2 USamuyeli 5 - iBhayibhili Elingcwele 1978

UDavida ubusa ilizwe lonke lakoIsrayeli

¹ Zonke izizwe zakoIsrayeli zeza kuDavida eHebroni, zathi: Thina siyizihlobo zakho.

² Esikhathini esidlulileyo, uSawuli eseyinkosi yethu, nguwe owakhokhela uIsrayeli; iNkosi uNkulunkulu yathi kuwe: Wena uzakuba ngumalusi wabantu bami uIsrayeli, uzakuba ngumbusi wabo.

³ Kwafika bonke abadala bakoIsrayeli enkosini uDavida, eHebroni; yenza isivumelwano labo eHebroni phambi kweNkosi; bamgcoba, waba yinkosi koIsrayeli.

⁴ UDavida wayeleminyaka engamatshumi amathathu ekuqaliseni kwakhe ukubusa; wabusa iminyaka engamatshumi amane.

⁵ EHebroni wabusa koJuda iminyaka eyisikhombisa lenyanga eziyisithupha; eJerusalema wabusa iminyaka engamatshumi amathathu lantathu koIsrayeli wonke lakoJuda.

UDavida uthatha inqaba yaseZiyone

⁶ Inkosi uDavida labantu bayo baya eJerusalema ukulwa lamaJebusi ayehlala khona; wona atsho kuDavida athi: Kawuyikungena lapha, uzaxotshwa layiziphofu labaqhulayo; ecabanga ukuba uDavida angeke angene lapho.

⁷ Kodwa uDavida wayithatha inqaba yaseZiyone esithiwa ngumuzi kaDavida.

⁸ UDavida wathi ngalolosuku: Yilowo lalowo ohlasela umJebusi kakhwele ngomgelo wamanzi, ahlasele abaqhulayo leziphofu abazondwa nguDavida. Ngalokhoke kuthiwa: Iziphofu labaqhulayo kabayikungena endlini yeNkosi.

⁹ UDavida wahlala enqabeni, wayibiza ngokuthi ngumuzi kaDavida. UDavida wakha umuzi inxa zonke, kusukela edundulwini elithiwa yiMilo kusiya phakathi.

¹⁰ UDavida waqhubeka njalo esiba lamandla, ngoba iNkosi, uNkulunkulu wamabandla, yayilaye.

¹¹ UHiramu inkosi yaseTire wathuma izithunywa kuDavida, lemikusu, lababazi bezigodo labamatshe ukumakhela uDavida indlu.

¹² UDavida wabona ukuthi iNkosi yayimmisile ukuba abe yinkosi koIsrayeli, lokuthi uwuphakamisile umbuso wakhe ngenxa yabantu bayo uIsrayeli.

Abantwana bakaDavida abazalelwa eJerusalema

¹³ UDavida wathatha abanye abafazi eJerusalema, esesukile eHebroni, wazala amanye amadodana lamadodakazi.

¹⁴ Nanka amabizo alabo abazalela eJerusalema, oShamuwa, loShobabi, loNathani, loSolomoni,

¹⁵ loIbihari, loElishuwa, loNefegi, loJafiya,

¹⁶ loElishama, loEliyada, loElifeleti.

UDavida unqoba amaFilistiya

¹⁷ Kwathi amaFilistiya esezwile ukuba uDavida ugcotshiwe ukuba abe yinkosi yakoIsrayeli, wonke amaFilistiya enyuka ukuyamdinga uDavida; uDavida wakuzwa lokho, wehlela enqabeni.

¹⁸ AmaFilistiya esefikile agcwala isihotsha saseRefayimi.

¹⁹ UDavida wasebuza eNkosini esithi: Ngiyewahlasela amaFilistiya na? Uzawanikela esandleni sami na? INkosi yathi kuDavida: Yebo, hamba, ngoba ngizawanikela impela esandleni sakho amaFilistiya.

²⁰ UDavida wafika eBali‐Perazimi, wawahlula khona amaFilistiya, wathi: INkosi izifohlile izitha zami phambi kwami njengokufohla kwamanzi. Ngakhoke leyondawo yasithiwa yiBali‐Perazimi.

²¹ AmaFilistiya abaleka atshiya izithombe zawo lapho, uDavida labantu bakhe bazithatha.

²² AmaFilistiya abuya futhi, agcwala isihotsha saseRefayimi.

²³ Lapho uDavida ebuza iNkosi, yona yathi: Ungayi; bhoda ngemuva kwawo, uwasukele maqondana lezihlahla zebhalisamu.

²⁴ Kuzakuthi lapho usizwa umsindo wokuhamba phezu kwezihlahla uphangiseke, ngoba ngizabe ngihamba phambi kwakho ukunqoba impi yamaFilistiya.

²⁵ UDavida wenza njengokulaywa kwakhe yiNkosi, wawaxotsha amaFilistiya kusukela eGeba kwaze kwafika eGezeri.