaka, labazonda okuhle,

⁴ labanikela abanye, labalamawala, labagcwele ukuzikhukhumeza, labathanda ukuzithokozisa kulokuthanda uNkulunkulu,

⁵ labalesimo sokukholwa kodwa amandla akho bewaphika. Baxwaye abanjalo.

⁶ Phakathi kwabo bakhona abanyenyela ezindlini bathumbe abesifazana ababuthakathaka, abasindwa yizono bebuswa yizinkanuko eziyizinhlobonhlobo,

⁷ bethanda ukufundiswa njalonjalo, kodwa bengeke bafinyelele ekulazini iqiniso.

⁸ Njengoba uJane loJambere bamelana loMose, ngokunjalo lalaba bamelana leqiniso, bengabantu abalengqondo eyonakeleyo, abehluleka ukukholwa.

⁹ Kodwa kabayikufika ngaphi, ubuthutha babo buzakuba sobala kibo bonke, njengoba kwaba njalo lakulabo ababili.

Ukubambelela esifundisweni esilungileyo

¹⁰ Kodwa wena ulandele ukufundisa kwami, lokuziphatha kwami, lokuhamba kwami, lokukholwa kwami, lokubekezela kwami, lothando lwami, lokuqinisela kwami,

¹¹ lokuzingelwa kwami, lezinhlupheko zami, lakho konke okwangehlela eAntiyoki, laseIkoniyuma, laseListra, lezinhlupheko zonke engazithwalayo; kodwa iNkosi yangophula kukho konke.

¹² Yebo, bonke abathanda ukuhamba ngobuqotho kuKristu Jesu bazazingelwa;

¹³ kodwa abantu ababi labakhohlisi bazakuqhubekela phambili ebubini, bekhohlisana.

¹⁴ Kodwa wena mana kulokho okufundileyo lowaqiniseka kukho, wazi ukuthi ukufunde kubani,

¹⁵ lokuthi kusukela ebuntwaneni wayazi imibhalo engcwele elamandla okukufundisela ukusiliswa ngokukholwa kuKristu Jesu.

¹⁶ Yonke imibhalo yafunzelelwa nguMoya kaNkulunkulu, ilungele ukufundisa lokukhalimela lokuqondisa, lokufundisela ukulunga,

¹⁷ ukuze umuntu kaNkulunkulu aphelele, alungiselwe yonke imisebenzi emihle.