2 USamuyeli 7 - iBhayibhili Elingcwele 1978

Isivumelwano sikaNkulunkulu loDavida

¹ Kwathi lapho inkosi uDavida isihlala endlini yayo, iNkosi uNkulunkulu isiyiphumuzile ezitheni zayo zonke inxa zonke,

² yathi kuNathani umprofethi: Akuboneke, mina ngihlala endlini yemikusu, kodwa umtshokotsho kaNkulunkulu uhlala ethenteni.

³ UNathani wathi enkosini: Hamba wenze konke okusenhliziyweni yakho, ngoba iNkosi ilawe.

⁴ Kodwa kwathi ngabona lobobusuku ilizwi leNkosi uNkulunkulu lafika kuNathani lathi:

⁵ Hamba uyetshela inceku yami uDavida ukuthi iNkosi ithi: Uzangakhela indlu ukuba ngihlale kiyo na?

⁶ Kangizanga ngihlale endlini kusukela osukwini engakhupha ngalo abantu bakoIsrayeli eGibithe kuze kube lamuhla, kodwa bengilokhu ngihamba ngethente.

⁷ Endaweni zonke engihambe kuzo labo bonke abantu bakoIsrayeli ngake ngakhuluma ilizwi yini komunye wabahluleli bakoIsrayeli, engabalaya ukwalusa abantu bami uIsrayeli ngathi: Yini lingangakhelanga indlu yemikusu na?

⁸ Ngakhoke uzakutsho encekwini yami uDavida uthi: INkosi yamabandla ithi: Ngakuthatha ekwaluseni izimvu egangeni ukuba ube ngumbusi wabantu bami uIsrayeli;

⁹ ngaba lawe lapho uya khona, ngachitha zonke izitha zakho ngaphambi kwakho; ngizakwenzela ibizo elikhulu phakathi kwabakhulu basemhlabeni.

¹⁰ Ngizabamisela indawo abantu bami uIsrayeli, ngibagxumeke ukuba bahlale endaweni yabo, bangabe besakhathazwa futhi; labantu ababi kabasayikubahlupha njengakuqala,

¹¹ kusukela esikhathini engamisa ngaso abahluleli ebantwini bami uIsrayeli; ngikuphumuze ezitheni zakho zonke. Futhi iNkosi iyakutshela ukuthi izakwandisa usendo lwakho.

¹² Kuzakuthi lapho insuku zakho seziphelile, usuyile kwabaphansi, ngimise omunye wabantwana bakho ukuba abe yinkosi emva kwakho, ngiqinise umbuso wakhe.

¹³ Yena uzakwakhela ibizo lami indlu; ngizaqinisa isihlalo sobukhosi sombuso wakhe kuze kube nininini.

¹⁴ Mina ngizakuba nguyise, yena ibe yindodana yami. Uba esenza okubi, ngizayitshaya ngentonga esetshenziswa ngabantu, ngimtshaye imivimvinya njengokutshaya kwabantu.

¹⁵ Kodwa uthando lwami kangiyikulususa kiyo njengalokho ngalususa kuSawuli engamkhupha ngaphambi kwakho.

¹⁶ Indlu yakho lombuso wakho kuzaqiniswa njalonjalo phambi kwami; lesihlalo sakho sobukhosi simiswe kuze kube nininini.

¹⁷ UNathani wamtshela uDavida konke lokho ayekutsheliwe, lakho konke ayekutshengisiwe.

¹⁸ Inkosi uDavida yasingena ihlala phambi kweNkosi, yathi: Kambe mina ngingubani, Nkosi Nkulunkulu, lendlu yami iyini, ukuze ungifikise lapha na?

¹⁹ Kanti lokhu kuyinto encinyane nje emehlweni akho, Nkosi Nkulunkulu; usukhulumile futhi ngendlu yenceku yakho ngokwesikhathi esikhatshana esizayo, wangitshengisa futhi lezizukulwana ezizayo, Nkosi Nkulunkulu.

²⁰ Phoke, mina nginguDavida nje ngingabe ngisathini kuwe na? Ngoba wena uyayazi inceku yakho, Nkosi Nkulunkulu.

²¹ Ngenxa yesithembiso sakho langokuthanda kwakho wenzile konke lokhu okukhulu ukuba ukwazise inceku yakho.

²² Wena umkhulu impela, Nkosi Nkulunkulu; ngoba kakho onjengawe, kakho uNkulunkulu ngaphandle kwakho, ngakho konke esikuzwileyo ngendlebe zethu.

²³ Yisiphi isizwe emhlabeni esinjengabantu bakho uIsrayeli, Nkulunkulu owazihlengela bona eGibithe baba ngabantu bakho, wazenzela udumo, wabenzela izenzo ezinkulu lezesabekayo ngokuxotsha ngaphambi kwabo izizwe kanye labonkulunkulu bazo, na?

²⁴ Wazimisela abantu bakho uIsrayeli ukuba babe ngabantu bakho kuze kube nini lanini, wena Nkosi waba nguNkulunkulu wabo.

²⁵ Khathesike, Nkosi Nkulunkulu, qinisa ilizwi olikhulume ngenceku yakho langendlu yayo kuze kube nininini, wenze njengokukhuluma kwakho.

²⁶ Kalibe likhulu ibizo lakho kuze kube nininini kuze kuthiwe: INkosi yamabandla inguNkulunkulu koIsrayeli; lendlu yenceku yakho uDavida imiswe phambi kwakho.

²⁷ Ngoba wena Nkosi yamabandla, Nkulunkulu kaIsrayeli, uyambulele lokhu inceku yakho, wathi: Ngizakukwakhela indlu. Ngakho inceku yakho ibe lesibindi sokukhuleka lumkhuleko kuwe.

²⁸ Yebo, Nkosi Nkulunkulu, wena unguNkulunkulu, lamazwi akho aliqiniso; uyithembisile inceku yakho lokhu okuhle.

²⁹ Ngakhoke akuyibusise indlu yenceku yakho ukuze ibe phambi kwakho kuze kube nininini; ngoba ukhulumile, wena Nkosi Nkulunkulu; izabusiswa ngesibusiso sakho indlu yenceku yakho kuze kube nini lanini.