2 USamuyeli 6 - iBhayibhili Elingcwele 1978

Umtshokotsho wesivumelwano seNkosi ulethwa eJerusalema

¹ UDavida wabuya wabuthanisa futhi bonke abakhethiweyo bakoIsrayeli abazinkulungwane ezingamatshumi amathathu.

² UDavida wahamba labo bonke abantu ababelaye, besuka eBala lakoJuda ukuba bayethatha lapho umtshokotsho kaNkulunkulu, obizwa ngebizo leNkosi yamabandla esihlalo sayo sobukhosi siphezu kwamakherubi.

³ Bawuthwala umtshokotsho kaNkulunkulu ngenqola entsha, bewususa endlini kaAbinadaba eyayisoqaqeni; uUza loAhiyo amadodana kaAbinadada babetshayela leyonqola entsha.

⁴ Bayithatha endlini kaAbinadaba eyayisoqaqeni ithwele umtshokotsho, uAhiyo ehamba phambili.

⁵ UDavidi labo bonke abakoIsrayeli babesina phambi kweNkosi ngamandla wonke, behlabela, betshaya imihubhe, lamachacho, lezingungu, lamachachwana lezigubhu.

⁶ Lapho befika esizeni sikaNakoni, uUza welulela isandla sakhe emtshokotshweni kaNkulunkulu, wawubamba ngoba inkabi zazikhubeka.

⁷ INkosi uNkulunkulu yamthukuthelela uUza, yahle yamtshaya khona lapho, ngoba welulela isandla sakhe emtshokotshweni; wafela khona lapho phansi komtshokotsho kaNkulunkulu.

⁸ UDavida wakhathazeka ngoba iNkosi imtshayile uUza; leyondawo yasithiwa yiPerezi‐Uza kuze kube lamuhla.

⁹ UDavida wayesaba iNkosi ngalolosuku, wathi: Pho, umtshokotsho weNkosi ngingawulondoloza njani na?

¹⁰ Ngakhoke uDavida kasavumanga ukuwuletha umtshokotsho emzini kaDavida; wasewuphambulela endlini kaObedi‐Edoma waseGithi.

¹¹ Umtshokotsho weNkosi wahlala endlini kaObedi‐Edoma waseGithi inyanga ezintathu. INkosi yambusisa uObedi‐Edoma lendlu yakhe yonke.

¹² Inkosi uDavida yabikelwa kwathiwa: INkosi uNkulunkulu iyibusisile indlu kaObedi‐Edoma lakho konke okwakhe ngenxa yomtshokotsho kaNkulunkulu. Ngakho uDavida wasesiyawuthatha umtshokotsho kaNkulunkulu endlini kaObedi‐Edoma, wawuletha emzini kaDavida ethokoza.

¹³ Kwakusithi lapho labo abathwele umtshokotsho weNkosi sebehambile izinyathelo eziyisithupha, ahlabe inkabi lethole elinonisiweyo.

¹⁴ UDavida wasina phambi kweNkosi ngamandla akhe wonke; wayegqoke ingubo yamahlombe yelembu elihle.

¹⁵ Ngokunjaloke uDavida layo yonke indlu yakoIsrayeli bawuletha umtshokotsho weNkosi ngokumemeza langokukhala kophondo.

¹⁶ Kwathi lapho umtshokotsho weNkosi ungena emzini kaDavida, uMikhali indodakazi kaSawuli walunguza ngewindi, wabona inkosi uDavida egiya, esina phambi kweNkosi, wayeyisa enhliziyweni yakhe.

¹⁷ Bawuletha umtshokotsho weNkosi, bawubeka endaweni yawo phakathi kwethente uDavida ayelimisele wona; uDavida wasenikela iminikelo yokutshiswa leminikelo yokuthula phambi kweNkosi.

¹⁸ UDavida eseqedile ukunikela iminikelo yokutshiswa leminikelo yokuthula, wabusisa abantu ebizweni leNkosi yamabandla.

¹⁹ Wababela abantu bonke bakoIsrayeli, abesilisa labesifazana, kwaba yilowo lalowo isinkwa, leqatha lenyama, lesinkwa sezithelo zevini ezomisiweyo. Basebehambake abantu bonke, baya emakhaya abo.

²⁰ UDavida wasebuya ekhaya ukubusisa indlu yakhe. UMikhali indodakazi kaSawuli waphuma ukuhlangabeza uDavida, wathi: Yeka udumo lwenkosi yakoIsrayeli lamuhla, ezambule phambi kwencekukazi zenceku zayo njengomuntu olilema!

²¹ UDavida wathi kuMikhali: Bekuphambi kweNkosi eyangikhetha phambi kukayihlo laphambi kwendlu yakhe yonke, yangimisa ukuba ngibe ngumbusi koIsrayeli, abantu beNkosi; isibili ngizathokoza phambi kweNkosi.

²² Ngikhona ngisazadeleleka kulalokhu, ngehliselwe phansi emehlweni akho; kodwa incekukazi okhulume ngazo zizangihlonipha.

²³ UMikhali indodakazi kaSawuli kabanga lamntwana waze wafa.