2 USamuyeli 3 - iBhayibhili Elingcwele 1978

¹ Kwakukhona ukulwa isikhathi eside phakathi kwendlu kaSawuli lendlu kaDavida; uDavida waya eqina, kodwa indlu kaSawuli yaya isiba buthakathaka.

Amadodana kaDavida

² UDavida wazala amadodana eHebroni; izibulo lakhe lalinguAmnoni kuAhinowama waseJezereli;

³ eyesibili yayinguKileyabi kuAbigayili umkaNabali waseKarmeli; eyesithathu yayinguAbisalomu indodana kaMahaka indodakazi kaTalimayi, inkosi yaseGeshuri;

⁴ eyesine yayinguAdonija indodana kaHagithi; eyesihlanu yayinguShefathiya indodana kaAbithali;

⁵ eyesithupha yayinguIthereyamu kuEgila, umkaDavida. Laba bazalwa nguDavida eHebroni.

Ukuvumelana kukaDavida loAbineri

⁶ Khonokho kusekhona ukulwa phakathi kwendlu kaSawuli lendlu kaDavida, uAbineri waqina waba lamandla endlini kaSawuli.

⁷ USawuli wayelomunye umfazi, ibizo lakhe linguRizipha indodakazi kaAya; uIshiboshethi wathi kuAbineri: Ungeneleni kumkababa na?

⁸ UAbineri wasethukuthela kakhulu ngenxa yalawomazwi kaIshiboshethi, wasesithi: Ngiyinja yakoJuda na? Kuze kube lamuhla ngithembekile endlini kaSawuli uyihlo, lakubafowabo, lakubangane bakhe, kangikunikelanga esandleni sikaDavida; kodwa ungibeka icala ngalowesifazana.

⁹ UNkulunkulu amhlanekele uAbineri, engezelele futhi, uba ngingamenzeli uDavida lokho iNkosi ekufunge kuye,

¹⁰ ukususa umbuso endlini kaSawuli, kumiswe isihlalo sobukhosi sikaDavida koIsrayeli lakoJuda, kusukela koDani kuze kufike eBerisheba.

¹¹ UIshiboshethi wayengelakumphendula uAbineri ngelinye ilizwi futhi, ngoba wayemesaba.

¹² UAbineri wasethuma izithunywa kuDavida eHebroni, esithi: Ngelikabani ilizwe na? Yenza isivumelwano lami, ngizakukusiza ukubuyisela wonke uIsrayeli kuwe.

¹³ UDavida wathi: Kulungile; ngizakwenza isivumelwano lawe, kodwa yinye into engiyifuna kuwe, ngeyokuthi kawuyikubonana lami, uba ungalethi kuqala uMikhali indodakazi kaSawuli, lapho usiza ukubonana lami.

¹⁴ UDavida wasethuma izithunywa kuIshiboshethi indodana kaSawuli, esithi: Nginika umkami uMikhali engamlobola ngamajwabu alikhulu amaFilistiya.

¹⁵ UIshiboshethi wasethumela, wamthatha endodeni yakhe uPalitiyeli indodana kaLayishi.

¹⁶ Kodwa indoda yakhe yahamba laye, ihamba ikhala, yamlandela kwaze kwaba seBahurimi. UAbineri wasesithi kuyo: Buyela. Yasibuyelake.

¹⁷ UAbineri wasekhuluma labadala bakoIsrayeli esithi: Ngezikhathi ezidlulileyo lafuna ukuba uDavida abe yinkosi yenu.

¹⁸ Kwenzeni lokho khathesi, ngoba iNkosi uNkulunkulu itshilo ngoDavida ukuthi: Ngesandla senceku yami uDavida ngizakhulula abantu bami uIsrayeli ezandleni zamaFilistiya lezandleni zazo zonke izitha zabo.

¹⁹ UAbineri wakhuluma futhi labakoBenjamini; wasesiyabikela uDavida eHebroni konke okwakukuhle koIsrayeli lakuyo yonke indlu yakoBenjamini.

²⁰ Kwathi efika uAbineri kuDavida eHebroni labantu abangamatshumi amabili, uDavida wamenzela idili labantu ababelaye.

²¹ UAbineri wasesithi kuDavida: Sengihamba, ngibuthanise wonke uIsrayeli kuwe, nkosi yami, ukuba benze isivumelwano lawe, ukuba ubuse kukho konke okufiswa yinhliziyo yakho. UDavida wasemvumela uAbineri ukuba ahambe, wazihambela kuhle.

UJowabi ubulala uAbineri

²² Inceku zikaDavida zabuya loJowabi zivela ekuhlaseleni zilempango enengi. Kodwa uAbineri wayengasekho kuDavida eHebroni, ngoba wamvumela ukuba ahambe, wazihambela kuhle.

²³ Esefikile uJowabi lebutho lakhe lonke, bamtshela bathi: UAbineri indodana kaNeri ubefikile enkosini, imyekele wahamba, wazihambela kuhle.

²⁴ UJowabi wasesiya enkosini, wathi: Wenzeni na? UAbineri ubefikile kuwe; umvumeleleni ukuba ahambe, wazihambela na?

²⁵ Uyazi ukuba uAbineri indodana kaNeri wayeze ukukukhohlisa, ukuba azi ukuhamba kwakho konke, lakho konke okwenzayo.

²⁶ Esephumile uJowabi kuDavida wathuma izithunywa ukulandela uAbineri, zambuyisa emthonjeni waseSira; kodwa uDavida wayengakwazi lokho.

²⁷ UAbineri esebuyile eHebroni, uJowabi waya laye eceleni ngasesangweni ukuba bakhulume bebodwa; wasemgwaza esiswini, wafa, ephindisela uAsaheli umfowabo.

²⁸ Kwathi uDavida esekuzwile lokho wathi: Mina lombuso wami kasilacala phambi kweNkosi kuze kube nininini ngegazi likaAbineri indodana kaNeri.

²⁹ Kalehlele ekhanda likaJowabi lakuyo yonke indlu kayise. Kungasweleki endlini kaJowabi olamanxeba abhibhidlayo, lolesifo esibi, longasebenza umsebenzi wamanina kuphela, lobulawa empini, loswela ukudla.

³⁰ UJowabi loAbishayi umfowabo bambulala uAbineri, ngoba wayebulele umfowabo uAsaheli empini, eGibeyoni.

³¹ UDavida wasesithi kuJowabi lakubo bonke abantu ababelaye: Dabulani izigqoko zenu, ligqoke izambatho zokulila, lililele uAbineri. Inkosi uDavida walandela ithala.

³² UAbineri bamngcwabela eHebroni, inkosi yakhala kakhulu engcwabeni lakhe, labantu bonke bakhala.

³³ Inkosi yamlilela uAbineri yathi: Afe uAbineri njengesithutha na?

³⁴ Izandla zakho bezingabotshwanga, lenyawo zakho bezingafakwanga emaketaneni; ufile njengomuntu obulawa ngabantu ababi. Bonke abantu baphinda bamkhalela.

³⁵ Bonke abantu basebesiza ukumncenga uDavida ukuba adle kusesemini; kodwa uDavida wafunga wathi: UNkulunkulu angihlanekele ngokwengezelelweyo uba ngithinta ukudla loba okunye nje lingakatshoni ilanga.

³⁶ Bonke abantu bakubona, kwabathokozisa; njengoba konke eyayikwenza inkosi kwakubathokozisa bonke abantu.

³⁷ Basebesazi bonke abantu laye wonke uIsrayeli ngalolosuku ukuba kwakungesiyo inkosi eyabulala uAbineri indodana kaNeri.

³⁸ Inkosi yathi encekwini zayo: Kalazi yini ukuthi kufile iqhawe lomuntu omkhulu koIsrayeli lamuhla na?

³⁹ Lami lamuhla ngibuthakathaka lanxa ngigcotshwe ngaba yinkosi; lababantu, amadodana kaZeruya, bayangahlula. INkosi uNkulunkulu kayiphindisele owenza okubi ngobubi bakhe.