2 ImiLando 7 - iBhayibhili Elingcwele 1978

¹ Kwathi uSolomoni eseqedile ukukhuleka, kwehla umlilo ovela ezulwini, watshisa umnikelo wokutshiswa lemihlatshelo, lenkazimulo yeNkosi yagcwalisa ithempeli.

² Abapristi bahluleka ukungena ethempelini, ngoba inkazimulo yeNkosi yayigcwele khona.

³ Kwathi lapho bonke abakoIsrayeli bebona umlilo usehla lenkazimulo yeNkosi iphezu kwethempeli, bathi mbo ngobuso phansi endaweni egandelweyo, badumisa bebonga iNkosi besithi: Ngoba ilungile, uthando lwayo olungapheliyo lumi kuze kube nininini.

⁴ USolomoni labo bonke abantu banikela imihlatshelo phambi kweNkosi.

⁵ Inkosi uSolomoni yanikela imihlatshelo, izinkabi ezizinkulungwane ezingamatshumi amabili, lezimvu ezizinkulungwane ezilikhulu lamatshumi amabili. Inkosi labo bonke abantu bamahlukanisela uNkulunkulu indlu.

⁶ Abapristi bema endaweni zabo; lamaLevi lawo ephethe izinto zokuhlabelela inkosi uDavida ayezenzele ukudumisa ngazo iNkosi uNkulunkulu lapho edumisa ngenkonzo yabo — ngoba uthando lwayo olungapheliyo lumi kuze kube nininini; maqondana lalabo abapristi bakhalisa impondo zabo, labakoIsrayeli bonke babemi.

⁷ USolomoni wahlukanisela iNkosi indawo ephakathi kweguma elalingaphambi kwethempeli, ngoba lapho wanikela iminikelo yokutshiswa, lamahwahwa eminikelo yokuthula, ngoba ialtare lethusi uSolomoni ayelenzile lalilincinyane ukutshisela kulo umnikelo wokutshiswa lomnikelo wempuphu lamahwahwa.

⁸ Ngalesosikhathi uSolomoni labo bonke abakoIsrayeli ababelixuku elikhulu, ababevela ekuyeni ngaseHamathi kusiya esifuleni seGibithe benza umkhosi insuku eziyisikhombisa.

⁹ Ngosuku lwesificaminwembili benza inkonzo yokucina, ngoba ukwahlukaniselwa kwealtare kwenziwa insuku eziyisikhombisa, lomkhosi wenziwa insuku eziyisikhombisa.

¹⁰ Enyangeni yesikhombisa, ngosuku lwamatshumi amabili lantathu lwenyanga, wabadabulela abantu, baya emizini yabo bethokoza bejabula ngokuhle iNkosi uNkulunkulu eyayikwenzele uDavida loSolomoni labantu bayo uIsrayeli.

INkosi izibonakalisa kuSolomoni ngokwesibili

¹¹ USolomoni waqedake ukwakha ithempeli lokwakha indlu yakhe; konke ayelungise ukukwenza endlini yeNkosi lakweyakhe indlu kwaphela kuhle.

¹² INkosi yabonakala kuye ebusuku yathi kuye: Ngizwile ukukhuleka kwakho, sengizikhethele lindawo ukuba ibe yindlu yemihlatshelo.

¹³ Uba ngivala iphezulu ukuze kungabi lazulu, loba ngithumela intethe ukuchitha ilizwe, ingabe ngithumele umkhuhlane phakathi kwabantu bami,

¹⁴ uba abantu bami ababizwa ngebizo lami bezithoba, bakhuleke bengidinga, betshiya indlela zabo ezimbi, mina ngizakuzwa ngisezulwini, ngithethelele izono zabo, ngikhulule ilizwe labo.

¹⁵ Amehlo ami azavuleka, lendlebe zami zizalalela umkhuleko owenziwa kulindawo.

¹⁶ Sengiyikhethile ngayihlambulula lindlu ukuze ibizo lami lidunyiselwe khona kuze kube nininini, amehlo ami lenhliziyo yami kuzakuba kuyo isikhathi sonke.

¹⁷ Wenake, uba uhamba phambi kwami njengoyihlo uDavida, usenza konke engikulaye khona, ugcine izimiso zami lemithetho yami,

¹⁸ ngizaqinisa umbuso wakho, njengesivumelwano engasenza loyihlo uDavida ngisithi: Kawuyikuswela muntu ozabusa uIsrayeli.

¹⁹ Kodwa uba liphambuka, litshiya izimiso zami lemilayo yami engililaye yona, lisuke liyekhonza abanye onkulunkulu,

²⁰ ngizakulisiphula elizweni engalinika lona, lalindlu engiyahlukanisele ibizo lami ngiyichithe phambi kwami, ngiyenze ibe yisiga lento yokuhaywa phakathi kwezizwe zonke.

²¹ Lindlu edumileyo wonke umuntu odlulayo amangale ngayo athi: INkosi ikwenzeleni okunje kulelilizwe lakulindlu na?

²² Impendulo izakuthi: Kungoba bayidelile iNkosi uNkulunkulu waboyise eyabakhupha eGibithe, banamathela kwabanye onkulunkulu, babakhonza babasebenzela; ngalokhoke iNkosi uNkulunkulu ibehlisele bonke lobububi.