2 uTimothi 2 - iBhayibhili Elingcwele 1978

UTimothi welulekwa ukuba abe lesibindi

¹ Ngakhoke, wena mntanami, qina emuseni okuKristu Jesu.

² Lokho okuzwileyo kimi phambi kwabofakazi abanengi kunikele amadoda athembekileyo azakuba lamandla okukufundisa labanye.

³ Hlanganyela lami ukuhlupheka njengebutho elihle likaJesu.

⁴ Kakho owebutho osempini olibala ngezinto zabangabuthwanga, ukuba amkholise lowo ombuthileyo.

⁵ Futhi nxa umuntu encintisana labanye, kanikwa umqhele uba engancintisananga ngokomthetho.

⁶ Kungumlimi osebenza kakhulu ofanele ukuba amukele izithelo kuqala.

⁷ Nakana ngengikutshoyo, ngoba iNkosi izakukunika ukuqedisisa ngezinto zonke.

⁸ Khumbula uJesu Kristu ovukileyo kwabafileyo, owenzalo kaDavida ngokwevangeli lami,

⁹ ivangeli engihlupheka ngenxa yalo ngibotshwa njengesigebengu; kanti ilizwi likaNkulunkulu kalibotshwanga.

¹⁰ Ngakhoke ngikhuthazelele konke ngenxa yabakhethiweyo, ukuze labo bazuze ukusiliswa kuKristu Jesu kanye lobukhosi obungapheliyo.

¹¹ Liqinisile lelilizwi elithi: Uba safa kanye laye, sizakuphila kanye laye futhi;

¹² uba sabekezela, sizakubusa kanye laye; uba simphika, laye uzakusiphika;

¹³ uba singathembeki, yena uhlala ethembekile; ngoba angeziphike.

UTimothi uxwayiswa ngokuphikisana

¹⁴ Ubakhumbuze ngalokho, ubalaye phambi kukaNkulunkulu ukuba baxwaye ukuphikisana ngamazwi; kakusizi lutho, kodwa kuchitha abezwayo.

¹⁵ Khuthalela ukuba uziveze kuNkulunkulu uthembekile, uyisisebenzi esingelanhloni esiphatha kuhle ilizwi leqiniso.

¹⁶ Xwaya ukukhuluma okomhlaba okuyize, ngoba abakwenzayo bazakuholelwa phambili ebubini,

¹⁷ lelizwi labo lizakuhlihla njengesilonda esibhibhidlayo. Phakathi kwabo ngoHimenewo loFileto

¹⁸ abaduhileyo eqinisweni, besithi ukuvuka kwabafileyo sekudlule, bechitha ukukholwa kwabanye.

¹⁹ Kodwa isisekelo esiqinileyo sikaNkulunkulu simi silaloluphawu lokuthi: INkosi iyabazi abangabayo; lokuthi: Ilowo lalowo ophatha ibizo leNkosi kahlukane lokungalungi.

²⁰ Endlini enkulu kakukho izitsha zegolide lezesiliva kuphela, kodwa kukhona lezesihlahla lezebumba, ezinye zilomsebenzi omkhulu, ezinye zilomsebenzi omncinyane.

²¹ Uba umuntu ezihlambulula ezintweni ezimbi, uzakuba yisitsha esilomsebenzi omkhulu, esenziwe saba ngcwele, esilosizo kumninindlu, esilungiselwe umsebenzi wonke omuhle.

²² Ngakho xwaya inkanuko zobutsha, ulandele ukulunga, lokukholwa, lothando, lokuthula kanye labo abakhuleka eNkosini ngenhliziyo emhlophe.

²³ Ukuphikisana okulobuthutha lokungazi kuxwaye, wazi ukuthi kubanga ukulwa.

²⁴ Inceku yeNkosi kayifanele ukulwa, kodwa kayibe mnene kibo bonke, ibe lelisu lokufundisa, ibekezele,

²⁵ ibaluleke ngomoya omnene abamelana layo. Kumbe uNkulunkulu angabanika ukuphenduka, baze balazi iqiniso,

²⁶ baphaphame baphunyuke emjibileni kaSathane ababanjwe nguye ukuba benze intando yakhe.