2 UPhethro 1 - iBhayibhili Elingcwele 1978

Isibingelelo

¹ Mina Simoni Petro, inceku lomphostoli kaJesu Kristu, ngithi kubo abazuzileyo ukukholwa okufana lokwethu ngokulunga kukaNkulunkulu wethu loMsilisi uJesu Kristu:

² Kakwandiswe kini umusa lokuthula ngokumazi uNkulunkulu loJesu iNkosi yethu.

Abakholwayo bafanele ukuzithinta ngoba baphiwe okunengi nguNkulunkulu

³ Amandla akhe asinikile konke okumayelana lokuphila lokukhonza uNkulunkulu, ngokumazi yena owasibizela ebukhosini lebuhleni bakhe,

⁴ esiphiwe ngakho izithembiso eziligugu lezinkulu kakhulu, ukuze ngazo liphephe ekuboleni okusemhlabeni ngenxa yezinkanuko, libe ngabahlanganyeli besimo sikaNkulunkulu.

⁵ Ngalokhoke zamani ngawo wonke amandla ukwengezelela ukulunga ekukholweni kwenu, lasekulungeni lengezelele ukwazi,

⁶ lasekwazini ukuzithinta, lasekuzithinteni ukubekezela, lasekubekezeleni ukukhonza uNkulunkulu,

⁷ lasekukhonzeni uNkulunkulu ukuthanda abazalwane, lasekuthandeni abazalwane uthando.

⁸ Ngoba uba lezizinto zikhona kini zisanda, ziyalenza ukuba lingabi ngabavilaphayo labangelazithelo ekwazini iNkosi yethu uJesu Kristu.

⁹ Kodwa ongelazo lezizinto uyisiphofu, ubona kaluvivi, usekhohliwe ukuthi wahlanjululwa ezonweni zakhe ezindala.

¹⁰ Ngakhoke, bazalwane, tshisekelani kakhulu ukuqinisa ukubizwa lokukhethwa kwenu; ngoba uba lisenza lokhu, kalisoze lakhubeka.

¹¹ Ngokwenza njalo lizakuba lokungena ngokupheleleyo embusweni ongapheliyo weNkosi yethu loMsilisi uJesu Kristu.

Ubufakazi bukaPetro lobobaprofethi

¹² Ngakhoke ngizakuba ngilokhu ngilikhumbuza njalo lezizinto, lanxa lizazi, limi liqinile eqinisweni elilalo.

¹³ Ngithi kufanele ukuba, nxa ngisekhona emzimbeni, ngilivuse ngilikhumbuze.

¹⁴ Lokhu ngiyazi ukuthi kuseduze ukususwa komzimba wami, njengalokhu iNkosi yethu uJesu Kristu ingitshengisile.

¹⁵ Ngizakulungisa ukuthi ngezikhathi zonke emva kokusuka kwami lisale lizikhumbula lezizinto.

¹⁶ Ngoba sasingalilandiseli izinganekwane zobuqili, lapho silazisa amandla lokufika kweNkosi yethu uJesu Kristu, kodwa sasingabazibonelayo ubukhulu bayo.

¹⁷ Ngoba lapho esamukela udumo lobukhosi okuvela kuNkulunkulu uBaba, lalapho kwezwakala ilizwi livela enkazimulweni yobukhosi lisithi: Lo uyiNdodana yami ethandekayo engithokoze ngayo;

¹⁸ sasilaye entabeni engcwele, salizwa lelolizwi elivela ezulwini.

¹⁹ Seliqinisiwe kithi ilizwi labaprofethi, elenza kuhle lina ukuliqaphelisa kungathi liyisibane esikhanyayo endaweni emnyama, kuze kuse lekhwezi liphumele enhliziyweni zenu.

²⁰ Okokuqala yazini lokhu ukuthi kalikho ilizwi labaprofethi elivela emibhalweni elingachasiswa ngumuntu ngokwakhe;

²¹ ngoba kakuzanga kuze isiprofethi ngentando yomuntu, kodwa abantu bekhokhelwa nguMoya oNgcwele bakhuluma okuvela kuNkulunkulu.