2 USamuyeli 8 - iBhayibhili Elingcwele 1978

UDavida unqoba izizwe

¹ Emva kwalokho uDavida wahlasela amaFilistiya, wawahlula, wawathathela iMethegama.

² Wanqoba amaMowabi, wawalalisa phansi, wawalinganisa ngentambo; kuyo yonke imizila ngamibili eyababulawayo umzila owodwa opheleleyo wayekelwa. AmaMowabi aba yizinceku zikaDavida, athela kuye.

³ UDavida wabuya wahlasela wanqoba uHadadezeri indodana kaRehobi inkosi yaseZoba, ekuhambeni kwakhe ukubuyisa umbuso wakhe ngasemfuleni iYufrathi.

⁴ UDavida wathumba kuye abamabhiza abayinkulungwane lamakhulu ayisikhombisa, lamabutho ahamba ngenyawo abayizinkulungwane ezingamatshumi amabili; waquma imisipha yawo wonke amabhiza enqola zokulwa, kodwa watshiya amabhiza alingana izinqola zokulwa ezilikhulu.

⁵ Lapho amaSiriya aseDamaseko efika ukusiza uHadadezeri inkosi yaseZoba, uDavida wabulala abantu abayizinkulungwane ezingamatshumi amabili lambili kumaSiriya.

⁶ Wasebeka amabutho okulinda eAramu elaseDamaseko, amaSiriya aba zinceku zakhe, athela kuye. INkosi yamnika uDavida ukunqoba endaweni zonke aya kizo.

⁷ UDavida wathatha izihlangu zegolide ezaziphethwe yizinceku zikaHadadezeri, waziletha eJerusalema.

⁸ Emizini kaHadadezeri iBeta leBerothayi uDavida wathatha ithusi elinengi kakhulu.

⁹ Lapho uToyi inkosi yaseHamathi esizwa ukuthi uDavida uyahlule yonke impi kaHadadezeri,

¹⁰ uToyi wathumela uJoramu indodana yakhe enkosini uDavida ukuyibingelela lokuyenzela amhlophe, ngoba ilwe loHadadezeri yamahlula; ngoba uHadadezeri wayandise ukulwa loToyi. UJoramu wafika lezitsha zesiliva, lezegolide, lezethusi;

¹¹ inkosi uDavida yazahlukanisela iNkosi kanye lesiliva legolide eyayilahlukanisele iNkosi livela ezizweni zonke eyayizahlule,

¹² eEdoma, eMowabi, lakumaAmoni, lakumaFilistiya, leAmaleki, lasempangweni kaHadadezeri indodana kaRehobi, inkosi yaseZoba.

¹³ UDavida wazenzela ibizo elilodumo ekubuyeni kwakhe ngokubulala amaEdoma ayizinkulungwane ezilitshumi lesificaminwembili esihotsheni seTshwayi;

¹⁴ wabeka amabutho okulinda eEdoma lonke, labo bonke abaseEdoma baba zinceku zikaDavida. INkosi yamnika uDavida ukunqoba endaweni zonke aya kizo.

¹⁵ UDavida wambusake wonke uIsrayeli; wahlulela wenza ukulunga kubo bonke abantu bakhe.

¹⁶ UJowabi indodana kaZeruya wayephethe impi, uJehoshafati indodana kaAhiludi wayengumbhali;

¹⁷ uZadoki indodana kaAhitubi loAhimeleki indodana kaAbiyatha babengabapristi; uSeraya wayengumabhalani;

¹⁸ uBenaya indodana kaJehoyada wayephethe amaKerethi lamaPelethi ayengabalindi; amadodana kaDavida ayengabapristi.