2 ImiLando 5 - iBhayibhili Elingcwele 1978

¹ Kwathi usuphelile wonke umsebenzi uSolomoni ayewenza ethempelini, wangenisa izinto uyise uDavida ayezahlukanisele iNkosi, isiliva legolide lazo zonke izitsha, wazibeka enothweni yethempeli likaNkulunkulu.

Ukungeniswa komtshokotsho wesivumelwano ethempelini

² USolomoni wasebuthanisa eJerusalema abadala bakoIsrayeli lazo zonke izinduna zezizwe eziyizikhulu zezindlu zabakoIsrayeli, ukuba bakhuphe umtshokotsho wesivumelwano seNkosi emzini kaDavida othiwa yiZiyone.

³ Bonke abantu bakoIsrayeli babuthana enkosini ngesikhathi somkhosi owenyanga yesikhombisa.

⁴ Beza bonke abadala bakoIsrayeli, amaLevi awuthwala umtshokotsho wesivumelwano,

⁵ awuletha kanye lethente lokuhlangana, lazo zonke izitsha ezingcwele ezazisethenteni ethempelini.

⁶ Inkosi uSolomoni lalo lonke ibandla lakoIsrayeli elalibuthene babephambi komtshokotsho benikela imihlatshelo yezimvu lezinkabi ezingelakubalwa ngobunengi bazo.

⁷ Abapristi basebewungenisa umtshokotsho wesivumelwano seNkosi endaweni yawo, endlwaneni engaphakathi eyindawo engcwele kakhulu, bawubeka ngaphansi kwempiko zamakherubi.

⁸ Ngoba amakherubi elulela impiko zawo phezu kwendawo yomtshokotsho, awembesa umtshokotsho lezigodo zawo.

⁹ Izigodo zazinde kakhulu, izihloko zazo zikhanya ngasendaweni engcwele engaphambi kwendlu engaphakathi, kodwa zingabonakali ngaphandle; zikhona lapho kuze kube lamhla.

¹⁰ Kwakungelalutho emtshokotshweni, kuphela amatshe amabili uMose awafaka khona eHorebe lapho iNkosi yenza khona isivumelwano labakoIsrayeli ekuphumeni kwabo eGibithe.

¹¹ Kwathi lapho sebephuma abapristi endaweni engcwele — ngoba bonke abapristi ababekhona babezihlambulule bengalandelanga izigaba zabo —

¹² abahlabeleli bonke bamaLevi oAsafi loHemani loJeduthuni, lamadoda abo lezihlobo zabo, begqoke amalembu amahle, bephethe izigubhu lamachacho lemihubhe, bema ngasempumalanga kwealtare kanye labapristi abalikhulu lamatshumi amabili bekhalisa izimpondo.

¹³ Kwakungumsebenzi wabakhalisi bezimpondo labahlabeleli ukuba bahlabele kanyekanye ekudumiseni lekubongeni iNkosi sekuhlatshelwa ingoma, kukhaliswa impondo lezigubhu lezinye izinto zokuhlabela, kudunyiswa iNkosi kuthiwa: Ngoba ilungile, uthando lwayo olungapheliyo lumi kuze kube nininini; indlu yagcwala intuthu yeyezi,

¹⁴ baze bahluleka abapristi ukuma, bakhonze khona ngenxa yentuthu; ngoba inkazimulo yeNkosi yagcwala ithempeli.