2 ImiLando 4 - iBhayibhili Elingcwele 1978

¹ Wenza lealtare lethusi, ubude balo buzingalo ezingamatshumi amabili, lobubanzi balo buzingalo ezingamatshumi amabili, lokuphakama kwalo kuzingalo ezilitshumi.

² Wasesenza ulwandle ngethusi elincibilikisiweyo, lwaluyisizingelezi, luzingalo ezilitshumi kusukela kolunye ukhumbi kusiya kolunye, lezingalo ezinhlanu ukuphakama, lokhalo lwalo luzingalo ezingamatshumi amathathu.

³ Ngaphansi kokhumbi kwakukhona okufanana lamaqhaga kubhoda ulwandle okwezingalo ezingamatshumi amathathu; amaqhaga lawo ayeyimizila emibili, ebunjwe ndawonye lolwandle.

⁴ Lwalwakhelwe phezu kwenkabi ezilitshumi lambili; ezintathu zikhangele enyakatho, ezintathu zikhangele entshonalanga, ezintathu zikhangele eningizimu, ezintathu zikhangele empumalanga, zazifulathelene.

⁵ Uhlonzi lwalo lwalungangobubanzi besandla, umphetho walo unjengomphetho wenkezo, njengeluba lomduze, lwalulingana lamatanka azinkulungwane ezintathu.

⁶ Wenza lemiganu yokugezela elitshumi, wabeka emihlanu ngakwesokunene, lemihlanu ngakwesokhohlo; babezakugezisela kiyo okomnikelo wokutshiswa; ulwandle lwalungolokugezela abapristi.

⁷ Wenza lezinti zezibane zegolide ezilitshumi njengokumisiweyo, wazibeka ethempelini, ezinhlanu zaba ngaseningizimu, lezinhlanu zaba ngasenyakatho.

⁸ Wenza lamatafula alitshumi, wawabeka ethempelini, amahlanu aba ngaseningizimu, amahlanu aba ngasenyakatho. Wenza lemiganu yokuchela elitshumi.

⁹ Wenza iguma labapristi leguma elikhulu, lezivalo zeguma, wazinameka ngethusi izivalo.

¹⁰ Walubeka ulwandle ngakwesokunene ngasengonsini yethempeli engaseningizimu yempumalanga.

¹¹ UHuramu wenza izimbiza lamafotsholo lemiganu yokuchela. Wasewuqeda umsebenzi ayewenzela uSolomoni endlini kaNkulunkulu,

¹² insika ezimbili, leziduku ezimbili ezaziphezu kwezinsika, lamambule amabili okwembesa iziduku ezimbili ezisensikeni,

¹³ lamapomegranati angamakhulu amane amambule womabili, imizila emibili yamapomegranati kulelo lalelombule, okwembesa iziduku ezimbili ezisensikeni.

¹⁴ Wenza lezinqodlana ezilitshumi, lemiganu yezinqodlana elitshumi,

¹⁵ lolwandle, lenkabi ezilitshumi lambili ngaphansi kolwandle;

¹⁶ izimbiza lamafotsholo lamafolokwe, zonke lezizinto uHuramu wazenzela inkosi uSolomoni ngethusi elikhazimulayo zibe ngezethempeli.

¹⁷ Inkosi yazibumbela emagcekeni aseJordani emhlabathini olibumba phakathi kweSukothi leZereda.

¹⁸ USolomoni wazenza zonke lezizinto zaba zinengi kakhulu, kwaze kwahlula lokulinganisa ubunzima bethusi.

¹⁹ USolomoni wazenzake zonke izinto ezazisendlini kaNkulunkulu, ialtare legolide, amatafula ezinkwa ezahlukaniselwe uNkulunkulu,

²⁰ izinti zezibane lezibane zazo ezenziwe ngegolide elihle ukukhanyisa endlini engaphakathi, njengokumisiweyo,

²¹ lamaluba, lezibane, lezindlawu, wakwenza ngegolide elihle kakhulu,

²² lezindlawu, lemiganu yokuchela, lemiganu yempepha, lezitsha zokuthwala umlilo, wazenza ngegolide elihle; iminyangoke yendlu, izivalo zayo ezingaphakathi, ezendawo engcwele kakhulu, lezivalo zethempeli zazingezegolide.