2 ImiLando 9 - iBhayibhili Elingcwele 1978

Inkosikazi yaseSheba

¹ Inkosikazi yaseSheba isizwile ngodumo lukaSolomoni yeza eJerusalema ukumhlola ngemibuzo enzima, ilodwendwe olukhulu lamakamela ethwele amakha legolide elinengi lamatshe amahle; isifikile kuSolomoni yamtshela konke okwakusemcabangweni wayo.

² USolomoni wayiphendula yonke imibuzo yayo, kwakungekho lutho olwamcatshelayo ehluleka ukuluchasisa.

³ Inkosikazi yaseSheba isibonile konke ukuhlakanipha kukaSolomoni, lesigodlo ayesakhile,

⁴ lokudla kwakhe, lokuhlala kwezinduna zakhe, lokuhlelwa kwezinceku zakhe lezigqoko zazo, labaphathi bezitsha lezigqoko zabo, leminikelo yokutshiswa ayeyinikela ethempelini, kwayiqeda amandla.

⁵ Yathi enkosini: Yayiliqiniso imibiko engayizwa elizweni lami ngezindaba zakho langokuhlakanipha kwakho,

⁶ kangiyikholwanga leyomibiko ngaze ngafika ngazibonela ngamehlo. Khangela, bengingatshelwanga ngitsho lengxenye nje yobukhulu bokuhlakanipha kwakho; wena umkhulu kulalokho engakuzwayo ngawe.

⁷ Bayadela abafazi bakho. Ziyadela inceku zakho ezikusebenzelayo insuku zonke zizwe ukuhlakanipha kwakho.

⁸ Kayibongwe iNkosi uNkulunkulu wakho ekuthandileyo, yakubeka ukuba ube yinkosi ebizweni leNkosi uNkulunkulu wakho. Ngoba uNkulunkulu uyabathanda abakoIsrayeli, uzakubaqinisa kuze kube nininini, ukubekile waba yinkosi yabo ukuba ubuse ngomthetho langokulunga.

⁹ Inkosikazi yaseSheba yasinika inkosi uSolomoni igolide elingamathalenta alikhulu lamatshumi amabili, lamakha amanengi kakhulu, lamatshe amahle. Kakuzanga kulethwe ngaphambili amakha amanengi njengala inkosikazi yaseSheba eyawanika inkosi uSolomoni.

¹⁰ Futhi izinceku zikaHuramu lezikaSolomoni ezazithwala igolide livela eOfiri, zamlethela uSolomoni izigodo zomkampa lamatshe amahle.

¹¹ Ngezigodo zomkampa inkosi yenza izikhwelo zethempeli lezendlu yayo, yenza lemihubhe lamachacho abahlabeleli; kakuzanga kubonwe futhi izigodo ezifana lazo elizweni lakoJuda langaphambili.

¹² Inkosi uSolomoni yanika inkosikazi yaseSheba konke ekufisayo lekucelayo, ngaphezu kwezipho zayo zokwenana izipho zenkosikazi. Yasibuyelake elizweni layo lezinceku zayo.

Inotho kaSolomoni lodumo lwakhe

¹³ Ubunzima begolide elalifika kuSolomoni ngomnyaka babungamathalenta angamakhulu ayisithupha lamatshumi ayisithupha lesithupha,

¹⁴ ngaphandle kwalelo elalivela emithelweni yabathengisi lenzuzweni yabathengi; wonke amakhosi aseArabiya lababusi belizwe baletha igolide lesiliva.

¹⁵ Inkosi uSolomoni yenza izihlangu ezinkulu ezingamakhulu amabili ngegolide elikhandiweyo, sisinye senziwe ngegolide elingamashekeli angamakhulu ayisithupha.

¹⁶ Yenza lamahawu angamakhulu amathathu ngegolide elikhandiweyo, lilinye lenziwe ngegolide elingamashekeli alikhulu lamatshumi amathathu. Yakufaka endlini ethiwa ngeyeGusu laseLebanoni.

¹⁷ Yenza lesihlalo sobukhosi esikhulu ngempondo zendlovu, yasinameka ngegolide elihle.

¹⁸ Izikhwelo eziyisithupha zesihlalo lesigcabha saso kwakunanyekwe ngegolide; emaceleni aso kulezindawo zokubeka ingalo, lezilwane ezimbili eceleni kwendawo zokubeka ingalo;

¹⁹ kwakumi izilwane ezilitshumi lambili ezikhwelweni eziyisithupha, esinye isilwane singapha lesinye singale kwesikhwelo. Kakwenziwanga isihlalo sobukhosi esinjalo lakuwuphi omunye umbuso.

²⁰ Zonke inkezo zokunatha zenkosi uSolomoni zazenziwe ngegolide, lezitsha zonke zendlu ethiwa ngeyeGusu laseLebanoni zazenziwe ngegolide elihle; isiliva sasiyinto engasilutho ensukwini zikaSolomoni.

²¹ Inkosi yayilemikolo emikhulu yokuthwala impahla olwandle eyayisiya eTarshishi lezinceku zikaHuramu; limikolo yokuthwala impahla yayibuya kanye ngeminyaka emithathu ithwele igolide lesiliva lempondo zendlovu lezindwangu lezinkawu.

²² Inkosi uSolomoni yawadlula wonke amakhosi omhlaba ngokunotha langokuhlakanipha.

²³ Wonke amakhosi omhlaba eza kuSolomoni ukuzwa ukuhlakanipha uNkulunkulu ayekufake engqondweni yakhe.

²⁴ Wonke amlethela izipho, izinto zesiliva lezegolide, lezambatho, lemure, lamakha, lamabhiza lezimbongolo; kwaba njalo iminyaka ngeminyaka.

²⁵ USolomoni wayelezibaya zamabhiza lezezinqola zokulwa ezizinkulungwane ezine, lamabhiza empi azinkulungwane ezilitshumi lambili; amanye wawabeka emizini yezinqola, lamanye enkosini eJerusalema.

²⁶ Wawabusa wonke amakhosi kusukela emfuleni iYufrathi kwaze kwafika elizweni lamaFilistiya, lasemngceleni waseGibithe.

²⁷ Inkosi uSolomoni yandisa isiliva eJerusalema saba sinengi njengamatshe, lemikusu yaba minengi njengephane laseShefela.

²⁸ Amabhiza kaSolomoni ayevela eGibithe lasemazweni wonke.

Ukufa kukaSolomoni

²⁹ Ezinye izenzo zikaSolomoni, kusukela ekuqaleni kuze kube sekucineni, zilotshiwe ezindabeni zomlando kaNathani umprofethi, lakusiprofethi sikaAhija waseShiloni, lasemibonweni kaIdo umboni emayelana loJerobowamu indodana kaNebati.

³⁰ USolomoni wahlala eJerusalema ebusa uIsrayeli wonke iminyaka engamatshumi amane.

³¹ Waya kwabaphansi, wangcwatshelwa emzini kaDavida uyise. URehobowamu indodana yakhe waba yinkosi esikhundleni sakhe.