2 USamuyeli 1 - iBhayibhili Elingcwele 1978

Umbiko wokufa kukaSawuli

¹ Kwathi emva kokufa kukaSawuli, uDavida esebuyile ekubulaleni amaAmaleki, wahlala insuku ezimbili eZiklagi.

² Kwathi ngosuku lwesithathu kwafika umuntu evela ezihonqweni zikaSawuli, izigqoko zakhe zidabukile, egcwele lothuli ekhanda lakhe. Wathi efika kuDavida wawa phansi, wakhuleka.

³ UDavida wathi kuye: Uvela ngaphi na? Yena wathi kuye: Ngibalekile ezihonqweni zakoIsrayeli.

⁴ UDavida wasesithi kuye: Kuqhubeke njani na? Akungitshele. Yena waphendula wathi: Abantu babalekile empini, labantu abanengi bafile; uSawuli lendodana yakhe uJonathani labo bafile.

⁵ UDavida wasesithi kuleyonsizwa eyayimbikela: Wazi ngani ukuba uSawuli lendodana yakhe uJonathani bafile na?

⁶ Leyonsizwa eyayimbikela yathi: Kuthe ngisentabeni yaseGilibowa, ngabona uSawuli ekhotheme ebambelele ngomkhonto wakhe, inqola zokulwa lamabhiza kwasekumzingelezela.

⁷ Lapho enyemukula, wasengibona, wangibiza; ngaphendula ngathi: Ngilapha.

⁸ Wasesithi kimi: Ungubani na? Ngathi kuye: NgingumAmaleki.

⁹ Wasesithi kimi: Akusondele kimi ungiqedisele; ngoba ngisaphila, kanti ngithuthunyeliswa yikufa.

¹⁰ Ngakhoke ngasengisondela ngimqedisela, ngoba bengisazi ukuba angeke aphile emva kwalokho. Ngasengithatha umqhele owawusekhanda lakhe, lesongo elalisengalweni yakhe, ngikulethile lokho lapha enkosini yami.

¹¹ UDavida wasebamba izigqoko zakhe ezidabula; enza njalo lawo wonke amadoda ayelaye.

¹² Balila, bakhala, bazila ukudla kwaze kwahlwa ngenxa kaSawuli, loJonathani indodana yakhe, labantu beNkosi uNkulunkulu, abakoIsrayeli, ababebulewe empini.

¹³ UDavida wathi kuleyonsizwa eyayimbikele: Ungowangaphi na? Yona yathi: Ngiyindodana yomuntu wezizweni, umAmaleki.

¹⁴ UDavida wasesithi kuyo: Kungani ungesabanga ukwelula isandla sakho ubhubhise ogcotshiweyo weNkosi na?

¹⁵ UDavida wasebiza enye insizwa, wathi kuyo: Sondela uyidumele. Yasiyitshaya yaze yafa.

¹⁶ UDavida wathi kuyo: Igazi lakho libe phezu kwekhanda lakho; ngoba uzifakazele wena ngomlomo wakho, wathi: Ngimbulele ogcotshiweyo weNkosi.

Isililo sikaDavida ngoSawuli loJonathani

¹⁷ UDavida wasebalilela oSawuli lendodana yakhe uJonathani ngalesisililo

¹⁸ esilotshiweyo encwadini kaJashari, walaya ukuba sifundiswe abantu bakoJuda. Wathi:

¹⁹ Udumo lwakho, Israyeli, lubulewe ezindaweni zakho eziphakemeyo. Maye ngokuwa kwamaqhawe!

²⁰ Lingakuxoxi eGathi, lingakumemezeli ezindleleni zaseAshikeloni, funa athokoze amadodakazi amaFilistiya, athabe lamadodakazi abangasokanga.

²¹ Lina zintaba zaseGilibowa, kakungabi khona amazolo lezulu phezu kwenu, lina zintaba zokufa. Ngoba izihlangu zamaqhawe zangcoliswa khona; isihlangu sikaSawuli singagcotshwanga ngamafutha,

²² Egazini lababuleweyo lasemahwahweni amaqhawe umtshoko kaJonathani kawuphuthanga, lomkhonto kaSawuli kawubuyelanga uze.

²³ USawuli loJonathani babethandeka, bebahle. Ekuphileni lasekufeni kwabo kabehlukaniswanga; babelejubane kulenkozi, belamandla kulezilwane.

²⁴ Lina madodakazi akoIsrayeli, mkhaleleni uSawuli, owaligqokisa kuhle ngokubomvu, wacecisa izigqoko zenu ngeziceco zegolide.

²⁵ Maye ngokuwa kwamaqhawe ekulweni! Jonathani, ubulawelwe endaweni zakho eziphakemeyo!

²⁶ Ngidabukile ngawe, mfowethu Jonathani; ubulungile kakhulu kimi; belumangalisa kimi uthando lwakho, lusedlula uthando engithanda ngalo isifazana.

²⁷ Kwenze njani ukuba amaqhawe awe, kuphele lezikhali zokulwa!