2 USamuyeli 9 - iBhayibhili Elingcwele 1978

UDavida uba lomusa kuMefiboshethi

¹ UDavida wathi: Kusekhona yini oseleyo endlini kaSawuli ukuba ngimenzele umusa ngenxa kaJonathani na?

² Kwakukhona inceku yendlu kaSawuli ibizo layo kuthiwa nguZiba, bambizela kuDavida; inkosi yathi kuye: Nguwe uZiba na? Yena wathi: Inceku yakho nansi.

³ Inkosi yasisithi: Kusekhonanje endlini kaSawuli loyedwa engingamenzela umusa njengokuthandwa nguNkulunkulu na? UZiba wathi: Yebo, nkosi; uJonathani uselendodana eyisilima inyawo zombili.

⁴ Inkosi yasisithi kuye: Ingaphi na? UZiba wayiphendula wathi: Ihlala endlini kaMakiri indodana kaAmiyeli eLodebari.

⁵ Inkosi uDavida yasithumela ukuba alandwe endlini kaMakiri indodana kaAmiyeli eLodebari.

⁶ UMefiboshethi indodana kaJonathani kaSawuli wafika kuDavida, wathi mbo ngobuso, wakhuleka. UDavida wathi: Mefiboshethi! Yena waphendula wathi: Ikhona inceku yakho.

⁷ UDavida wasesithi kuye: Ungesabi, ngoba ngizakwenzela umusa ngenxa kayihlo uJonathani; ngizakukubuyisela lonke ilizwe likayihlomkhulu uSawuli, udle njalo etafuleni yami.

⁸ UMefiboshethi wakhuleka, wasesithi: Kambe inceku yakho iyini ukuba ukhangele inja efileyo enjengami na?

⁹ Inkosi yasibiza uZiba, inceku kaSawuli, yathi kuye: Konke okwakungokukaSawuli, lendlu yakhe yonke ngikunike indodana yenkosi yakho.

¹⁰ Wena lamadodana akho lenceku zakho lizayilimela amasimu, liwavune ukuze indlu yenkosi yakho ibe lokudla; kodwa uMefiboshethi indodana yenkosi yakho uzakudla njalo etafuleni yami. UZiba wayelamadodana alitshumi lanhlanu, lenceku ezingamatshumi amabili.

¹¹ UZiba wathi enkosini: Inceku yakho izakwenza konke njengokutsho kwenkosi yami. UMefiboshethi wadla etafuleni yenkosi njengendodana yenkosi.

¹² UMefiboshethi wayelendodana encinyane ibizo layo linguMika. Bonke ababehlala endlini kaZiba baba zinceku zikaMefiboshethi.

¹³ UMefiboshethi wahlalake eJerusalema, ngoba wadla njalo etafuleni yenkosi. Wayeyisilima inyawo zakhe zombili.